د هند د بهرنیو چارو وزیر، ډاکټر ایس.جی شنکر، په نوي ډیلي کې د طالبانو حکومت د صنعت او سوداګرۍ له وزیر نورالدین عزیزي سره لیدلي او د دواړو هېوادونو د اقتصادي او خلکو ترمنځ اړیکو د پراختیا په اړه یې هراړخیز بحث ترسره کړی دی.

جی شنکر په خپله ایکس پاڼه ویلي، چې هند د افغانستان له خلکو سره د دوامدار ملاتړ ژمنه لري او هڅه کوي چې سوداګریزې اړیکې، سیمه‌ییز اتصال او د خلکو ترمنځ تګ راتګ لا پیاوړی کړي.

د ده په وینا، هند غواړي داسې اقتصادي لارې پرانیزي چې د افغان ولس لپاره د ودې او ثبات فرصتونه برابر کړي.

د جی شنکر او عزیزي دا لیدنه د هند او افغانستان د اړیکو په لړ کې یو مهم پرمختګ بلل کېږي، په داسې حال کې چې دواړه لوري د متقابلې سوداګرۍ، پانګونې او اقتصادي پراختیا پر عملي لارو چارو تمرکز کوي.

د طالبانو حکومت د مهاجرینو ستونزو ته د رسیدنې عالي کمیسون د دارلانشاء کمیټې د راپور له مخې د سې شنبې په ورځ ۱,۷۶۳ کډوالې کورنۍ، چې ټول شمېر یې له ۱۰ زرو اوړي، د تورخم، سپین بولدک، اسلام‌قلعه او وېش ـ چمن له لارو هېواد ته ستنې شوې دي.

د طالبانو حکومت د ویاند مرستیال حمد الله فطرت په وینا، د ورځې په اوږدو کې ۲,۲۲۲ ستنېدونکې کورنۍ خپلو اصلي ولایتونو ته لېږدول شوې او ۱,۵۴۳ کورنیو ته بیړنۍ مرستې رسېدلې دي.

نوموړي زیاته کړې، چې د کابل د ترانسپورت کمېټې په همغو ورځو کې ۱,۲۴۱ کورنیو ته د خوندي لېږد اسانتیاوې برابرې کړې، چې په دې تړاو شاوخوا ۴.۸ میلیونه افغانۍ د ترانسپورتي لګښتونو لپاره ځانګړې شوې دي.

د هېواد پخواني ولسمشر، محمد اشرف غني د یو اوږد پیغام په خپرولو سره ویلي چې هېواد د یو ډېر حساس تاریخي پړاو په منځ کې د خطر او فرصت تر یوه لوی انتخاب رسېدلی دی.

ښاغلی غني وایي چې اوسنی وضعیت د ملي ګټو د تعریف، تلپاتې سولې د موندلو او د ملي اجماع د رامنځته کولو لپاره بنسټیز بحث ته اړتیا لري.

هغه ټینګار کړی چې د هېواد ستونزې یوازې هغه مهال حل کېدای شي چې ولس ګډ بحث ته ور ودانګي، ملي ګټې مشخصې شي او د هېواد راتلونکی مسیر د خلکو په خپله وټاکل شي.

غني وايي، تېرو ۴۷ کلونو کې افغانان له سولې، ثبات، اقتصادي ودې او مشروع حاکمیت بې‌برخې پاتې شوي، او په دې شرایطو کې تر ټولو مهمه پوښتنه دا ده چې څنګه تلپاتې سولې ته ورسېږو.

غني د مهاجرینو اجباري شړل، طبیعي پېښې او د پاکستان وروستي نظامي بریدونه د هېواد وضعیت لا سختوونکی یاد کړي دي.

هغه وایي، که څه هم ستونزې ډېرې دي، خو هیله باید ژوندۍ وساتل شي او د بدلون لپاره په ګډه هڅه وشي.

هغه زیاتوي چې ملي اجماع باید د راتلونکي لپاره پر تمرکز ودریږي، نه یوازې په تېر باندې.

د ده په باور، د ستونزو د حل یوازینۍ لار د خلکو یووالی، د سولې ټینګېدل، د مشروعیت ترلاسه کول، د تعلیم او روزنې پراختیا او له نړۍ سره د متوازنو اړیکو بیا رغول دي.

په پای کې غني وایي چې د ځان لپاره واک یا څوکۍ نه غواړي، خو که ولس اړتیا وګني، دی چمتو دی د بحران د حل او د «جوړوونکي» لارې د وړاندې کولو لپاره خپله ونډه واخلي.

طالبانو حکومت تر واک لاندې د کابل ښار لسمې امنیتي حوزې پولیسو د هکرانو هغه درې کسیزه ډله نیولې چې د خلکو شخصي واټساپ اپلیکیشنونه به یې هک کول.

د یادې حوزې جنایي مدیر عبدالرحمن مخلص ویلي چې دغې ډلې به د خلکو شخصي واټساپ اپلیکیشنونه او نور ورته حسابونه هک کول او د کورنیو د شخصي عکسونو او ویډوګانو تر ترلاسه کولو وروسته به یې ترې د پیسو غوښتنې کولې.

یاد هکران د لسمې امنیتي حوزې مربوطاتو کې نیول شوي.

مسولینو ویلي چې له یادو هکرانو څیړنې روانې دي.

د هېواد پخواني ولسمشر حامد کرزي د نومبر ۲۰مه د ماشوم د نړیوالې ورځې په مناسبت ویلي چې ماشومان د هېواد راتلونکی جوړوي او تر ټولو ډېر پاملرنې او ملاتړ ته اړتیا لري.

کرزي ویلي چې د هېواد د روښانه راتلونکي لپاره باید ماشومانو ته د زده‌کړې، تخصص او مهارتونو د ترلاسه کولو بشپړ فرصت ورکړل شي.

هغه ټینګار کړی چې زده‌کړه د هر ماشوم حق دی او د ټولنې اړتیا هم ګڼل کېږي.

د هغه په وینا، ټولنه هغه مهال پرمختګ کولی شي چې د خپلو ماشومانو د تعلیم او روزنې له لارې متخصص بشري ځواک وروزي.

کرزي یو ځل بیا غوښتنه کړې چې د نجونو او هلکانو لپاره دې ژر تر ژره ټولې ښوونیزې دروازې، په ځانګړي ډول مکتبونه او پوهنتونونه، پرانستل شي څو د ټولو ماشومانو د زده‌کړې په برابر فرصت سره د هېواد د پرمختګ او ودې زمینه برابره شي.

د طالبانو حکومت د لوړو زده‌کړو وزیر شیخ ندا محمد ندیم وایي چې عصري علوم د بشري ژوند مهمه اړتیا ده او د هېواد پرمختګ له همدې علومو سره تړلی دی.

هغه د افغانستان ملي راډیو ټلوېزیون له لوري په خپور شوي غږیز پیغام کې زده‌کوونکو ته ویلي چې اقتصاد، روغتیا، سوداګري او نور ټولې اړتیاوې په عصري علومو پورې تړلې دي او باید زده‌کوونکي د فراغت وروسته د دیني پوهاوي ترڅنګ په قرآن کریم هم ښه پوه شي.

د یادونې ده چې د طالبانو حکومت کې د پوهنتونو پر ځای د مدرسو جوړولو ته ډېره پاملرنه شوې او مسلکي استادان له دندو لرې کړل شوي، چې د پوهنتونو علمي کچه یې ټیټه کړې ده.

اسراییل په جنوب لبنان کې تازه هوايي بریدونه کړي چې په نتیجه کې یو تن وژل شوی دی.

د اسراییلي پوځ په وینا، دغه عملیات د حزب‌الله د پوځي فعالیتونو د مخنیوي لپاره ترسره شوي او هغو سیمو ته متوجه وو چې ګومان کېده وسلې او مهمات پکې زېرمه شوي دي.

پوځ ادعا کوي چې حزب‌الله د تېر کال د اوربند له باوجود هڅه کوي خپل راکټي ځواک بېرته فعال کړي خو حزب‌الله دغه تورونه ردوي او وايي چې د اوربند شرایط یې مراعات کړي او د سرحد ساتنه د لبنان پوځ مسؤولیت دی.

د بریدونو له اعلان وروسته، د سرحدي کلیو اوسېدونکو سیمې پرې ایښې دي.

اسراییل څلور کلي د احتمالي برید هدف په توګه نښه کړي وو.

د امریکا د عدلیې وزارت وایي یو ۱۹ کلن افغان ځوان چې عبدالله حاجي زاده نومېږي د امریکا قانوني دایمي اقامت یې درلود، د وسله‌والو فعالیتونو په تړاو د ۱۵ کلونو په زندان محکوم شوی دی.

چارواکي وايي نوموړي هڅه کوله چې وسله او مهمات ترلاسه کړي، او پوهېده چې دا مهمات به د داعش ډلې د یوه احتمالي برید لپاره د امریکا د ټاکنو پر ورځ وکارول شي.

د عدلیې وزارت د معلوماتو له مخې، حاجي‌زاده او د هغه ۲۸ کلن افغان ملګری، ناصر احمد توحیدي، دوه کلاشینکوفونه او ۵۰۰ مرمۍ ترلاسه کړي وو.

دواړه په اکتوبر ۲۰۲۴ کې د استخباراتي څارنې وروسته نیول شوي وو.

وزارت زیاته کړې چې عبدالله حاجي‌زاده د ۲۰۲۵ کال د اپرېل په ۱۷مه په محکمه کې په خپلو تورونو اعتراف کړی.

د کورنیو چارو وزارت پخواني امنیتي مرستیال خوشحال سادات د پخواني والي حلیم فدایي څرګندونو ته په غبرګون کې ویلي:« که دغو والیانو خپلی دندی په ایمانداری ترسره کړی وی ځوانان او ولس به د حکومت په ضد نه دریدل او جگړه به نه وه. »

ښاغلي سادات فدایي ته ویلي:« د جمهوریت پیل نه تر سقوط پورې چې زما یادیږي حلیم فدایي والي وه. کله به میدان وردګ کې، کله خوست، پکتیا او لوگر کې تعینیدو.»

دغه پخواني جنرال حلیم فدایي ته ویلي چې:« امریکایي او افغان طیارو به د بمبارد نه مخکې ولایت مقام څخه وتسپ په وسیله اجازه اخیسته. پورته ولایاتو کې چې د هر چا کور بمبارد شوی وي حلیم فدایي دې ورته ځواب ورکړي.»