د پنجشنبې په ورځ د نفتو نړیوالو بیو خپل نزولي بهیر ته دوام ورکړی دی.
د برینټ نفتو بیه ۷۳.۳۴ ډالرو او د امریکا د خامو نفتو بیه ۷۰.۰۷ ډالرو ته راکمه شوه، چې د وروستیو اونیو د لوړو بیو په پرتله د پام وړ کموالی ښيي.
شنونکي وایي، په منځني ختیځ کې د سیاسي کړکېچ د کمېدو هیلو او د هرمز تنګي له لارې د نفتو د لېږد د عادي کېدو تمو د بیو په راټیټېدو کې مهم رول لوبولی دی.
همدارنګه د ځینو هېوادونو له خوا د نفتو د تولید زیاتوالی او په نړیواله کچه د تقاضا د کمزورۍ په اړه اندېښنو هم پر بازار فشار راوستی دی.
د نفتو د بیو ټیټېدل د هغو هېوادونو لپاره مثبت خبر ګڼل کېږي چې ډېره انرژي واردوي، ځکه د انرژۍ لګښتونه یې راکمېږي؛ خو د نفتو پر صادراتو متکي هېوادونه ښايي د عوایدو د کمېدو او بودجوي فشارونو سره مخ شي.
