د پاکستان لومړي وزیر شهباز شریف ویلي، چې د قطر له لومړي وزیر او د بهرنیو چارو وزیر شیخ محمد بن عبدالرحمن بن جاسم آل ثاني‌ سره یې ټلیفوني خبرې کړې دي.

شهباز شریف په خپله ایکس‌پاڼه لیکلي، چې دواړو لورو د سیمې او نړۍ پر روان وضعیت خبرې کړې او د سولې، خبرو اترو او سیمه‌ییز ثبات لپاره یې پر ګډ تعهد ټینګار کړی دی.

د پاکستان لومړي وزیر د قطر د ډیپلوماتیک رول ستاینه کړې او ویلي یې دي، چې د قطر امیر شیخ تمیم بن حمد آل ثاني نه یې د پاکستان په مشرۍ د سولې او کړکېچ کمولو د هڅو د ملاتړ له امله مننه کړې ده.

شهباز شریف زیاته کړې، چې اسلام اباد د قطر د امیر پاکستان ته د احتمالي سفر هرکلی کوي او دواړه هېوادونه به د سیمې او نړۍ د سولې او ثبات لپاره خپلو همکاریو ته دوام ورکړي.

د هند د آی‌پي‌اېل لیګ په دوام، رویل چلېنجرز بنګلور لوبډلې نن په یوه په زړه پورې لوبه کې پنجاب کېنګز لوبډلې ته په ماتې ورکولو سره، د لومړۍ لوبډلې په توګه پلې آفز پړاو ته ووته.

بنګلور سیالې لوبډلې ته د وېنکاتېش اېر ۷۳ او ویرات کوهلي ۵۸ ډېرو منډو پر مټ د ۲۲۲ منډو هدف ورکړ چې پنجاب کېنګز په شلو اوورونو کې د اته لوبغاړو په له لاسه ورکولو ۱۹۹ منډې وکړې او لوبه یې د ۲۳ منډو په توپیر وبایلله.

افغان لوبغاړي عظمت الله عمرزی هم چې نن د پنجاب کېنګز لوبډلې برخه و، په توپ اچوونه کې یې په څلورو اوورونو کې بې له کومې وېکټې اخیستو ۳۸ منډې ورکړې او په توپ وهنه کې یې په لسو توپونو ۱۴ منډې جوړې کړې.

په همدې حال کې بنګلور لوبډله دا مهال د ۱۸ پواینټونو په لرلو سره د لوبډلو د جدول په سر کې ده، چې ۱۳ لوبې یې کړي، ۹ یې ګټلي او څلور یې بایللي دي.

سږکال د یادې لوبډلې ښو کارکردګیو ته په کتو، مینه وال یې هیله لري چې یو ځل بیا به، پرلپسې د دویم کال لپاره هم اتلولي وګټلی شي.

نن یکشنبه د ننګرهار ولایت په کوربتوب د پنځو لوبډلو په ګډون د کرېکټ لېسټ ای نهم پړاو یو ورځنۍ سیالۍ پیل شوې.

د دغو سیالیو لومړۍ لوبه د میس عینک او بند امیر لوبډلو ترمنځ ترسره شوه چې د لوبې پچه بند امیر وګټله او لومړی یې د سیالې لوبډلې پر وړاندې د توپ وهنې پرېکړه وکړه.

په ټاکل شویو ۵۰ اوورونو کې د نهه لوبغاړو په زیان یې ۳۳۱ منډې جوړې کړې.

د لوبې په دویمه پاڼۍ کې میس عینک لوبډلې د ۵۰ اوورونو تر پایه د نهه لوبغاړو په زیان یوازې ۳۲۴ منډې جوړې کړې او د ۷ منډو په توپیر یې لوبه وبایلله.

د یادونې ده چې د لېسټ ای نهم پړاو یو ورځنۍ لوبې به د جون تر څلورمې د ننګرهار په غازي امان الله خان او نجیب الله ترکي لوبغالي کې دوام ولري او هره لوبډله به په خپل منځ کې شپږ-شپږ لوبې ترسره کړي.

د طالبانو حکومت د کانونو او پټرولیم وزارت ویلي، چې د ټاپي پروژې د ګازو نل‌لیکې د افغانستان اړوند برخو کې رغنیزې چارې په چټک او منظم ډول دوام لري او د هرات په مسیر کې د پام وړ پرمختګونه شوي دي.

د وزارت د معلوماتو له مخې، تر دې مهاله هرات کې د پروژې لپاره ۶۳ کیلومټره نل‌لیکه غځول شوې او د شاوخوا ۱۲۵ کیلومټرو مسیر د نورو نل‌لیکو د نصب لپاره بشپړ چمتو شوی دی.

چارواکي زیاتوي، چې د پروژې اړوند نل‌لیکې له بهرنیو هېوادونو څخه هم افغانستان ته رارسېدلې دي او نږدې ۵۱ کیلومټره نل‌لیکه د کار سیمو ته انتقال شوې ده.

د ټاپي پروژه، چې د ترکمنستان ګاز د افغانستان له لارې پاکستان او هند ته لېږدوي، د سیمې له مهمو اقتصادي او انرژۍ پروژو څخه ګڼل کېږي.

په تهران کې د پاکستان سفارت اعلان کړی چې د پاکستان د کورنیو چارو وزیر محسن نقوي د خپل وروستي سفر پر مهال د ایران له ولسمشر مسعود پزشکیان سره شاوخوا ۹۰ دقیقې لیدنه کړې ده.

د سفارت په وینا، محسن نقوي د شنبې په ورځ تهران ته رسېدلی و او د ایران د ولسمشرۍ په ماڼۍ کې یې نږدې درې ساعته تېر کړي دي.

په دې لیدنه کې د ایران د کورنیو چارو وزیر اسکندر مومني او د بهرنیو چارو وزیر عباس عراقچي هم حضور درلود.

همداراز ایراني رسنیو راپور ورکړی چې محسن نقوي د ایران د اسلامي شورا له رئیس محمد باقر قالیباف سره هم لیدلي دي.

بل لوري ته، العربیه شبکې د ځینو سرچینو له قوله ویلي چې دا سفر د یوه احتمالي تفاهم د چوکاټ د رامنځته کېدو په هدف ترسره شوی دی.

د کابل پخواني والي احمدالله عليزي د ملي تفاهم او د افغانانو د یووالي پر اړتیا ټینګار کړی او ویلي یې دي چې د طالبانو حکومت باید د ټولو افغانانو ترمنځ د اعتماد جوړونې، تفاهم او ګډ کار لپاره عملي او منظم ګامونه پورته کړي.

نوموړي ویلي، د هېواد د اوسنیو ستونزو د حل لپاره اړتیا ده چې یوه روښانه او عادلانه لاره پرانېستل شي، څو افغانستان له انزوا، سیاسي او اقتصادي مشکلاتو څخه ووځي او د سولې، ثبات او پرمختګ پر لور حرکت وکړي.

احمدالله عليزي همداراز له نړیوالې ټولنې او سیمه‌ییزو هېوادونو غوښتي چې د افغانستان د وضعیت د ښه کېدو لپاره په مناسب وخت کې مرسته او همکاري وکړي، ځکه د ده په وینا د وخت ضایع کېدل د وطن او ملت لپاره ستر زیان دی.

هغه زیاته کړې چې ټول لوري باید د افغانستان د ښه راتلونکي، ملي یووالي او دوامدار ثبات لپاره خپل اختلافات کم او د ګډ تفاهم فضا رامنځته کړي.

د اسرائیل لومړي وزیر بنیامین نتانیاهو ویلي، چې ټاکل شوې نن د امریکا له ولسمشر ډونالډ ټرمپ سره خبرې وکړي او د سیمې د وروستیو تحولاتو په اړه ورسره بحث وکړي.

نتانیاهو ویلي، تمه لري چې ټرمپ به له خپل وروستي سفر او نورو نړیوالو موضوعاتو څخه خپلې ارزونې شریکې کړي.

هغه زیاته کړې: «بېلابېل احتمالات موجود دي او موږ د هر ډول سناریو لپاره چمتووالی لرو.»

د اسرائیل لومړي وزیر همداراز ټینګار کړی چې د دوی پام ایران ته دی او د سیمې وضعیت له نږدې څاري.

د طالبانو حکومت مشر شیخ هبت‌الله اخوندزاده د پروان او کاپیسا ولایتونو د علماوو شوراګانو له مسؤلینو او غړو سره په لیدنه کې د علماوو پر ديني او ټولنیز مسؤلیت ټینګار کړی دی.

د طالبانو حکومت د مرستیال ویاند حمدالله فطرت له لوري په خپره شوې خبرپاڼه کې راغلي، چې په دې غونډه کې د بهرنیو چارو وزیر امیر خان متقي او یو شمېر نور علماء او مسؤلین هم حاضر وو.

شیخ هبت‌الله اخوندزاده علماوو ته ویلي، چې د خلکو لارښوونه د شریعت په رڼا کې د علماوو اساسي دنده ده او هغوی باید د «اسلامي امارت» صادر شوي فرمانونه او قوانین خلکو ته واضح کړي او د هغو اهمیت ورته بیان کړي.

نوموړي د علماوو ترمنځ د یووالي او همغږۍ پر اهمیت هم خبرې کړې او ویلي، چې د علماوو اتفاق د ټولنې د اصلاح او د امت د یووالي سبب ګرځي.

هغه ویلي، چې دغه ډول علمي او فقهي ناستې د شرعي مسائلو د سمې څېړنې، د حق د څرګندولو او د علماوو ترمنځ د تفاهم او محبت د پیاوړتیا لپاره مهمې دي.

همداراز، نوموړي له علماوو غوښتي چې د اطلاعاتو او کلتور وزارت اړوند د جهادي اثارو د ساتنې ریاست سره همکاري وکړي، چې د جهاد او قربانیو تاریخ خوندي کړي او راتلونکو نسلونو ته یې انتقال کړي.

نن په افغانستان کې د نجونو پر مخ د ښوونځیو د تړل کېدو ۱۷۰۰ ورځې پوره شوې؛ هغه پرېکړه چې د میلیونونو نجونو د زده‌کړو، هیلو او راتلونکي پر وړاندې یې لوی خنډ جوړ کړی دی.

د ۲۰۲۱ کال د اګست له تحولاتو وروسته، د طالبانو حکومت د شپږم ټولګي پورته د نجونو ښوونځي وتړل. که څه هم د طالبانو حکومتي چارواکو څو ځله ویلي چې د نجونو ښوونځي “تر امر ثاني” پورې تړل شوي؛ خو تر اوسه دغه امر نه دی صادر شوی او د نجونو د زده‌کړو د بېرته پیل لپاره کوم عملي اقدام نه دی لیدل شوی.

په دې موده کې میلیونونه نجونې له زده‌کړو بې برخې پاتې شوې دي. د ملګرو ملتونو، د بشري حقونو نړیوالو سازمانونو او ګڼو اسلامي هېوادونو له لوري پرله‌پسې غوښتنې شوې چې افغان نجونو ته د زده‌کړو حق ورکړل شي؛ خو دغو غوښتنو تر اوسه کومه پایله نه ده لرلې.

نړیوالو بنسټونو خبرداری ورکړی چې د نجونو د زده‌کړو دوامداره بندیز نه یوازې د افغانستان پر اقتصاد او ټولنیز پرمختګ منفي اغېز کوي، بلکې راتلونکي نسلونه هم له جدي ستونزو سره مخامخ کوي.

بل لور ته، ګڼې کورنۍ وایي چې د ښوونځیو د تړل کېدو له امله د نجونو د زده‌کړو انګېزه کمه شوې او ډېری نجونې له روحي فشارونو، نا امیدۍ او ټولنیزو ستونزو سره مخ دي.

سره له دې محدودیتونو، ځینو نجونو هڅه کړې چې د انلاین زده‌کړو، کورنیو کورسونو او شخصي مطالعې له لارې خپلو زده‌کړو ته دوام ورکړي؛ خو لا هم زرګونه نورې نجونې د زده‌کړو له حقه محرومې دي او ځینې حتی جبري ودونو ته اړ شوې دي.

رویټرز وايي، د وینزویلا چارواکو د پخواني ولسمشر نیکولاس مادورو نږدې متحد او سوداګر الیکس ساب امریکا ته سپارلی دی.

د وینزویلا د کډوالۍ ادارې (SAIME) ویلي، الیکس ساب د امریکا او وینزویلا د ګډو عملیاتو پر مهال په فبرورۍ میاشت کې په کاراکاس کې نیول شوی و.

نوموړی مخکې هم په ۲۰۲۰ کال کې د «کېپ ورد» په هېواد کې نیول شوی او امریکا کې د بډو او فساد په تور زنداني شوی و.

راپور کې راغلي، چې الیکس ساب په ۲۰۲۳ کال کې د بندیانو د تبادلې په ترڅ کې بښل شوی و، خو اوس بیا امریکا ته لېږدول شوی دی.

امریکايي سرچینې وایي، نوموړی ښايي د مادورو پر ضد د جنایي دوسیې لپاره مهم معلومات ورکړي.

همداراز، نیکولاس مادورو او د هغه مېرمن سیلیا فلوریس هم په نیویارک کې د مخدره توکو د قاچاق او نورو جرمونو له تورونو سره مخ دي، خو دواړه دغه تورونه ردوي.