اورشلیم پوست راپور ورکړی، چې اسرائیل د ایران احتمالي برید له کبله خپل چمتووالی زیات کړی دی.
د سرچینې د معلوماتو له مخې، په دغه چمتووالی کې د ورځنیو فعالیتونو راټولونه هم شامله ده.
بل لورته ویل کېږي چې د اسرائیل ځواکونه هم د چمتووالي په حال کې دي.
اسرائیل وایي، چې پر دوی د ایرات د برید په صورت کې به پر یمن، سوریې او عراق هم بریدونه وکړي.
وروسته تر هغې، چې د پاکستان ملي شورا د ۱۹۵۲ کال په قانون کې تعدیلات تصویب کړل، تازه په دې اړه د افغان سولې لپاره د امریکا ځانګړي پخواني استازي زلمي خلیلزاد ویلي، چې دا پرېکړه به د پاکستان قضایه قوه فلجه کړي.
د هغه په خبره، د دغه کار پایلې به د جنرال منیر د ناړه سیاستونو دوام وي.
نوموړي زیاته کړې، د پنځو کلونو لپاره د پاکستاني پوځ د رییسانو د کاري مودې غځول به په پاکستان کې د بې ثباتۍ، تاوتریخوالي، د ازادۍ د محدودیت او اقتصادي کمزورتیا سبب شي.
د یادونې ده چې په دغه قانون کې تعدیلاتو ته په پاکستان کې یو شمېر سیاسي ګوندونو هم غبرګون ښودلی دی.
ټاکل شوې چې نن د نومبر په پنځمه د امریکا ولسمشریزې ټاکنې ترسره شي.
د راپورونو له مخې، سږکال په امریکا کې ۲۴۴ میلیونه کسان د رایې ورکولو په شرایطو برابر دی، چې ډېره برخه خلکو وړاندې تر وړاندې خپلې رایې اچولې دي.
د نظر پوښتنو له مخې، د دواړو کاندیدانو ترمنځ به سیالي خورا سخته وي.
ټرمپ ویلي، د بریا په صورت کې به میلیونونه کډوال وباسي؛ خو هرېس بیا وايي چې ټرمپ له واک ناوړه ګټه پورته کوي.
وروسته تر هغې، چې په پاکستان کې د مالدیف سفیر د طالبانو له سفیر سره وکتل؛ دغه هېواد خپل سفیر ور غوښتی دی.
د مالدیف د بهرنیو چارو وزارت تر دې وړاندې ویلي وو، چې دا لیدنه بې له اجازې ترسره شوې وه.
یاد هېواد ویلي، دوی هغه هېواد د مشروع حکومت په توګه پېژني، چې په ملګرو ملتونو کې د افغانستان استازیتوب کوي.
په ورته مهال بیا پاکستانۍ رسنۍ اردو نیوز هم په خپلو یوه راپور کې ویلي، چې مالدیف په پاکستان کې د خپل سفارت له پاڼې د ښاغلي طه نوم لرې کړی دی.
اسرائیلي رسنیو راپور ورکړی، چې د دغه هېواد د لومړي وزیر له دفتر څخه د محرومو اسنادو د افشا کېدو په تور یې یو بل افسر هم نیولی، چې په دې سره د نیول شویو کسانو شمېر پنځو تنو ته ورسېد.
د سرچینو د معلوماتو له مخې، افشا شوي محرم اسناد د حماس ډلې د یو مشر په کمپیوټر کې موندل شوي، چې د بندیانو د تبادلې په برخه کې د عامه ذهنیت د خرابوالي لپاره ترې کار اخېستل کېده.
تر دې وړاندې اسرائیلي رسنیو لیکلي وو، چې د لومړي وزیر یو ارشد مشاور هم په دې تور نیول شوی دی.
د ایران د سپاه پاسداران د ځمکنیو ځواکونو قوماندان محمد پاکپور ویلي، چې د سیستان او بلوچستان په سرحدي سیمو کې ۱۸ تنه وژل شوي کسان افغان او تاجکستاني وګړي وو، چې په ایران کې یې د “ځانمرګي” برید پلان درلود.
پاکپور ویلي چې دغو کسانو ”د تیلو تر چتر لاندې“ ځانونه ایران ته اړول او د ځانمرګي برید پلان یې درلود.
د یادونې ده چې ایران په سیستان او بلوچستان کې د تیل لېږدوونکو په پراخې وژنې او ډزو تورن دی.
دغه تېل وړونکي ډېری د ایران د وروسته پاتې سیمو وګړي وي، چې له دغه هېواده د پاکستان سرحدي سیمو ته د تیلو په لیږد سره خپلې اقتصادي ستونزې حل کوي.
افغانو نجونو یو وار بیا د طالبانو له حکومت غوښتي، چې په کانکور ازموینه کې د ګډون اجازه ورکړي.
تېره ورځ د طالبانو د ازموینو ملي ادارې اعلان وکړ، چې د ښوونځیو او دیني مدرسو فارغان کولای شي چې د روان کال د جدي میاشتې تر پایه په کانکور ازموینه کې د ګډون لپاره نوم لیکنه وکړي.
له یادې ادارې څخه خپره شوې خبرپاڼه کې د نجونو په اړه څه نه دي ویل شوي.
افغان نجونې وایي، له درې کالو زیاته موده وشوه، چې له شپږم ټولګي پورته د ښوونځیو دروازې یې پر مخ تړلې دي.
د ایران د سپاهپاسداران یو قومندان حمید مازندراني د الوتکې د لوېدو پېښه کې ژوند بایللی.
د ایران تسنیم خبري اژانس لیکلي، چې دا الوتکه نن د دغه هېواد په سویل کې لوېدلې.
په پېښه کې له نوموړي سره د الوتکې یو خدمتګار هم وژل شوی دی.
د یادونې ده چې مازندراني په ګلستان کې د سپاه پاسداران د یوې قطعې قومندان وو.
ننګرهار کې د طالبانو سترې محکمې اعلان کړی، چې د دغه ولایت په کوز کونړ ولسوالۍ کې یې یوه ښځه له کوره د تېښتې د هڅې په تور ۳۹ دُرې وهلې ده.
یادې محکمې په یوه خپره کړې خبر پاڼه کې ویلي، چې دا حکم د کوز کونړ د لومړنۍ محکمې له لوري پلي شوی دی.
تېره ورځ هم د طالبانو له لوري په ننګرهار کې دوو کسانو ته تعزیري سزاوې ورکړل شوې وې.
سره له دې چې نړیوال ژر تر ژره د دغو سزاوو د بندېدو غوښتنه کوي؛ خو طالبان وايي دا یو شرعي عمل دی او په ټولو مجرمینو به پلي کېږي.
هند کې د ټرافیکي پېښې له کبله ۲۴ کسان وژل شوي او یو شمېر نور تري تم دي.
هندي رسنیو خبر ورکړی، چې پېښه د هند په شمال کې یوې ژورې کندې ته د مسافر وړونکي موټر د غورځېدو له کبله شوې ده.
د سرچینو د معلوماتو له مخې، په بس کې ۴۲ کسان سپاره وو، چې تر اوسه د ۲۴ تنو جسدونه موندل شوي.
لاهم د تلفاتو کچه وروستۍ نه ده.