طالبانو حکومت تر واک لاندې د کابل ښار لسمې امنیتي حوزې پولیسو د هکرانو هغه درې کسیزه ډله نیولې چې د خلکو شخصي واټساپ اپلیکیشنونه به یې هک کول.
د یادې حوزې جنایي مدیر عبدالرحمن مخلص ویلي چې دغې ډلې به د خلکو شخصي واټساپ اپلیکیشنونه او نور ورته حسابونه هک کول او د کورنیو د شخصي عکسونو او ویډوګانو تر ترلاسه کولو وروسته به یې ترې د پیسو غوښتنې کولې.
یاد هکران د لسمې امنیتي حوزې مربوطاتو کې نیول شوي.
مسولینو ویلي چې له یادو هکرانو څیړنې روانې دي.
د هېواد پخواني ولسمشر حامد کرزي د نومبر ۲۰مه د ماشوم د نړیوالې ورځې په مناسبت ویلي چې ماشومان د هېواد راتلونکی جوړوي او تر ټولو ډېر پاملرنې او ملاتړ ته اړتیا لري.
کرزي ویلي چې د هېواد د روښانه راتلونکي لپاره باید ماشومانو ته د زدهکړې، تخصص او مهارتونو د ترلاسه کولو بشپړ فرصت ورکړل شي.
هغه ټینګار کړی چې زدهکړه د هر ماشوم حق دی او د ټولنې اړتیا هم ګڼل کېږي.
د هغه په وینا، ټولنه هغه مهال پرمختګ کولی شي چې د خپلو ماشومانو د تعلیم او روزنې له لارې متخصص بشري ځواک وروزي.
کرزي یو ځل بیا غوښتنه کړې چې د نجونو او هلکانو لپاره دې ژر تر ژره ټولې ښوونیزې دروازې، په ځانګړي ډول مکتبونه او پوهنتونونه، پرانستل شي څو د ټولو ماشومانو د زدهکړې په برابر فرصت سره د هېواد د پرمختګ او ودې زمینه برابره شي.
د طالبانو حکومت د لوړو زدهکړو وزیر شیخ ندا محمد ندیم وایي چې عصري علوم د بشري ژوند مهمه اړتیا ده او د هېواد پرمختګ له همدې علومو سره تړلی دی.
هغه د افغانستان ملي راډیو ټلوېزیون له لوري په خپور شوي غږیز پیغام کې زدهکوونکو ته ویلي چې اقتصاد، روغتیا، سوداګري او نور ټولې اړتیاوې په عصري علومو پورې تړلې دي او باید زدهکوونکي د فراغت وروسته د دیني پوهاوي ترڅنګ په قرآن کریم هم ښه پوه شي.
د یادونې ده چې د طالبانو حکومت کې د پوهنتونو پر ځای د مدرسو جوړولو ته ډېره پاملرنه شوې او مسلکي استادان له دندو لرې کړل شوي، چې د پوهنتونو علمي کچه یې ټیټه کړې ده.
اسراییل په جنوب لبنان کې تازه هوايي بریدونه کړي چې په نتیجه کې یو تن وژل شوی دی.
د اسراییلي پوځ په وینا، دغه عملیات د حزبالله د پوځي فعالیتونو د مخنیوي لپاره ترسره شوي او هغو سیمو ته متوجه وو چې ګومان کېده وسلې او مهمات پکې زېرمه شوي دي.
پوځ ادعا کوي چې حزبالله د تېر کال د اوربند له باوجود هڅه کوي خپل راکټي ځواک بېرته فعال کړي خو حزبالله دغه تورونه ردوي او وايي چې د اوربند شرایط یې مراعات کړي او د سرحد ساتنه د لبنان پوځ مسؤولیت دی.
د بریدونو له اعلان وروسته، د سرحدي کلیو اوسېدونکو سیمې پرې ایښې دي.
اسراییل څلور کلي د احتمالي برید هدف په توګه نښه کړي وو.
د امریکا د عدلیې وزارت وایي یو ۱۹ کلن افغان ځوان چې عبدالله حاجي زاده نومېږي د امریکا قانوني دایمي اقامت یې درلود، د وسلهوالو فعالیتونو په تړاو د ۱۵ کلونو په زندان محکوم شوی دی.
چارواکي وايي نوموړي هڅه کوله چې وسله او مهمات ترلاسه کړي، او پوهېده چې دا مهمات به د داعش ډلې د یوه احتمالي برید لپاره د امریکا د ټاکنو پر ورځ وکارول شي.
د عدلیې وزارت د معلوماتو له مخې، حاجيزاده او د هغه ۲۸ کلن افغان ملګری، ناصر احمد توحیدي، دوه کلاشینکوفونه او ۵۰۰ مرمۍ ترلاسه کړي وو.
دواړه په اکتوبر ۲۰۲۴ کې د استخباراتي څارنې وروسته نیول شوي وو.
وزارت زیاته کړې چې عبدالله حاجيزاده د ۲۰۲۵ کال د اپرېل په ۱۷مه په محکمه کې په خپلو تورونو اعتراف کړی.
د کورنیو چارو وزارت پخواني امنیتي مرستیال خوشحال سادات د پخواني والي حلیم فدایي څرګندونو ته په غبرګون کې ویلي:« که دغو والیانو خپلی دندی په ایمانداری ترسره کړی وی ځوانان او ولس به د حکومت په ضد نه دریدل او جگړه به نه وه. »
ښاغلي سادات فدایي ته ویلي:« د جمهوریت پیل نه تر سقوط پورې چې زما یادیږي حلیم فدایي والي وه. کله به میدان وردګ کې، کله خوست، پکتیا او لوگر کې تعینیدو.»
دغه پخواني جنرال حلیم فدایي ته ویلي چې:« امریکایي او افغان طیارو به د بمبارد نه مخکې ولایت مقام څخه وتسپ په وسیله اجازه اخیسته. پورته ولایاتو کې چې د هر چا کور بمبارد شوی وي حلیم فدایي دې ورته ځواب ورکړي.»
د پکتیا پخواني والي محمد حلیم فدایي د کورنیو چارو وزارت پر پخواني امنیتي مرستیال جنرال خوشال سادات سختې نیوکې کړي.
ښاغلي فدایي په خپل ایکس پاڼې جنرال خوشال سادات مخاطب کړی چې دا ډول غیر مسولانه څرګندونې د بې باکۍ او بې پروا څرګندونو زیږنده ده.
حلیم فدایي لیکلي:« د یوه جنرال له خولې دا ډول د تعصب او نفرت ډک انګریزي تصور ډېر خطرناک دی.»
دغه پخواني افغان سیاستوال ویلي:«غیر پښتنو ته د لنډغر اصطلاح مختص کول نهایت زیاته بېباکي او غیرمسؤلانه دریځ دی.»
ښاغلي فدایي ویلي:« طالبان د پښتنو استازي نه دي. د دوی سیاست پښتنو ته منسوبول ډېرې خطرناکې پایلې لري.»
په اسلام اباد کې د اروپايي اتحادیې سفیر ریمونداس کاروبلیس ویلي، چې د طالبانو څخه د پاکستان د ټي ټي پي پر سر د «جدي اقدام» غوښتنه د امنیتي حقیقتونو پر بنسټ ولاړه او د پام وړ ده.
کاروبلیس د یوې پاکستانۍ سره په مرکه کې ټینګار کړی چې اروپايي اتحادیه هر ډول ترهګري غندي او د هغه شواهدو په اړه چې اسلاماباد د افغانستان له خاورې د بریدونو په تړاو وړاندې کوي، باید د ډیپلوماسۍ له لارې بحث وشي.
هغه ویلي، چې د پاکستان او طالبانو حکومت ترمنځ روان کړکېچ یوازې د خبرو له لارې حل کېدای شي او اروپايي اتحادیه د ترکیې د منځګړیتوب هڅو ملاتړ کوي.
د اروپايي اتحادیې دغه استازی چې تازه یې د اسلاماباد د سفیر په توګه دنده پیل کړې، وایي لا هم ژر ده چې پرېکړه وشي طالبان د دوحې ژمنو ته څومره ژمن پاتې دي، ځکه چې اتحادیه د خپلواک ارزونې لپاره کافي معلومات نه لري.
تمه کېږي چې په نږدې اوونیو کې د پاکستان او اروپايي اتحادیې لوړپوړی ستراتیژیک ډیالوګ د دواړو لورو د بهرني سیاست مشرانو په مشرۍ ترسره شي.
د طالبانو حکومت مشر شیخ هبتالله اخندزاده په کندهار کې د فقهي مجالسو د مسوولینو او علماوو د دوه ورځني روزنیز سیمینار په وینا کې ویلي، چې علما باید د یو بل پر ضد مخالفت ونه کړي، حقایق پټ نه کړي او د خلکو ترمنځ د شخړو د ختمولو لپاره هڅې وکړي.
د طالبانو حکومت د ویاند مرستیال حمدالله فطرت په خپله ایکس پاڼه لیکلي، چې شیخ هبتالله علماوو ته سپارښتنه کړې چې د «امارت» د فرمانونو عملي کول دې لومړی په خپله شروع کړي او وروسته یې نورو ته ورسوي، څو خلک د هغوی له عمل څخه الهام واخلي.
د طالبانو حکومت د ریاستالوزرا اداري مرستیال مولوي عبدالسلام حنفي ویلي، چې له پاکستان سره روانې ستونزې باید د خبرو اترو او یوې منطقي حللارې له لارې هوارې شي.
هغه د پانګونې د جذب په اړه په یوې غونډه کې ټینګار کړی چې جګړه د هېڅ لوري په ګټه نه ده او هېوادونه باید د متقابل درناوي پر بنسټ اړیکې ولري.
حنفي ویلي، طالبان پر هېچا برید نه کوي؛.خو که پرې برید وشي، د ځواب حق لري.
دا څرګندونې په داسې وخت کې کېږي چې د طالبانو حکومت او پاکستان اړیکې تر شخړې وروسته ترینګلې شوي او سوداګري یې په ټپه درېدلې ده.