د واینټ د راپور له مخې، د قطر یوه لوړپوړي سرچینې ویلي چې د حماس مشران په دوحه کې پر ځای نه وو چېرته چې د اسراییلو برید شوی و.
واینټ زیاته کړې چې دا عملیات د استخباراتي معلوماتو د نیمګړتیا له امله ناکام شول.
ویل شوي که د قطر یو لوړپوړی چارواکی، چې د حماس او اسراییلو ترمنځ د اړیکو مسوول دی، په دغه ځای کې موجود وای، برید به د دواړو هېوادونو ترمنځ ډېر ستر کړکېچ رامنځته کړی وای.
د اسراییلو څلورو امنیتي چارواکو واینټ ته ویلي چې د قطر پر ضد د برید پرېکړه په اسراییلو کې د سختو نیوکو سره مخ شوې ده.
البانیا د نړۍ په کچه لومړی هېواد شو چې د مصنوعي ځیرکتیا پر بنسټ یې وزیره ټاکلې ده.
د دې نوې وزیرې نوم «دیلا» دی چې د عامه تدارکاتو د څارنې او د فساد ضد مبارزې لپاره ټاکل شوې ده.
د البانیا لومړي وزیر اېدي راما ویلي، دیلا به د قراردادونو پروسه له رشوت، فشار او اړیکو پالنې خوندي کړي او د تدارکاتو بهیر به شفاف او چټک کړي.
دیلا تر دې وړاندې د “e-Albania” په ډیجیټلي پلاتفورم کې د یو میلیون څخه ډېر غوښتنلیکونه پروسس کړي دي.
خو په البانیا کې د دې نوښت په اړه نظرونه وېشلي دي.
د اپوزیسیون ډیموکرات ګوند دا کار «چټي» بللی، خو یو شمېر شنونکي وايي که په سمه توګه مدیریت شي، کولی شي د شفافیت او د خلکو د باور زیاتولو کې مرسته وکړي.
د فرانسې ولسمشر امانویل مکرون ویلي چې د ملګرو ملتونو عمومي اسمبلۍ د نیویارک اعلامیه او د دوو هېوادونو د حل لاره تصویب کړه.
د دې بهیر مشري فرانسه او سعودي کوي او ۱۴۲ هېوادونو یې ملاتړ کړی دی.
ټاکل شوې ده د سپتمبر په ۲۲مه د دواړو هېوادونو په ګډ کنفرانس کې د فلسطین د رسمیت پېژندنې وروستی لست اعلان شي.
مکرون ویلي، فرانسه به په راتلونکو غونډو کې فلسطین په رسمیت وپېژني او څو لوېدیځ هېوادونو یې ملاتړ کړی دی.
رویټرز ته د سپینې ماڼۍ یوې سرچینې ویلي، چې ولسمشر ډونالډ ټرمپ د اسرائیل د وروستي برید څو ورځې وروسته د قطر له لومړي وزیر شیخ محمد بن عبدالرحمن آل ثاني سره په نیویارک کې د ماښام ډوډۍ خوړلې ده.
دغه برید چې د دوحې په ښار کې د حماس د مشرانو د ترور هڅه وه، د امریکا تر ملاتړ لاندې د غزې د اوربند هڅې له خطر سره مخ کړې.
سرچینې ویلي، ټرمپ په ټیلیفوني اړیکه کې د اسرائیل له لومړي وزیر بنیامین نتانیاهو سره خپله ناخوښي څرګنده کړې او قطري لوري ته یې ډاډ ورکړی چې دا ډول بریدونه به نه تکرارېږي.
د غونډې پر مهال دواړو لورو د قطر د منځګړیتوب رول او امنیتي همکارۍ په اړه خبرې کړې.
ټرمپ د اسرائیل برید “یو اړخیز اقدام” بللی او ویلي چې دغه برید د امریکا او اسرائیل په ګټه نه دی.
ملګرو ملتونو ویلي، په افغانستان کې د طالبانو له خوا پر ښځینه کارکوونکو د بندیزونو له امله د ژغورنې اړین خدمتونه ځنډېدلي دي.
د کډوالو عالي کمېشنرۍ استازي عرفات جمال ټینګار کړی چې د ښځو له ګډون پرته مرستندویه پروګرامونه عملي کېدلای نه شي.
د راپور له مخې، د یکشنبې په ورځ طالبانو د ملګرو ملتونو افغان ښځینه کارکوونکې له دفترونو منع کړې، چې ورسره د نقدو مرستو وېش او د بېرته ستنو شویو لپاره د ملاتړ مرکزونه وتړل شول.
ملګرو ملتونو ویلي، یوازې د روان کال په اوږدو کې شاوخوا ۲.۶ میلیونه افغانان له ګاونډیو هېوادونو بېرته ستانه شوي، چې ډېری یې د خپلې خوښې خلاف دي، او د بېرته ستنېدونکو شمېر ورځ تر بلې ډېرېږي.
د امریکا ولسمشر ډونالډ ټرمپ ویلي چې افغانستان د امنیت له پلوه د شیکاګو په پرتله خوندي دی.
نوموړي د فاکس نیوز په یوه ځانګړې مرکه کې ادعا وکړه چې په افغانستان کې وضعیت ښه شوی؛ خو د امریکا لوی ښارونه لکه شیکاګو لا هم له پراخو جرمونو او تاوتریخوالي سره مخ دي.
د ټرمپ دې څرګندونو په ټولنیزو شبکو کې توند غبرګونونه پارولي دي.
د ټرمپ مخالفانو او یو شمېر امریکایانو د نوموړي پرتله ناسمه او د تمسخر وړ بللې ده، په داسې حال کې چې افغانستان هره ورځ د هدفي وژنو، غلاوو او وسلهوالو پېښو شاهد وي.
د امریکا ولسمشر ډونالډ ټرمپ ویلي چې افغانستان د امنیت له پلوه د شیکاګو په پرتله خوندي دی.
نوموړي د فاکس نیوز په یوه ځانګړې مرکه کې ادعا وکړه چې په افغانستان کې وضعیت ښه شوی؛ خو د امریکا لوی ښارونه لکه شیکاګو لا هم له پراخو جرمونو او تاوتریخوالي سره مخ دي.
د ټرمپ دې څرګندونو په ټولنیزو شبکو کې توند غبرګونونه پارولي دي.
د ټرمپ مخالفانو او یو شمېر امریکایانو د نوموړي پرتله ناسمه او د تمسخر وړ بللې ده، په داسې حال کې چې افغانستان هره ورځ د هدفي وژنو، غلاوو او وسلهوالو پېښو شاهد وي.
اسراییل د ملګرو ملتونو د عمومي اسمبلې نننۍ هغه پریکړه چې له مخې به یې فلسطین او اسرایل د سیاسي حل پر لور ګامونه اخلي؛ په کلکه رد کړه.
د اسراییل د بهرنیو چارو وزارت په خپره شوې اعلامیه کې، دا پرېکړه په رښتیا د بدلیدلو او حقیقت منلو یو خیالي انګیرنه ګڼلې او دا یې یوه سیاسي ننداره بللې.
دوی ټینګار کړی چې په پرېکړه کې هېڅ ځای د حماس د ترهګر سازمان په توګه یادونه نه ده شوې او نه هم د دې خبرې اعتراف شته چې د جګړې د دوام یوازینی لامل د حماس له لوري د برمته کسانو نه خوشې کول او نه وسلې ایښودل دي.
اسراییل وايي، دغه پرېکړه د سولې د حل لاره نه پرمخ وړي؛ بلکې حماس ته د جګړې د دوام جرئت ورکوي.
اسراییلي حکومت له هغو هېوادونو مننه کړې چې دې پرېکړې ته یې مثبته رایه نه ده ورکړې.
امریکا د فیلیپین په ملاتړ د چین د هغو پلانونو مخالفت کړی چې غواړي د سکاربرو ریف سیمه د “ملي طبیعي زیرمې” په توګه اعلان کړي.
د امریکا د بهرنیو چارو وزیر مارکو روبیو ویلي، دا د چین له لوري د فشار راوړلو او د خپلو پراخو سمندري ادعاوو د پرمخ وړلو هڅه ده، چې د سیمې د ثبات او د ګاونډیو هېوادونو پر زیان تمامېږي.
روبیو ټینګار کړی چې د چین دغه اقدام د فیلیپین د ماهیګیرو د دودیزو حقونو پر وړاندې غیرقانوني مداخله ده.
هغه له بیجنګ څخه غوښتي چې د ۲۰۱۶ کال د نړیوال حکم پرېکړې ته درناوی وکړي، کومه چې څرګندوي چین په غیرقانوني توګه د فیلیپین د ماهیګیرو پر فعالیتونو محدودیتونه لګولي دي.
سکاربرو ریف د فیلیپین په ځانګړې اقتصادي ساحه کې پروت دی، خو له ۲۰۱۲ کال راهیسې د چین تر عملي کنټرول لاندې دی.
د ملګرو ملتونو عمومي غونډې د یوې نوې پرېکړې په تصویب سره د فلسطین او اسراییل ترمنځ د سیاسي حل ملاتړ وکړ او له دواړو لورو یې د دوه دولتونو د لارې د عملي کېدو غوښتنه وکړه.
دغه پرېکړه د ۱۴۲ هېوادونو په موافقه او یوازې د لسو هېوادونو په مخالفت سره تائید شوه.
په پرېکړه کې د حماس د ۷م اکتوبر بریدونه غندل شوي دي، خو په ورته وخت کې د اسراییلو د پوځ عملیات، د غزې پر ملکي وګړو بریدونه او د سیمې کلابندي هم په کلکو ټکو غندل شوې ده.
د خلیج عربي هېوادونو د دې پرېکړې ملاتړ کړی او ټینګار یې کړی چې نړیواله اجماع د جګړې د پای ته رسېدو او د یو عادلانه سیاسي حل لپاره روښانه پیغام لري.