نن د خیبر پښتونخوا په علیا سوات وزیرستان کې د مکین بازار پر یوې جوړیدونکې پولیسو پوستې نامعلومو وسله والو برید کړی.
د یاد برید په ترڅ کې د ډیره اسماعیل خان دوه نظامي کارکوونکي ټپیان شوي.
سربیره پر دې، وسله والو بریدګرو څلور کارکوونکي ژوندي تښتولي دي.
تر اوسه هیڅ یوې وسله والې ډلې د یاد برید مسولیت نه دی منلی.
د روسیې د دفاع مرستیال وزیر واسیلي اوسمکوف د چهارشنبې په ورځ، په مسکو کې د طالبانو حکومت د دفاع وزارت د ستراتیژۍ او پالیسۍ مرستیال محمد فرید سره لیدلي او د دفاعي همکاریو پر پراختیا یې خبرې کړي.
د روسیې دولتي رسنیو د راپور له مخې، دواړو لوریو هوکړه وکړه چې د خپلو دفاعي بنسټونو ترمنځ د دوامدارو همکاریو لپاره به ګډ ګامونه پورته کړي او یو منظم او جوړښتي چوکاټ رامنځته کړي.
د طالبانو حکومت تر اوسه په دې تړاو څه نه دي ویلي.
د پاکستان د بهرنیو چارو وزارت ویاند طاهر اندرابي ویلي، د غزې د سولې له بورډ سره د پاکستان ګډون د دغه هېواد د بهرني سیاست په تګلارې کې د کوم بدلون معنا نه لري او دا باید د ابراهیمي تړونونو سره د یو ځای کېدو په توګه تعبیر نه شي.
اندرابي دا څرګندونې د خپلې اوونیزې خبري ناستې پر مهال کړي او زیاته کړه یې ده چې د سولې په بورډ کې ګډون یوازې د دیپلوماتیکو اړیکو په چوکاټ کې دی او له کوم پوځي، امنیتي یا ستراتیژیک اتحاد سره تړاو نه لري.
نوموړي ټینګار وکړ چې د سولې له بورډ سره اړیکه د نړیوال ثبات ځواک (International Stabilisation Force) د غړیتوب یا ګډون معنا هم نه لري.
د افغانستان د کرنې او مالدارۍ چارواکي وايي، افغان او ترکي سوداګر د سړو خونو د تجهیز او تولیدي پروژو لپاره په کور دننه د ۱۵ مېلیونو ډالرو پانګونې ته چمتووالی ښودلی دی.
دا پانګونه به د کروندګرو او کورنیو تولیداتو د ساتنې په برخه کې مرسته وکړي.
د کرنې خونې د نړۍوالو اړیکو مشر امید حیدري ویلي، چې پانګونه به په کابل صنعتي پارک کې ترسره شي او کروندګرو ته به د خپلو محصولاتو د ضایع کېدو د مخنیوي فرصت برابر کړي.
همداراز، د طالبانو حکومت د کرنې، اوبو لګولو او مالدارۍ وزارت په وینا، په روان لمریز کال کې په ټول افغانستان کې ۱۵۰ معیاري سړې خونې جوړې شوې دي، چې د ۲۰ څخه تر ۵۰۰۰ ټنو پورې د محصولاتو د ساتلو ظرفیت لري.
د سيانان د راپور له مخې، د امریکا ولسمشر ډونالډ ټرمپ د ایران پر وړاندې د پوځي اقداماتو په اړه غور کوي.
دا پرېکړه د واشنګټن او تهران ترمنځ د ایران د اټومي پروګرام او بالستیک توغندیو د تولید د مخنیوي لپاره د لومړنیو خبرو اترو د ناکامۍ وروسته شوې ده.
ټرمپ خبرداری ورکړی چې که امریکا پرېکړه وکړي، نو پر ایران به راتلونکی برید ډېر سخت او پراخ وي.
د راپور له مخې، په دې بحث کې د امریکا د ملي امنیت لوړ پوړي چارواکي هم شامل دي، چې د احتمالي پوځي عملیاتو په پلان جوړونه کار کوي.
د دې تر څنګ، د ایران چارواکو هم د هر ډول بهرني پوځي فشار پر وړاندې د دفاع د چمتوالي خبرداری ورکړی دی او ویلي یې دي، چې که برید وشي، تهران به سخت ځواب ورکړي.
وروسته له هغه چې د خیبر پښتونخوا اعلی وزیر سهیل اپریدی د دولتي ادارو پر ضد د بېاساسه تورونو د قضیې په تړاو محکمې ته حاضر نه شو،.د اسلام اباد یوې محکمې د هغه د نیولو امر کړی.
د جيونیوز د راپور له مخې، د اسلاماباد محکمې د چهارشنبې په ورځ پولیسو ته لارښوونه کړې چې سهیل اپرېدي ونیسي او د فبرورۍ پر ۱۰مه یې محکمې ته وړاندې کړي.
پر هغه د سایبري جرمونو د مخنیوي قانون له مخې قضیه ثبت شوې؛ خو تر اوسه د اعلی وزیر او د هغه د دفتر له لوري په دې اړه غبرګون نه دی ښودل شوی.
د جرمني لومړي وزیر فرېدرېش مېرڅ ویلي، د ایران اوسنی حکومت د خلکو ملاتړ نه لري او خپل واک یې یوازې د زور او وېرې له لارې ساتلی دی.
هغه ټینګار کړی چې داسې نظام د ولس استازیتوب نه شي کولای او د دوام امکان یې ډېر محدود دی.
نوموړي دغه څرګندونې د چهارشنبې په ورځ د رومانیې له صدراعظم سره په ګډه غونډه کې کړې او د ایټالیا له هغه وړاندیز یې ملاتړ کړی چې غواړي د ایران سپاه پاسداران د اروپايي ټولنې د ترهګرو ډلو په نوملړ کې شامل کړي.
د هغه په وینا، که څه هم ځینې اروپايي هېوادونه لا هم پوره چمتو نه دي؛ خو په دې اړه بحثونه روان دي.
د افغانستان لپاره د امریکا د ځانګړې څارنې ادارې یا سیګار اعلان کړی چې له ۱۷ کلونو فعالیت وروسته به د روانې جنورۍ په پای کې خپل کار په رسمي ډول پای ته ورسوي.
د یادې ادارې وروستۍ کاري ورځ د جنورۍ ۳۱مه ټاکل شوې ده.
سیګار په ۲۰۰۸ کال کې د امریکا د کانګرس له لوري د افغانستان لپاره د امریکايي مرستو او لګښتونو د څار په موخه جوړ شوی و.
دې ادارې د خپل فعالیت پر مهال د بیارغونې په پروژو کې د فساد، ناوړه استفادې او درغلیو ګڼې پېښې افشا کړې دي.
د سیګار د وروستي راپور له مخې، امریکا تر پوځي وتلو وروسته هم د افغانستان تر ټولو ستر تمویلونکی پاتې شوې او یوازې د طالبانو د واکمنۍ پر مهال یې ۳،۸ میلیارده ډالر مرسته کړې ده.
سیګار ویلي چې د طالبانو حکومت له دغو مرستو ګټه اخیستې ده.
د ایران د بهرنیو چارو وزیر عباس عراقچي ویلي، د هېواد وسلهوال ځواکونه د هر ډول احتمالي برید پر وړاندې بشپړ چمتو دي او د دفاع لپاره ګوته پر ماشه ولاړ دي.
دا څرګندونې د هغه د امریکا د ولسمشر د وروستیو ګواښونو په غبرګون کې کړې دي.
عراقچي ویلي، که څه هم ایران له امریکا سره د اټومي خبرو اترو هرکلی کوي؛ خو د یورانیمو د غنيکولو له حقه به په هېڅ صورت تېر نه شي.
په ورته وخت کې، د ایران د دفاعي شورا غړي علي شمخاني خبرداری ورکړی چې د امریکا هر ډول پوځي اقدام به د پراخې جګړې پیل وي او سخت ځواب به ولري.
همداراز، د سپاه پاسداران ویاند ویلي چې د ایران پر ضد پوځي فشار ناکام شوی او تهران د ټولو احتمالي سناریوګانو لپاره بشپړ چمتووالی لري.
د امریکا د بهرنیو چارو وزارت په ایکس شبکه کې په فارسي حساب کې ویلي، د ایران حکومت د هېواد اقتصاد ویجاړ کړی او وروستي اعتراضونه یې په تاوتریخوالي ځپلي دي.
د بیان له مخې، د حکومت پالیسۍ خلک د لومړنیو اړتیاوو له پوره کولو عاجز کړي او دا د اعتراضونو مهم لامل دی.
په پیغام کې ویل شوي، ګڼ شمېر کسان یوازې د اعتراض او د نظر د څرګندولو له امله وژل شوي دي.
همداراز، د قربانیانو کورنۍ د اقتصادي ستونزو سره سره د مړو د سپارلو او ښخولو لپاره پیسو ورکولو یا پور اخیستو ته اړ شوي دي.
د امریکا د بهرنیو چارو وزارت دا کړنې نفرتانګېزې او غیرانساني بللې دي.