اکسیوس راپور ورکړی چې امریکايي ځواکونه به د راتلونکو ۶۰ ورځو لپاره منځني ختیځ کې پاتې شي او یوازې هغه مهال به وځي چې له ایران سره وروستۍ هوکړه وشي.
د راپور له مخې، واشنګټن هڅه کوي د ایران سره د احتمالي توافق تر ترلاسه کېدو پورې خپل پوځي حضور وساتي، ځکه د سیمې امنیتي وضعیت لا هم حساس بلل کېږي.
تر دې وړاندې هم امریکايي چارواکو ویلي وو چې د ایران د اټومي پروګرام او سیمهییزو کړکېچونو په اړه خبرې روانې دي او د احتمالي هوکړې تر وروستۍ کېدو پورې به پوځي او ډیپلوماتیک اقدامات دوام ولري.
د پاکستان د خیبر پښتونخوا په بېلابېلو سیمو کې د تېرو ۲۴ تر ۴۸ ساعتونو پر مهال د امنیتي ځواکونو د عملیاتو او نښتو راپورونه ورکړل شوي دي.
د پوځ د عامه اړیکو ادارې (ISPR) ویلي، په بنو، شمالي وزیرستان او نورو سیمو کې د استخباراتي عملیاتو پر مهال له ۲۰ زیات وسلهوال وژل شوي دي.
بلخوا په باجوړ کې په پاکستاني امنیتي پوستې بریدونه شوي چې ګڼ شمیر پولیسو ته مرګژوبله اوښتې ده.
چارواکي وایي، په سیمه کې د وسلهوالو فعالیتونه زیات شوي او د مخنیوي لپاره د عملیاتو لړۍ روانه ده.
د نړۍ اقتصادي بازارونه د ایران کړکېچ او د تیلو د بیو د لوړېدو له امله له بېثباتۍ سره مخ شوي دي.
نړیوالو راپورونو ویلي، د برینټ خام تیلو بیه تر ۱۰۰ ډالرو اوښتې او دا وضعیت په اروپا، امریکا او اسیا کې د انفلاسیون او اقتصادي فشارونو د زیاتېدو اندېښنې راپارولي دي.
اقتصادي شنونکي وایي، د منځني ختیځ روان کړکېچ د انرژۍ بازار سخت اغېزمن کړی او که وضعیت همداسې دوام وکړي، د نړۍ اقتصادي وده به نوره هم ورو شي.
بلخوا نړیوال مالي صندوق (IMF) هم خبرداری ورکړی چې جګړې او سیاسي ترینګلتیاوې نړیوال اقتصاد له خطر سره مخ کوي.
د افغانستان د کانکور ازموینې د ګډونوالو شمېر په وروستیو کلونو کې د پام وړ کم شوی دی. د خپرو شویو شمېرو له مخې، په ۱۳۹۸ کال کې نږدې ۲۱۰ زره کسانو د کانکور په ازموینه کې ګډون کړی و، خو سږکال ۱۴۰۵ کې دا شمېر شاوخوا ۵۰ زرو کسانو ته راټیټ شوی، چې د تېرو کلونو په پرتله د پام وړ کموالی ښيي.
د معلوماتو له مخې، په ۱۳۹۷ کال کې نږدې ۲۰۰ زره، په ۱۳۹۹ کال کې د کرونا له محدودیتونو سره سره شاوخوا ۱۷۰ تر ۱۸۰ زره، په ۱۴۰۰ کال کې نږدې ۱۵۰ زره او په ۱۴۰۱ کال کې شاوخوا ۱۴۰ زره کسانو کانکور ورکړی و، خو له هغې وروسته هر کال د ګډونوالو شمېر کم شوی دی.
ولایتي ارقام هم د کانکور د ګډونوالو د کمېدو څرګندونه کوي. په خوست کې د ګډونوالو شمېر له ۷۵۰۰ څخه ۲۵۰۰ ته، په ننګرهار کې له ۲۲۵۰۰ څخه ۹۰۰۰ ته او په کندهار کې شاوخوا ۲۰۰۰ کسانو ته راکم شوی دی.
د زدهکړو یو شمېر شنونکي وایي، د لوړو زدهکړو پر وړاندې محدودیتونه، د نجونو د پوهنتونونو تړل کېدل، د استادانو وتل او د اقتصادي ستونزو زیاتوالی هغه عوامل دي چې د زدهکوونکو پر راتلونکې او د کانکور پر ګډون یې منفي اغېز کړی دی.
تر اوسه د لوړو زدهکړو وزارت د دغو شمېرو او د ګډونوالو د کمېدو په اړه رسمي وضاحت نه دی ورکړی.
سرچینې وایي، د کرېکټ نړیواله شورا (ICC) ټاکلې چې تر لوی اختر وروسته له طالب چارواکو سره د هلمند د کرېکټ لوبغالي د نړولو او د هغه د بدلون په تړاو خبرې وکړي او رسمي سپیناوی ترې وغواړي.
د معلوماتو له مخې، ICC د هلمند په لښکرګاه کې د کرېکټ لوبغالي د له منځه وړلو راپورونو ته اندېښمنه ده او دا موضوع یې له نږدې څارلې ده.
ځايي سرچینې وایي، یاد لوبغالی چې د هلمند د ځوانانو لپاره د کرېکټ مهم مرکز و، اوس د اختر د لمانځه لپاره پر لوی جومات یا عیدګاه بدلیږي.
ورزشي فعالان او د کرېکټ مینهوال وایي، د دغه لوبغالي له منځه وړل نه یوازې د ورزش پر راتلونکې منفي اغېز کوي، بلکې د هغو افغانانو احساسات هم زیانمنوي چې پر خپل وطن او ملي شتمنیو زړه خوږوي.
د کرېکټ نړیوالې شورا تر دې وړاندې هم د افغانستان د کرېکټ او ورزشي وضعیت په تړاو اندېښنې څرګندې کړې وې او ویلي یې وو چې افغانستان کې کرېکټ د خلکو د یووالي او د ځوانانو د راتلونکې لپاره مهم رول لري.
تر اوسه طالب چارواکو د ICC د احتمالي خبرو او اندېښنو په اړه رسمي دریځ نه دی خپور کړی.
د اطلاعاتو او کلتور پخوانی مرستیال وزیر ډاکتر هارون حکیمي په ایکس کې د پخواني ولسمشر اشرف غني د فرامینو د پخواني رئیس ولي شبګیر د څرګندونو په غبرګون کې توندې نیوکې کړې دي.
نوموړي ادعا کړې چې شبګیر د خپلې دندې پر مهال ځان شتمن کړی، اسټرالیا ته یې د طالبانو د ګواښ په نوم د کډوالۍ دوسیه وړاندې کړې، خو اوس په کابل کې د طالبانو له پروژو سره همکاري کوي.
هغه زیاته کړې چې شبګیر د طالبانو پر ضد غږ نه پورته کوي، خو د نورو د بیان ازادي محدودول غواړي.
د جمهوري نظام دغه چارواکي ټینګار کړی چې د افغانستان د یوه وګړي په توګه حق لري د هېواد د مسئولینو په اړه خپل لیدلوری او مشاهدې شریکې کړي.
واشنګټن ټایمز راپور ورکړی چې د امریکا او ایران ترمنځ د سولې د احتمالي هوکړې مسوده د دواړو لورو له مهمو څېرو تایید شوې او د وروستۍ منظورۍ لپاره د دواړو هېوادونو مشرانو ته استول شوې ده.
د راپور له مخې، د ایران د پارلمان رئیس محمد باقر قالیباف، د امریکا مرستیال ولسمشر جیډي وېنس، د امریکا ځانګړي استازي سټیو ویتکاف او د امریکا د ولسمشر ډونالډ ټرمپ زوم جرد کوشنر د سولې د دغه وړاندیز شوې هوکړې له مسودې ملاتړ کړی دی.
واشنګټن ټایمز ته یوې سرچینې، چې مذاکراتو ته نږدې بلل شوې، ویلي چې تمه ده امریکا او ایران د یکشنبې تر ماښام پورې د شخړو د پای ته رسولو لپاره د سولې د هوکړې د نهايي کېدو اعلان وکړي.
د راپور له مخې، سرچینې زیاته کړې چې د هوکړې لومړنۍ مسوده د شنبې ورځې په سهار د دواړو لورو ترمنځ منل شوې ده.
تر اوسه د امریکا او ایران چارواکو په رسمي ډول د دې راپور په اړه څه نه دي ویلي.
په ایران کې د طالبانو حکومت د سفارت سرپرست فضل محمد حقاني د ایران د اوسپنې پټلۍ له اجراییه رییس جبار علي ذاکري سره د افغان سوداګرو د ستونزو، ټرانزیټي اسانتیاوو او د هرات ـ مزارشریف د اوسپنې پټلۍ پروژې په اړه خبرې کړې دي.
دغه هېواد کې د طالبانو حکومت سفارت ویلي، په دې کتنه کې په کابل کې د ایران د سفارت سرپرست عليرضا بېګدلي هم ګډون درلود او دواړو لورو د اقتصادي همکاریو پر پراختیا ټینګار کړی دی.
د خبرپاڼې له مخې، په لیدنه کې د افغان سوداګرو لپاره د اسانتیاوو او د ټرانزیټي چارو د ښه والي موضوعات هم مطرح شوي، خو نور جزییات نه دي خپاره شوي.
د امريکا ولسمشر ډونالډ ټرمپ له سيبياېس نيوز او اکسیوس سره په خبرو کې ویلي، وروستۍ هوکړه به ایران د اټومي وسلې له ترلاسه کولو منع کړي او د ایران د غني شوو یورانیمو لپاره به د قناعت وړ حل ولري.
ټرمپ ټینګار کړی چې یوازې هغه هوکړه به لاسلیک کړي چې امریکا پکې خپلې غوښتنې ترلاسه کړي.
هغه زیاته کړې چې ښايي د ایران په اړه خپله وروستۍ پرېکړه سبا يکشنبه وکړي.
د هغه په وینا، ایران به له دوو حالتونو څخه یو سره مخ شي؛ یا به هوکړه وشي او یا به امریکا پرې سخت برید وکړي.
اکسیوس راپور ورکړی چې ټرمپ به د ایران د هوکړې د مسودې په اړه له عربي هېوادونو او اسرائیلو سره هم اړیکې ونیسي.
د راپور له مخې، ټرمپ به د خپلې ادارې له سلاکارانو سره د هوکړې مسوده و ارزوي او ښايي تر سبا پورې پرې وروستۍ پرېکړه وکړي.
ویل شوي چې نوموړی به له مرستيال ولسمشر جیډي وېنس، سټیو ویتکاف او جرډ کوشنر سره هم په دې اړه غونډه وکړي.
نن د طالبانو حکومت د مشر شيخ هبتالله په امر د هلمند ولایت د کرکټ لوبغالي یوه برخه ونړول شوه او په راتلونکي کې یې پر ځمکه عیدګاه جومات آبادیږي.
د هلمند کرکټ لوبغالي د نړولو پر وړاندې په خواله رسنیو کې فعالانو توند غبرګونونه ښودلي.
افغان خبریال ایمل پسرلي دا کار په لوی لاس د ځوان نسل او د نړیوالو راپارول بللي او زیاته کړې یې ده، دا ډول لاسوهنې به د دې لامل شي چې د کرکټ نړیواله شورا پر افغانستان بندیزونه ولګوي.
هم مهاله د کرکټ شننونکی او ټولنیز فعال بشیر غروال وایي، د هېواد په استازولۍ او په ملي لوبډله کې د ځوانانو د لوبېدو هیله به څه پوره شي چې جوړ تیار لوبغالی یې ویجاړیږي.
ښاغلي غروال هم اندېښنه ښودلې چې که له ورزشي ارزښتونو او تاسیساتو سره دا ډول چلند دوام وکړي، نو نړیواله شورا به ډیر زر ملي لوبډله هم په کور کېنوي.
په ټوله کې ځوانانو د هلمند کرکټ لوبغالي پر ویجاړولو خواشیني څرګنده کړې او اندېښنه یې ښودلې چې هغه ورځ به هم لېرې نه وي چې د کرکټ نړیواله شورا به پر ملي لوبډلې بندیزونه ولګوي.