د طالبانو حکومت د ملي دفاع وزارت ویلي، د پاکستان د وروستیو بریدونو په غبرګون کې د مشرقي زون اړوند د کونړ او ننګرهار ولایتونو پر پوله د ډیورنډ فرضي کرښې په اوږدو کې افغان دفاعي ځواکونو د پاکستان پر یوې پوځي پوستې برید کړی او هغه یې نیولې ده.
د یاد وزارت د معلوماتو له مخې، په دې عملیاتو کې ۱۴ پاکستاني پوځیان وژل شوي او ۱۱ نور ټپیان دي.
همدارنګه وزارت زیاته کړې، چې یو زرهدار ټانک او یو انټرنیشنل پوځي موټر هم په بشپړ ډول ویجاړ شوي دي.
د کونړ ولایت ځايي چارواکي وایي چې د تېرو ۴۸ ساعتونو په موده کې د پاکستان له لوري د دې ولایت پر بېلابېلو سرحدي ولسوالیو لسګونه توغوندیز او توپچي بریدونه ترسره شوي دي.
د کونړ د اطلاعاتو او کلتور ریاست د معلوماتو له مخې، په دغو بریدونو کې تر ۲۷۰ زیات توغوندي او د توپ مرمۍ توغول شوې دي.
چارواکي زیاتوي چې د بریدونو له امله د استوګنې یو شمېر کورونه او ودانۍ زیانمنې شوې دي.
تر اوسه د دې بریدونو له امله د مرګ ژوبلې راپور نه دی ورکړل شوی، خو د سیمې اوسېدونکي د دوامداره بریدونو له امله له جدي اندېښنو سره مخ دي.
د افغانستان د ولسي جرګې پخوانۍ غړې انارکلي هنریار د پاکستان وروستي هوايي بریدونه پر افغان خاوره په سختو ټکو غندلي دي.
نوموړې ویلي چې په دغو بریدونو کې ملکي وګړي په نښه کېږي او دا عمل د بشریت ضد جنایت او د نړیوالو بشري اصولو خلاف دی.
هنریار زیاته کړې چې پاکستان تل بېدفاع افغانان په نښه کړي او حتی د روژې په مبارکه میاشت کې یې د خلکو عادي ژوند ګډوډ کړی دی.
هغې همداراز ټینګار کړی چې پاکستان تر اوسه د افغانستان لپاره د یوه ښه او باوري ګاونډي په توګه نه دی ثابت شوی.
اسلام اباد کې د طالبانو حکومت پخوانی سفیر مولوي عبدالسلام ضعیف وایي پاکستان باید اوس پوه شوی وي چې د افغانستان له لوري متقابل ځواب ښيي چې د جګړې دوام به په پای کې د پاکستان په زیان تمام شي.
نوموړي ویلي، که تاوتریخوالی همداسې دوام وکړي؛ نو د جګړې لمبې به ورو ورو د پاکستان تر امن دروازو هم ورسېږي او دا به د هغوی لپاره درانه زیانونه ولري.
ضعیف زیاته کړې چې د امریکا د پروژې د ګټو په پرتله به د پاکستان تاوان څو چنده زیات وي او په پای کې به د خپل بادار په خوشحالولو کې هم پاتې راشي.
د امریکا ولسمشر ډونالډ ټرمپ وایي هغه هوکړه چې تهران یې غواړي د منلو وړ نه ده او باید هر ډول احتمالي توافق د امریکا له ملي ګټو او امنیت سره په ټکر کې نه وي.
ټرمپ په خپل پیغام کې د رسنیو پر راپورونو هم نیوکه کړې او ادعا یې کړې چې ځینې رسنۍ د ایران پر وړاندې د امریکا د پوځ د عملیاتو د اغېزو په اړه بشپړ معلومات نه خپروي.
نوموړي ټینګار کړی چې ایران سخت زیانمن شوی او د هوکړې غوښتنه کوي؛ خو د ده په وینا هر ډول راتلونکی توافق باید د امریکا د ګټو له مخې وشي.
الجزیرې خبري شبکې راپور ورکړی چې د امریکا د بهرنیو چارو وزارت د جمعې ناوخته اعلان کړی چې په عمان کې دې له بېړنیو کارکوونکو پرته نور امریکايي دولتي کارکوونکي او د هغوی د کورنیو غړي د امنیتي خطرونو له امله له دغه هېواده ووځي.
بل لور ته د سعودي عربستان د دفاع وزارت ویلي چې د هېواد په شمال کې د الجوف په سیمه کې یې یوه بېپیلوټه الوتکه شنډه او له منځه وړې ده.
تر اوسه څرګنده نه ده چې دغه ډرون د کوم هېواد له لوري توغول شوې وه.
د پخواني ولسمشر حامد کرزي د حکومت ویاند ایمل فیضي کابل کې له مېشتو ډیپلوماټانو غوښتي چې د پاکستان د وروستیو هوايي بریدونو په اړه چوپ پاتې نه شي.
نوموړي ویلي چې د پاکستان پوځ د افغانستان پر خاوره بریدونه کوي او د ملګرو ملتونو راپورونه ښيي چې په دغو بریدونو کې زیاتره ملکي وګړي، د ښځو او ماشومانو په ګډون، قرباني کېږي.
فیضي زیاته کړې چې دا بریدونه د ترهګرو ډلو پر ضد نه دي، بلکې د ملکي خلکو د مرګژوبلې لامل ګرځي، او نړیواله ټولنه باید د دې پېښو په اړه غږ پورته کړي.
هغه له ډیپلوماټانو غوښتي چې د افغانستان دننه، بهر او د ملګرو ملتونو په کچه د دې موضوع په اړه دریځ ونیسي او د احتمالي جګړهییزو جرمونو د ثبت غوښتنه وکړي.
د پخواني ولسمشر حامد کرزي د دفتر رییس کریم خرم وایي چې پاکستان لا هم د افغانستان پر وړاندې خپلو بمباریو ته دوام ورکوي او د ملکي وګړو د وژل کېدو او د بېلابېلو تأسیساتو د ویجاړېدو لامل ګرځي.
نوموړي ویلي چې د نړیوالو چوپتیا، د ملګرو ملتونو انفعالي دریځ او د افغانستان انزوا پاکستان ته دا جرأت ورکړی چې حتی پر کابل هم بریدونه وکړي.
خرم همداراز ټینګار کړی چې په داسې حساسو شرایطو کې باید له افغان ملت سره مهمې مسلې شریکې شي او د هغوی مشوره واخیستل شي، ځکه د ده په وینا هېڅ حکومت یوازې د داسې سترو ستونزو د حل توان نه لري.
هغه وړاندیز کړی چې د هېواد د مهمو پرېکړو لپاره دې دودیزه ملي جرګه، یعنې لویه جرګه، راوبلل شي څو د هغې د سپارښتنو پر بنسټ سترې پرېکړې وشي.
د جمهوري نظام د اطلاعاتو او کلتور وزارت پخوانی مرستیال هارون حکيمي وایي چې هېڅ باوجدانه انسان، حتی باوجدانه پاکستانی هم نه شي کولای پر افغانستان د پاکستان وروستي بریدونه توجیه کړي.
نوموړي په عین حال کې ټینګار کړی چې د نجونو پر زده کړو او د ښځو پر حقونو اوسني بندیزونه افغانستان ته تر بهرنیو بریدونو هم زیات زیان رسوي.
حکیمي ویلي چې د نوي ښوونیز کال له پیل سره باید د نجونو او مېرمنو پر مخ د ښوونځیو او پوهنتونونو دروازې پرانستل شي او د هغوی حقونو ته درناوی وشي.
اسلام اباد کې د افغانستان پخوانی سفیر نجیب الله عليخېل وایي چې د پاکستان وروستۍ بمبارۍ د تعجب وړ نه دي، بلکې د هغه هېواد د اوږدمهاله سیاست دوام دی چې یوازې یې وسایل بدل شوي دي.
هغه ویلي چې پاکستان پخوا د بېلابېلو ډلو له لارې په افغانستان کې خپل اهداف تعقیبول، خو اوس د بمباریو له لارې هماغه تګلاره مخ ته وړي.
عليخېل ټینګار کړی چې د جګړو او کړکېچونو پر وړاندې د افغانستان د بریا یوازینۍ لاره ملي یووالی، ډیپلوماتیکې هڅې او پیاوړي رسنیز فعالیتونه دي، څو هېواد وکولای شي له خپلو ارزښتونو او ملي ګټو دفاع وکړي.
نوموړي همداراز ویلي، که افغانان د خپلو ملي ګټو پر بنسټ یووالي ته ورسېږي او هېواد پیاوړی شي، نو هېڅ ګاونډی یا بل هېواد به د افغانستان پر وړاندې د یرغل جرئت ونه کړي.