د چارو ادارې پخواني مشر ډاکتر فضل محمود فضلي په یوه لیکنه کې د مقاومت په نوم د جبهې په غړو سختې نیوکې کړي.

ښاغلي فضلي لیکلي:«‏د “غتو، غتو بمونو…” د روایت جوړونکې جبهې دوو پخوانیو ویندویانو د خپل پخواني عادت سره سم، د پاکستان د پوځ لخوا پر افغان خاوره د پراخو او شدیدو بریدونو هرکلی او ملاتړ کړی.»

ښاغلي فضلي وړاندې لیکلي:«‏د پردیو وسلو او ځواک پر مټ د افغانستان د ستونزې د حل غوښتونکې ډلې ټپلې، په عین حال کې هویتي حربه هم کاروي؛ همدا هویتي پروژه او د پردیو په زور پر جګړې ټینګار، د پردیو د پلان او زموږ د بربادۍ اساسي عناصر دي.»

د چارو ادارې پخواني مشر د طالبانو په حکومت نیوکه کړې او غوښتي یې دي چې: « که شخړه مو ظاهري نه وي نو سمدستي راولپېنډۍ سره خپلې ټولی پخوانۍ اړیکې وغندي، ولس ته د مشروعیت د ترلاسه کولو لپاره مراجعه وکړي او د ښځو او نجونو پر مخ د زده‌کړو او کار دروازې پرانیزي. »

فضل فضلي ویلي:«هغه چې د پاکستان د بریدونو ملاتړ کوي او پرله‌پسې اسلام‌آباد ته سفرونه کوي، او بله پر هېواد حاکمه ډله، دواړه نیابتي جوړښتونه دي. د دوی تر منځ اختلاف پر واک دی، نه پر اصولو»

د حماس یوې لوړپوړې سرچینې ویلي چې که د اسراییلو جګړه پای ته ورسېږي، دغه ډله چمتو ده خپلې وسلې د راتلونکې فلسطیني ادارې واک ته وسپاري.

د حماس د مرکچي ټیم مشر او د غزې مسئول خلیل الحیه څرګنده کړې: «کله چې اشغال ختم شي، موږ به خپلې وسلې نوي فلسطیني دولت ته وسپارو.»

دا په داسې حال کې ده چې اوس هم په غزه کې د اسراییلو له لورې هر وخت بریدونه ترسره کېږي او لسګونه کسان وژل کېږي.

د سوریې لنډ مهالي ولسمشر احمد الشرع د دوحې فورم په ۲۳مه غونډه کې اعلان وکړ چې په راتلونکو څلورو کلونو کې به په سوریه کې ولسمشریزې ټاکنې ترسره شي.

هغه وویل چې په اوسني حکومت کې ټولې ډلې ګډون لري او د مذهب او قومیت پر بنسټ د واک وېش لویه تېروتنه ګڼي.

الشرع ټینګار وکړ چې ټاکنې د انتقالي پړاو له اصولو سره سم ترسره کېږي او د امریکا د بندیزونو د لرې کېدو په صورت کې به د سوریې اقتصادي وضعیت ښه شي.

هغه اسرائیل د سوریې پر خاوره د زرګونو بریدونو په ترسره کولو تورن کړ او وې ویل چې دا بریدونه د غزې جګړې له مسؤولیته د تېښتې هڅه ده.

د قطر د بهرنیو چارو وزارت ویاند، مجید بن محمد الانصاري، د دوحې فورم ۲۳مې غونډې پر مهال د افغانستان لپاره د اوزبیکستان له ځانګړي استازي عصمت‌الله ارګاشیف سره جلا ناسته کړې ده.

په دې لیدنه کې د دوحې او تاشکند ترمنځ د دوه اړخیزو اړیکو د پراختیا پر نويو لارو چارو خبرې شوې دي.

دواړو لورو د افغانستان اړوند وروستیو سیاسي او بشري تحولاتو ته هم کتنه کړې او ټینګار یې کړی چې د کابل په اړه باید همغږي، عملي او ګډ اقدامات پیاوړي شي، څو سیمه‌ییز ثبات او د افغانستان د خلکو ملاتړ تضمین شي.

په هند کې د ګوا ایالت د اراپور سیمې په یوه نایټ‌کلپ کې د اورلګېدنې له امله لږ تر لږه ۲۳ کسان وژل شوي دي.

د پولیسو په وینا، اور د شپې له یوه بجې وروسته بل شو او د ژغورنې ټیمونه سمدستي سیمې ته ورسېدل.

چارواکي وايي چې اور د کنټرول لاندې راوستل شوی او د پېښې د علت معلومولو لپاره څېړنې روانې دي.

په مسکو کې د طالبانو حکومت سفارت اعلان کړی، چې د روسیې د خېرسون سیمې والي، ولادیمیر سالدو، افغانستان ته د غنمو او نورو کرنیزو محصولاتو د صادراتو لپاره خپل چمتو والی اعلان کړی دی.

دا څرګندونې د «Dom Tauricheskiy» په نړیوال اقتصادي او پانګونې فورم کې شوي، چې پکې د طالبانو حکومت سفیر مولوي ګل حسن حسن هم ګډون درلود.

ګل حسن حسن د دغه وړاندیز هرکلی کړی او د دواړو هېوادونو ترمنځ د سوداګریزو اړیکو د پراخېدو، د وارداتو او صادراتو د لارو د پیاوړتیا او د اقتصادي همکاریو د ژورتیا پر اهمیت یې ټینګار کړی.

سفارت زیاته کړې، ورته فورمونه د افغانستان او روسیې ترمنځ د اوږدمهاله سوداګریزو همکاریو لپاره نوې زمینې برابروي.

جمهوري حکومت کې د ملي دفاع وزارت سرپرست شاه محمود میاخېل « د افغانستان د سولې او ولسواکۍ ملي نهضت» په سیمنار کې ویلي، چې د څلورو لسیزو جګړو پاکستان ته زمینې برابرې کړې چې د ډیورند د فرضي کرښې په اوږدو کې په ګڼو برخو کې تر پخوا ډېر افغانستان ته ننوځي، پوستې او چیک‌پاینټونه جوړ کړي، اغزن تار ولګوي او پوځي استحکامات ټینګ کړي.

هغه وایي، دا وضعیت د تېر حکومت د کمزورۍ پایله وه؛ خو دا په هیچا د ډیورند کرښې د رسمي منلو معنی نه لري او نه کوم پټ توافق شوی دی.

میاخیل زیاتوي چې د ډیورند د فرضي کرښې په اړه پرېکړه د دواړو خواوو د ولسونو حق دی او تر اوسه هغه شرایط نه دي برابر شوي چې ولسونه په ازاده توګه خپلې پرېکړې وکړي.

میاخیل ټینګار کوي چې دا داعیه د افغانانو له منځه نه شي لرې کېدای تر څو چې خلکو خپله وروستۍ فیصله نه وي کړې.

هغه دا هم څرګنده کړې چې د اغزن تار، بارډر منېجمېنټ او ورته نورو موضوعاتو په اړه د جمهوریت په دوره کې له پاکستان سره هېڅ پټه معاهده نه ده لاسلیک شوې، او که داسې کوم سند وای؛ نو پاکستان به حتماً هغه خپور کړی وو.

جمهوري حکومت کې د ملي دفاع وزارت سرپرست شاه محمود میاخېل « د افغانستان د سولې او ولسواکۍ ملي نهضت» په سیمنار کې ویلي چې ملي ګټې د هر سیاسي اختلاف نه لوړې دي او د هېواد له تمامیت ارضي او استقلال څخه دفاع د هر افغان ګډ مسوولیت دی.

ښاغلي میاخیل د پاکستان د وروستیو هوایي بریدونو غندنه کړې او ویلي چې د پاکستان مخالفت د طالبانو ملاتړ نه دی، بلکې د ملي حاکمیت دفاع ده.

هغه د افغانستان او پاکستان ستونزې تاریخي او ژورې بللې او ټینګار یې کړی چې پاکستان د ستراتیژیک عمق له پالیسیو لاس نه دی اخیستی او لا هم په افغانستان کې د ضعیف حکومت ملاتړ کوي.

میاخیل طالبان د داخلي او نړیوال مشروعیت د نشتوالي مسؤل وبلل او خبرداری یې ورکړی چې که د حل لار ونه موندل شي، د سیمې هېوادونه به په افغانستان کې د باثباته بدیل د نشتوالي له امله طالبان د تعامل لپاره انتخاب کړي.

هغه د جګړې پر ځای د واقعي لویې جرګې د رابللو غوښتنه کړې او ویلي چې د افغانستان راتلونکې باید د ملي تفاهم له لارې وټاکل شي، ځکه جګړه او انحصاري واک دواړه هېواد د نوو بحرانونو پر لوري بیايي.

د ترکیې د بهرنیو چارو وزیر هاکان فیدان ویلي، یوازینۍ عملي لاره د اوکراین جګړې د پای ته رسولو لپاره د صادقانه او قاطع خبرو اترو پیل دی.

هغه په دوحه کې یوې ناستې ته ویلي چې په دې بهیر کې د امریکا منځګړیتوب د بریا لوړ چانس لري.

فیدان ټینګار کړی چې اروپا باید د امریکا د مستقیم ګډون د نشتون په صورت کې د خپل مقاومت د پیاوړتیا لپاره نوې حل لارې ولټوي.

د هغه په وینا، د جګړې پر مهال هم د خبرو دوام اړین دی او که څه هم خبرې سمدلاسه جګړه نه دروي، خو د اړخونو او سیمه‌ییزو هېوادونو لپاره مهم فرصتونه برابروي.

د طالبانو حکومت د نشه‌يي توکو پر ضد د مبارزې معین عبدالرحمن منیر د منځنۍ آسیا د هېوادونو د سیمه‌ییز معلوماتي او همغږۍ غونډې په ناستې کې ګډون کړی.

منیر په دې ناسته کې ویلي، چې په افغانستان کې د نشه‌يي توکو کر او قاچاق نږدې له منځه تللی او دا هڅې یې یو مهم پرمختګ بللی.

هغه له ګډونوالو هېوادونو څخه د ګډو همکاریو د پیاوړتیا غوښتنه کړې او دغه راز یې د افغان کروندګرو د بدیل معیشت لپاره د ملاتړ پر اړتیا ټینګار کړی.