رویټرز ویلي چې نن سهار د وینزویلا پلازمېنه کاراکاس کې د الوتکو غږونه اورېدل شوي او په اسمان کې لوګي لیدل شوي.

رویټرز د عیني شاهدانو له قوله ویلي، چې د ښار سویلي برخه، چې یوې لویې پوځي اډې ته نږدې ده، د پېښې په ترڅ کې د برېښنا له خدمت بې‌برخې شوې ده.

په ورته وخت کې د امریکا د بهرنیو چارو وزارت ویلي چې د وینزویلا وضعیت په نږدې توګه څاري او د خپلو اتباعو د خوندیتوب لپاره اقدامات کوي.

دا پېښه په داسې حال کې رامنځته شوې چې د امریکا ولسمشر ډونالډ ټرمپ په تکراري ډول د وینزویلا پر ضد د ځمکنيو پوځي عملیاتو ګواښونه کړي دي.

ملګرو ملتونو کې د امریکا استازي مایک والتز، د ایران د استازې په اعتراض لیک غبرګون کې ویلي، «د ایران حکومت هڅه کوي خپل دوامداره سرکوب او د خلکو ځپلو کړنې د نړیوالې ټولنې له نظره پې کړي، خو دا به امکان ونه لري.»

والتز په څرګنده ډول ټینګار کړی چې «امریکا او ټرمپ د هغو ایرانیانو تر څنګ ولاړ دي چې د آزادۍ غوښتونکي دي او د خپلو حقونو لپاره مظاهره کوي.»

له دې وړاندې د ملګرو ملتونو امنیت شورا ته د ایران استازي امیر سعید ایرواني شکایت کړی و، او ټرمپ ته یې د داخلي اعتراضونو په اړه د امریکا خبرداری انتقاد کړی و.

په امریکا کې د پاکستان سفیر رضوان سعید شیخ ویلي، چې پاکستان کې دننه له وسله والو ډلو څخه د جګړې په بریا سره د پاکستان نړیوال مقام لوړ شوی دی.

نوموړي ویلي، داسې موقف چې پاکستان په نړیواله کچه ترلاسه کړی، مخکې نه و.

رضوان شیخ له واشنګټن مېډیا سره د خبرو پر مهال ویلي چې تېر کال د پاکستان او امریکا اړیکو کې د پام وړ ښه والی راغلی، د دواړو هېوادونو د لوړپوړو مشرانو ترمنځ څو مهمې ناستې جوړې شوې، او د دې بریالۍ سفارت‌کارۍ کریډیټ د پاکستان د مشرانو دی.

هغه زیاته کړې، چې له امریکا سره د پاکستان اوږدمهاله شراکت‌داري شته او په راتلونکي کې به د پاکستان او امریکا اړیکې لا نورې پیاوړې شي.

سفیر همدارنګه ویلي، چې پاکستان تل د نړیوال امنیت لپاره خپل رول ادا کړی او د پاکستان-امریکا شراکت‌داري د نړیوالې سولې او ثبات لپاره مهمه ده.

د پاکستان د سند ایالت د جامشورو ولسوالۍ په سیهوان سیمه کې له یوه کور څخه درې ښځې تښتول شوي دي.

د پېښې شاته د خوښې واده اړوند اختلافات ښودل شوي، چې د کورنۍ او ټولنیزو شخړو له امله رامنځته شوي دي.

سیمه‌ییز چارواکي وایي، چې د پېښې دوه مشکوک کسان نیول شوي او د نورو د موندلو پلټنې روانې دي.

پخوانی طالب چارواکی سید اکبر اغا وایي، چې د شیخ الاسلام ابن تیمیه رحمه الله په وینا، د عربي ژبې زده کړه او تدریس یوه اجتماعي فریضه (فرض کفایه) ده.

هغه ویلي، موږ ته امر شوی چې د عربي ژبې قواعد وساتو او له هغوی څخه هر ډول انحرافات اصلاح کړو.

د اکبر اغا په خبره، نن سبا ډیری خلک د غربي ژبو زده کړو ته زیات متوجه دي.

نوموړي ټینګار کړی چې د عربي ژبې زده کړه او د اسلامي علومو درک د هر مسلمان لپاره ضروري دی.

ایران د ملګرو ملتونو امنیت شورا ته په رسمي لیک کې د امریکا د ولسمشر ډونالډ ټرمپ وروستۍ څرګندونې د زور د کارولو ښکاره ګواښ او د نړیوالو قوانینو سرغړونه بللې ده.

په ملګرو ملتونو کې د ایران دایمي استازي امیر سعید ایرواني ویلي، دا څرګندونې د ایران په کورنیو چارو کې مداخله ده او د تاوتریخوالي او ګډوډۍ د پارولو خطر لري.

تهران ټینګار کړی چې دا ګواښونه د امریکا د اوږدمهاله مداخلې د سیاست دوام دی او د ملګرو ملتونو د منشور له بنسټیزو اصولو سره په ټکر کې دي.

ایران له امنیت شورا غوښتي چې د امریکا دا دریځ په کلکه وغندي او واشنګټن دې د نړیوالو قوانینو درناوي ته اړ کړي.

په لیک کې همداراز راغلي چې ایران د خپل حاکمیت، ملي امنیت او ځمکنۍ بشپړتیا د دفاع قانوني حق لري او خبرداری ورکړل شوی چې د هر ډول احتمالي کړکېچ او پایلو بشپړ مسئولیت به د امریکا پر غاړه وي.

د لاهور د صنعت او تجارت خونې مشر فهیم‌الرحمان سهګل ویلي، د پاکستان او افغانستان ترمنځ د دروازو تړل کېدو له امله پنجاب ته هره میاشت شاوخوا ۳۸میلیاره کلدارې اقتصادي زیان رسیږي چې تر ټولو ډېر اغېزمن شوي صنعتونه د سمنټو او کرنیزو درملو جوړولو فابریکې دي.

نوموړي ویلي، شاوخوا ۳ زره سوداګر دواړو غاړو ته بند پاتې دي چې ۱۲۰۰ یې پاکستانیان او ۱۸۰۰ افغانان دي.

سهګل ټینګار کړی چې د پاکستان د صادراتو ډېره برخه د افغان سرحد له لارې منځنۍ اسیا ته لېږدول کېږي او د سوداګرۍ بندېدو سره ملي اقتصاد او د خلکو عایدات زیانمن شوي دي.

هغه د دواړو هېوادونو له حکومتونو غوښتي چې د خبرو اترو له لارې سوداګریزې لارې ژر پرانیزي.

سهګل دغه راز ویلي، چې د ګاونډیو هېوادونو ترمنځ سوداګري د پاکستان د صادراتو مهمه برخه جوړوي چې کلنی حجم یې شاوخوا ۲.۵ اربه ډالرو ته رسېږي.

د خیبر پښتونخوا اعلی وزیر سهیل آفریدی ویلي، چې له اسټېبلشمنټ سره د ایالتي معاملو په اړه د خبرو اترو او د اړیکو د ښه کولو لپاره تیار دی.

نوموړي دا څرګندونې په پېښور کې له خبریالانو سره د خبرو پر مهال کړې او ویلي، چې د پي ټي آی بنسټګر عمران خان ورته له اسټېبلشمنټ سره د خبرو کومه ځانګړې لارښوونه نه ده کړې، بلکې دا دنده یې محمود خان اڅکزي او علامه ناصر عباس ته سپارلې ده.

هغه زیاته کړې چې حکومت، پوځ او ټول اړخونه باید د ولسي ګټو له مخې ګډې پالیسۍ جوړې کړي.

هغه دغه راز ویلي، که کومه رسمي غونډه یا مناسبت رامنځته شي؛ نو د پوځ له مشر عاصم منیر سره به حتماً لیدنه وکړي.

نوموړي ټینګار کړی چې په هېواد کې باید اساسي قانون او د قانون حاکمیت ټینګ وي او د عمران خان د خوشې کېدو لپاره مناسبه سیاسي فضا رامنځته شي.

سهیل آفریدي د عمران خان د خویندو د سیاسي فعالیت ملاتړ کړی او ویلي چې د ورور د خوشې کېدو لپاره د هغوی هڅې روا دي.

هغه دا هم منلې چې د لاهور د سفر پر مهال یې له نامناسبې ژبې کار اخیستی و؛خو دا یې د غبرګون نتیجه بللې او پر دې یې بخښنه غوښتې.

په ایران کې د افغانستان پخواني سفیر عبدالغفور لېوال وايي، د پښتو ژبې ریښتینی درناوی یوازې د بهرنیو ښارونو د چارواکو په یادونو نه پوره کېږي، بلکې باید دا ژبه د خپل وطن په ښوونځیو، پوهنتونونو، څېړنیزو مرکزونو، رسمي ادارو، سوداګرۍ او رسنیو کې پیاوړې شي.

لېوال ټینګار کړی چې پښتو باید د علم، ساینس، ټکنالوژۍ او معیاري ادبیاتو ژبه وګرځي او نړیوالو ژبو ته یې ادبي شهکارونه وژباړل شي.

د هغه په وینا، که پښتو د شاوخوا اویا میلیونه انسانانو مورنۍ ژبه ده؛ نو باید میندو ته د زده‌کړې زمینه برابره شي، ځکه نالوستې میندې ژبه کمزورې کوي.

هغه زیاته کړې چې ژبه په شعارونو، چیغو او خرافاتو نه پیاوړې کېږي، بلکې د نوې پیداګوژۍ له مخې یوازې هغه ژبې ژوندۍ پاتې کېږي چې له کوره تر ښوونځي، بازار، سیاست، ساینس، هنر او رسنیو پورې وغځېږي.

د ایران د اسلامي شورا رئیس محمدباقر قالیباف د امریکا د ولسمشر ډونالډ ټرمپ وروستي خبرداري ته په غبرګون کې ویلي، که واشنګټن د ایران په کورنیو چارو کې هر ډول «ماجراجویانه اقدام» وکړي، نو د امریکا ټول پوځي مرکزونه او ځواکونه به په سیمه کې د ایران مشروع هدفونه وي.

قالیباف په یوه لیکلي بیان کې ټرمپ «نامحترم ولسمشر» بللی او ټینګار یې کړی چې د ایران ملت د خپل تاریخ په اوږدو کې له تر دې سختو دښمنانو سره مخ شوی، خو هېڅکله یې ماتې نه ده منلې.

نوموړي زیاته کړې چې د ایران واکمن نظام د ولسي معترضینو صف له «بهرنیو مزدورانو» جلا بولي او ریښتیني معترضین د خپل ملت برخه ګڼي.