د وال سټرېټ ژورنال د راپور له مخې، د هند مرکزي بانک د ایران روان کړکېچ له امله اقتصادي اندېښنو ته په پام سره، د پخوا په څېر د سود کچه په ۵.۲۵ سلنه ثابته ساتلې.

راپور وایي، د منځني ختیځ ناآرامیو د هند پر اقتصاد اغېز کړی، د روپۍ ارزښت یې کم شوی او د تېلو بیې لوړې شوې دي. له همدې امله د دغه هېواد مرکزي بانک د پر اقتصاد نور فشارونه هم زیات شي.

خو د هند مرکزي بانک ټینګار کړی چې اقتصادي بنسټونه لا هم پیاوړي دي، خو که د ایران کړکېچ او د انرژۍ د بیو بې ‌ثباتي دوام ومومي، نو په راتلونکو میاشتو کې به د دوی پر اقتصاد نور فشارونه هم زیات شي.

د پاکستان د کورنیو چارو وزیر محسن نقوي د قرغزستان په پلازمېنه بیشکک کې د ایران د کورنیو چارو له وزیر اسکندر مومني سره لیدلي.

د پاکستاني دولتي رسنیو د راپورونو له مخې، دواړو لوریو په دې کتنه کې د ایران او پاکستان پر دوه اړخیزو اړیکو، سیمه‌ییزو تحولاتو، کورنیو امنیتي مسایلو او د کړکېچونو د کمولو لپاره پر روانو هڅو خبرې کړې.

دواړو وزیرانو د ایران او پاکستان ترمنځ د ډیپلوماټیکو اړیکو او خبرو اترو پر دوام ټینګار کړی او د سیمې د تلپاتې سولې او ثبات لپاره یې د ګډو هڅو د ملاتړ ژمنه بیا تازه کړې.

د راپور له مخې، د امنیتي ننګونو پر وړاندې د مبارزې لپاره دوه اړخیزې همکارۍ او سیمه‌ییزه همغږي د دغو خبرو له مهمو محورونو څخه وو.

دا لیدنه داسې مهال ترسره کېږي چې تر دې وړاندې ځینو رسنیو راپور ورکړی و چې محسن نقوي ښایي د اسلام‌اباد له لوري د تهران او واشنګټن ترمنځ د منځګړیتوب د هڅو په چوکاټ کې ایران ته هم سفر وکړي.

سرچینې وایي چې د طالبانو د حکومت او پاکستان استازو د ازبکستان په سرحدي ښار ترمذ کې یوه غیررسمي ناسته کړې، چې د ازبکستان د حکومت په منځګړیتوب او غوښتنه ترسره شوې ده.

د معلوماتو له مخې، په دې غونډه کې د دواړو لوریو استازو د دوه اړخیزو اړیکو او روانو امنیتي اندېښنو په اړه نظرونه تبادله کړي، خو د خبرو د دقیقو موضوعاتو په اړه معلومات نه دي خپاره شوي.

ویل کېږي چې د پاکستان له لوري په کابل کې پخواني سفیر منصور خان او څېړونکې ډاکټر امینه خان ګډون کړی و، په داسې حال کې چې د طالبانو حکومت استازیتوب ذاکر جلالي او غنچه ګل ارمان کړی دی.

دا ناسته په داسې وخت کې ترسره کېږي چې د اسلام‌اباد او کابل ترمنځ اړیکې د سرحدي ستونزو او امنیتي تورونو له امله ترینګلې شوې دي.

پاکستان پرله‌پسې ادعا کوي چې د دغه هېواد پر ضد وسله‌وال بریدونه له افغان خاورې تنظیمېږي، خو د طالبانو حکومت دا تورونه په کلکه ردوي.

ترمذ چې په وروستیو کلونو کې د افغانستان اړوند سیمه‌ییزو غونډو مهم مرکز ګرځېدلی، دا ځل هم د دواړو لوریو د استازو د لیدنې کوربه و.

تر اوسه د طالبانو حکومت او پاکستان د دې لیدنې په اړه رسمي دریځ نه دی څرګند کړی.

د هند د اترپردېش ایالت په غازي‌آباد ښار کې د یوې ځوانې ښځې مړی د یوه هوټل په خونه کې موندل شوی دی.

د هندي رسنیو د راپورونو له مخې، د یادې ښځې جسد د هوټل په خونه کې په ځړول شوي حالت کې موندل شوی او پولیسو د پېښې په اړه پلټنې پیل کړې دي.

چارواکو تر اوسه د مړینې د لامل او د پېښې د څرنګوالي په اړه بشپړ معلومات نه دي ورکړي، خو وایي چې د قضیې ټول اړخونه تر څېړنې لاندې دي.

د ښځې هویت او د پېښې نور جزئیات به د پلټنو له بشپړېدو وروسته څرګند شي.

د روسیې ولسمشر ولادیمیر پوتین ویلي چې هېواد یې چمتو دی له هند سره د سو-۵۷ پنځم نسل پټې (سټیلت) جنګي الوتکې په ګډه پراخه او تولید کړي او اړوند مهمې ټکنالوژۍ هم ورسره شریکې کړي.

پوتین دغه څرګندونې په داسې حال کې کړې چې د هند هوايي ځواک د پنځم نسل جنګي الوتکو د ترلاسه کولو په لټه کې دی.

اوس مهال د هند هوايي ځواک د پنځم نسل جنګي الوتکې نه لري.

د راپورونو له مخې، د پاکستان له خوا د چین د J-35AE سټیلت جنګي الوتکو د احتمالي ترلاسه کولو اټکلونو په هند کې اندېښنې زیاتې کړې دي.

بل لور ته، د هند د کورني پنځم نسل جنګي الوتکې پروژه، چې د «پرمختللې منځنۍ جنګي الوتکې» (AMCA) په نوم یادیږي، لا هم د پراختیا په پړاو کې ده او تمه کېږي د ۲۰۳۰مې لسیزې په منځنیو کلونو کې خدمت ته داخل شي.

د روسیې دا وړاندیز د هند د هوايي ځواک د عصري کولو په لړ کې یو مهم پرمختګ بلل کېږي، خو تر اوسه د نوي ډیلي له لوري په دې اړه رسمي پرېکړه نه ده اعلان شوې.

پاکستانی خبریال او شننونکی طاهر خان وایي، د طالبانو حکومت له پاکستان سره د یوې احتمالې هوکړې لپاره پر ځینو ټکو او نومونو نرم شوی.

نوموړي له یوې خصوصي رسنۍ سره په مرکه کې ویلي، د طالبانو حکومت دا منلې چې که له پاکستان سره کومه هوکړه لیکل کیږي نو د وسله والو ډلو پر ځای په صریحو ټکو د پاکستاني طالبانو تحریک یا ټي ټي پي ولیکي.

طاهر خان وایي، تر دې وړاندې طالبان په همدې نوم له پاکستان سره جوړ نه راتلل او غوښتل یې عمومي وسله والې ډلې ولیکي.

د طاهر خان په وینا، اوس پاکستان د طالبانو له حکومت دا هم غواړي چې ټي ټي پي د ترهګرې او خوارجې ډلې په توګه یاده کړي خو طالبان داسې څه ورسره نه مني.

نوموړي همداراز ویلي چې احتمال لري د طالبانو حکومت او پاکستان استازي په تاشکند کې د ترمذ ډیالوګ په څنډه کې غیر ‏رسمي لیدنه وکړي، خو تراوسه دواړو لوریو په دې اړه څه نه دي ویلي.

د پاکستان د جمعیت علمای اسلام ګوند مشر مولانا فضل الرحمن وایي، پاکستان ته په افغانستان کې د ترهګرو ډلو مرکزونه ښکاري خو په پښتونخوا کې ورته نه ښکاري.

فضل الرحمن بلوچستان کې یوې ولسي غونډې ته ویلي، پاکستاني چارواکي افغانستان باندې بریدونه په دې توجیه کوي چې هلته د ترهګرو ډلو مرکزونه دي نو ترهګرو خو بنو کې له پاکستاني پوځ پوستې ونیولې، پوځي مرکزونه یې ونیول او بریدونه یې پرې وکړل.

نوموړي پاکستاني چارواکو ته په خطاب په ټینګار سره ویلي، چې تاسو په خپل وطن کې ترهګر نه ګورئ، مرکزونه یې نه ګورئ او په افغانستان کې بریدونه کوئ ځکه هلته یې ګورئ.

د پاکستان جمعیت علمای اسلام ګوند مشر مولانا فضل الرحمن دا څرګندونې په داسې حال کې کوي چې پاکستان په دې وروستیو کې له سختې ناامنۍ سره لاس او ګرېوان دی او د ترهګرو په نوم په افغانستان کې پر ملکي وګړو بریدونه کوي.

د روسیې ولسمشر ولادیمیر پوتین، ویلي چې مسکو له تهران سره د نږدې اړیکو له امله د ایران د کړکېچ په حل کې رغنده رول لوبولی شي.

نوموړي زیاته کړې چې روسیه چمتو ده د ایران غني شوی یورانیم انتقال کړي او د هرې هغې حل‌لارې ملاتړ کوي چې د تاوتریخوالي د کمېدو لامل شي.

پوتین همداراز ټینګار کړی چې د ایران د خلکو ګټې باید په هر ډول حل‌لاره کې په پام کې ونیول شي

لبنان او اسرائیل ترمنځ د امریکا په منځګړیتوب د نوي اوربند د پلي کېدو هڅې روانې دي، خو حزب‌الله د دې تړون مخالفت کړی او ویلي یې دي چې د تړون ځینې شرطونه د لبنان د ګټو خلاف دي.

د راپورونو له مخې، د اوربند وړاندیز د جنوبي لبنان په ځینو سیمو کې د دولتي ځواکونو د پراخ حضور غوښتنه کوي.

د لبنان ولسمشر د اوربند ملاتړ کړی او دا یې د اوږدمهاله ثبات لپاره مهم فرصت بللی دی، خو حزب‌الله ټینګار کوي چې تر هغه به خپل دریځ بدل نه کړي څو د اسرائیلي ځواکونو حضور او بریدونه پای ته نه وي رسېدلي.

په همدې حال کې، په جنوبي لبنان کې امنیتي وضعیت لا هم نازک دی او د متقابلو بریدونو راپورونه ورکول کېږي.

نړیوالې ټولنې د دواړو لورو څخه غوښتي چې تاوتریخوالی کم کړي او د سیاسي حل لارې لپاره زمینه برابره کړي.

د اوکراین ولسمشر ولادیمیر زلنسکي په یوه پرانیستي لیک کې د روسیې ولسمشر ولادیمیر پوتین ته د مخامخ خبرو وړاندیز کړی او له هغه یې غوښتي چې د دواړو هېوادونو ترمنځ روانه جګړه پای ته ورسوي.

هغه ویلي چې مهمې سیاسي او پوځي ستونزې د دواړو هېوادونو د مشرانو ترمنځ د مستقیمو مذاکراتو له لارې حل کېدای شي.

د نړیوالو رسنیو د راپورونو له مخې، زېلېنسکي وړاندیز کړی چې خبرې اترې دې په یوه بې‌طرفه هېواد کې ترسره شي او له مذاکراتو سره هممهاله دې اوربند هم اعلان شي.

نوموړي د بندیانو د تبادلې او د جګړې له امله د اغېزمنو شویو ملکیانو د بېرته ستنېدو غوښتنه هم کړې ده.

بل لور ته، روسیې لا تر اوسه د دې وړاندیز په اړه وروستۍ پرېکړه نه ده کړې، خو مسکو ویلي چې د سولې او امنیتي موضوعاتو په اړه خبرې لا هم روانې دي.

شنونکي باور لري چې د جګړې د اوږدېدو له امله پر دواړو هېوادونو سیاسي او اقتصادي فشارونه زیات شوي او د سولې هره نوې هڅه نړیوال اهمیت لري.

دا وړاندیز داسې مهال مطرح کېږي چې په جګړه ځپلو سیمو کې نښتې لا هم دوام لري، خو نړیواله ټولنه هیله لري چې د مستقیمو خبرو له لارې به د جګړې د پای ته رسولو لپاره یو عملي چوکاټ رامنځته شي.