د امریکا ولسمشر ډونالډ ټرمپ، د نیکولاس مادورو لومړنی انځور تر نیول کېدو وروسته پر «ایوو جیما» جنګي بېړۍ کې خپور کړ.

نیکولاس مادورو د امریکا د ځانګړو ځواکونو په یوه هدفمند عملیاتو کې نیول شوی.

واشنګټن وايي چې دا اقدام د نشه‌يي توکو د قاچاق، نارکوترهګرۍ، د وسله‌والو ډلو سره د همکارۍ او د امریکايي اتباعو د زیانمنېدو په تورونو کې د هغه د رول له امله شوی.

د امریکايي چارواکو په وینا، مادورو تر نیول کېدو وروسته د سمندر له لارې انتقال او پر «ایوو جیما» جنګي بېړۍ کې وساتل شو، څو د امریکا عدلي بهیر ته وسپارل شي.

د امریکا د سنا جرګې غړي، لیندسي ګراهام، د وینزویلا د ولسمشر نیکولاس مادورو د نیول کېدو په غبرګون کې ویلي، چې دا د امریکا د پوځ او ولسمشر ډونالډ ټرمپ تر قوماندې لاندې یو مهم او تاریخي اقدام دی.

ګراهام په خپله ایکس پاڼه مادورو «ناقانونه او د نشه‌يي توکو له ترهګرۍ سره تړلی دیکتاتور» بللی او ټینګار یې کړی، چې د هغه سقوط د وینزویلا د خلکو لپاره د ازادۍ، سولې او سوکالۍ نوې لاره پرانیزي.

نوموړي ویلي، امریکا باید مادورو عدالت ته وسپاري او د وینزویلا له ولس سره د نوي راتلونکي په جوړولو کې مرسته وکړي.

هغه زیاته کړې، چې د وینزویلا په محور ولاړ د نشه‌يي توکو «کالیفیت» د امریکا ملي امنیت ته جدي ګواښ دی او د مادورو نیول کېدل د دې شبکې د ړنګېدو پیل دی.

د امریکا لویې څارنوالۍ پم باندي، اعلان کړی چې د وینزویلا ولسمشر نیکولاس مادورو او مېرمن یې د امریکا په قضایي سیستم کې تعقیب شوي دي.

مادورو د «د مخدره موادو د تروریستي فعالیتونو، کوکائین قاچاق، د اتوماتیک وسلو او چاودیدونکو توکو ساتلو» په تور محکمې ته وړاندې کېږي.

پم باندي د امریکا د پوځ د هغو ځواکونو ستاینه کړې چې د دواړو بین‌المللي قاچاقچیانو د نیولو عملیات په بریالي توګه ترسره کړل.

د نیکولاس مادورو د میرمنې د جرمونو په تړاو جزییات لا روښانه نه دي.

د وینزویلا مرستیال ولسمشر دلسي رودریګز غوښتنه کړې چې د ولسمشر نیکولاس مادورو د ژوند د ثبوت لپاره دې عاجل اسناد وړاندې شي.

رودریګز ویلي چې د مادورو او د هغه د مېرمنې سیلیا فلورس ځای معلوم نه دی او حکومت غواړي چې د دوی د ژوند شتون په ډاګه شي.

مرستیال ولسمشر څرګنده کړې، چې د وینزویلا حکومت د مادورو او د هغه د مېرمنې د اوسني موقعیت په اړه هېڅ معلومات نه لري.

هغه دغه راز ویلي، چې حکومت یې جدي غوښتنه کوي چې د هغه د ژوند په اړه د باور وړ شواهد وړاندې کړل شي.

بل لورته د امریکا ولسمشر، ډونالډ ټرمپ، په یوې تازه مرکه کې د وینزویلا د ولسمشر، نیکولاس مادورو، نیول د “یو بریالي او ستر عملیات” په توګه ستایلي.

د طالبانو حکومت د دفاع وزارت په خپل یو کلن راپور کې ویلي، چې په تېر میلادي کال کې د ډیورنډ د فرضي کرښې په اوږدو کې امنیتي تدابیر پراخ شوي دي.

د راپور پر بنسټ، وزارت له ۶۰۰ څخه زیاتې نوې امنیتي پوستې په معیاري ډول جوړې کړې او په همدې سیمو کې د پلان شويو سړکونو شاوخوا ۳۰ سلنه چارې بشپړې شوې دي.

د راپور له مخې، د یادې مودې پر مهال د امنیتي ځواکونو له لوري ګڼ شمېر وسلې، مهمات، پوځي تجهیزات، نشه‌يي توکي او الکولي مشروبات هم نیول شوي دي.

وزارت وایي، دا اقدامات د سرحدي امنیت د ټینګښت او د ناقانونه فعالیتونو د مخنیوي په موخه ترسره شوي دي.

په راپور کې همدارنګه راغلي چې د دفاع وزارت اړوندو قطعاتو په یو شمېر لرې پرتو سیمو کې د عامه سړکونو د جوړولو چارې هم عملي کړې، څو د امنیت ترڅنګ د خلکو د تګ راتګ ستونزې هم راکمې شي.

د امریکا ولسمشر، ډونالډ ټرمپ، په یوې تازه مرکه کې د وینزویلا د ولسمشر، نیکولاس مادورو، نیول د “یو بریالي او ستر عملیات” په توګه ستایلي.

ټرمپ ویلي، امریکا د وینزویلا پر ضد پراخ پوځي عملیات ترسره کړي چې په نتیجه کې مادورو او د هغه میرمن له هېواد څخه بهر شوي دي.

د سی‌بي‌اېس نیوز د راپور له مخې، مادورو د امریکا د ځانګړو ځواکونو، په ځانګړي ډول د دلتا ځواک، په عملیاتو کې ونیول شو.

سناتور مایک لی هم د خپل ټویټ له لارې څرګنده کړې چې د امریکا د بهرنیو چارو وزیر مارکو روبیو ویلي، مادورو د امریکا د قضایي چارو د رسیده‌ګۍ لپاره نیول شوی دی.

روسیې د امریکا لخوا پر وینزویلا د نن سهار وسله وال برید په اړه ژوره اندیښنه ښودلې او دا برید یې غندلی دی.

د روسیې د بهرنیو چارو وزارت ویلي، د برید لپاره وړاندې شوې بهانې بې اساسه دي او د وینزویلا حاکمیت باید له هر ډول بهرني پوځي مداخلې خوندي وي.

روسیې د وینزویلا د خلکو څخه خپل ملاتړ اعلان کړی او د لاتینې امریکا د هیوادونو د غوښتنې په اساس د ملګرو ملتونو د امنیت شورا بېړنۍ غونډې غوښتنه یې کړې.

د یادونې ده چې د وینزویلا په پلازمېنه کاراکاس کې د روسیې سفارت په عادي ډول فعالیت کوي، او تر اوسه کوم روسي اتباع نه دی زیانمن شوی.

د سي بي ایس د راپور له مخې، د ونزوئلا ولسمشر نیکولاس مادورو د شنبې په سهار د امریکا د پوځ د ځانګړي مأموریت ځواک Delta Force له‌خوا نیول شوی او دا مهال د امریکا په توقیف کې دی.

د راپور له مخې امریکايي چارواکي وايي، مادورو به د نشه‌يي توکو د قاچاق، نارکو ترهګرۍ او له وسله‌والو ډلو سره د همکارۍ په تورونو په امریکا کې محاکمه شي.

واشنګټن له ۲۰۲۰ کال راهیسې د هغه د نیولو غوښتنه کوله او د ټرمپ ادارې تېر کال د مادورو د نیولو لپاره ټاکل شوی انعام ۵۰ میلیونه ډالرو ته لوړ کړی و.

د راپور له مخې، وروستي پوځي بریدونه او تحرکات د نیولو د عملیاتو د خوندي کولو لپاره ترسره شوي.

بلخوا، د ونزوئلا حکومت د مادورو د ژوند د نښې غوښتنه کړې او په هېواد کې یې بېړنی حالت اعلان کړی دی.

د امریکا ولسمشر ډونالډ ټرمپ ادعا کړې چې واشنګټن د وینزویلا پر پلازمېنه کاراکاس یو پراخ برید ترسره کړی.

ټرمپ ویلي، چې د وینزویلا ولسمشر نیکولاس مادورو یې له خپلې مېرمنې سره نیولی او له دغه هېواده یې ایستلی دی.

هغه زیاته کړې، چې دا عملیات د امریکا د قانون پلي کوونکو ادارو په همکارۍ ترسره شوي او د دې موضوع په اړه به نور جزیات وروسته خپاره شي.

تر اوسه د وینزویلا حکومت یا نړیوالو خپلواکو سرچینو دا ادعا نه ده تایید کړې، او خبر د بېلابېلو رسنیو له‌خوا د ادعا په توګه خپور شوی دی.

د جمهوري نظام د ولسمشرۍ ماڼۍ پخواني ویاند ایمل فیضي د افغانستان لپاره د پاکستان د پخواني ځانګړي استازي آصف دراني وروستیو څرګندونو ته سخت غبرګون ښودلی دی.

فیضي ویلي، په پاکستان کې پښتانه، بلوڅان او نور لږکي هره ورځ د تښتونو، شکنجو او وژنو سره مخ دي؛ خو آصف درانی پر دغو کړنو چوپ پاتې دی.

نوموړي پوښتنه کړې چې که د پاکستان پوځ پر خپلو خلکو دومره ظلم کولای شي؛ نو پر افغانانو به یې ولې ونه کړي؟

هغه د بلوڅو ښځو پر وړاندې روان تاوتریخوالی «منظم دولتي ظلم» بللی او زیاته کړې یې ده چې سیاسي فعالان او خبریالان تر فشار لاندې دي.

ایمل فیضي آصف درانی د پاکستان د «پوځي رژیم ذهني قیدي» یاد کړی او ټینګار یې کړی چې تر هغو د بل هېواد نصیحت بې‌مانا دی، څو د خپلو کړنو حقیقت ونه منل شي.

د یادونې ده چې تېره ورځ د افغانستان لپاره د پاکستان پخواني ځانګړي استازي، آصف دراني ویلي، حیران دی چې طالبان د کوم ډول اسلام استازیتوب کوي او ټینګار یې کړی و چې افغانستان د پاکستان ورور هېواد دی.