د امریکا د بهرنیو چارو وزارت په افغانستان کې د طالبانو حکومت له لوري د امریکایي وګړو د نیولو په اړه سخت غبرګون ښودلی او غوښتنه یې کړې چې ټول بندیان باید بې له ځنډه خوشې شي.

د وزارت یوه ویاند ټامي بروس ویلي، واشنګټن دا موضوع په مستقیم ډول د طالبانو له حکومت سره شریکه کړې او ټینګار یې کړی چې له هغوی سره د هر ډول رغنده اړیکو لومړی شرط د ټولو امریکایانو ازادول دي.

امریکا د طالبانو له حکومت غوښتي چې د «یرغمل نیونې ډیپلوماسي» پای ته ورسوي.

په همدې حال کې د سپینې ماڼۍ د ملي امنیت شورا د ترهګرۍ ضد رئیس سبسشین ګروکا ویلي، ډونالډ ټرمپ په دې موضوع جدي دی او که پاتې امریکایان خوشې نه شي، د طالبانو حکومت ته به بدې پایلې ولري.

هغه په ځانګړي ډول د ډنیس کویل او محمود شاه حبیبي د ازادۍ غوښتنه کړې ده.

واشنګټن خپلو اتباعو ته هم خبرداری ورکړی چې افغانستان ته دې سفر نه کوي، او ټینګار یې کړی چې تر هغې به ارام نه شي څو ټول امریکایان خپلو کورونو ته ستانه شوي نه وي.

د امریکا د بهرنیو چارو وزیر، مارکو روبیو د مجارستان له لومړي وزیر سره په ګډه خبري ناسته کې ویلي چې له ایران سره یوې هوکړې ته رسېدل به اسانه نه وي، خو سره له دې هم ډونالډ ټرمپ د ستونزو باوجود د یوې موافقې د ترلاسه کولو هڅو ته دوام ورکوي.

روبیو زیاته کړې: «باید وګورو چې څه پېښېږي او پایله به څه وي.»

هغه همدارنګه ویلي چې لا هم فرصت شته څو له ډیپلوماټیکې لارې یوې هوکړې ته ورسېږو.

د افغان مېرمنو د حقونو فعالې ډیوه پتنګ د محمد حلیم فدایي د وروستیو څرګندونو په غبرګون کې، چې د ملایانو له قوله په کې لطیف ننګرهاري ته د «ډم» خطاب کړی و، توند غبرګون ښودلی دی.

اغلې پتنګ لیکلي دا د افسوس خبره ده چې ځینې خلک هنرمندانو ته داسې الفاظ کاروي.

هغې ویلي:«دا ډېر د افسوس خبره ده چي ځيني خلک ځان په دومره ټيټو او بې‌ګټو بحثونو کي بوختوي. يو هنرمند ته په داسې سپکو الفاظو خطاب کول، له دې هم ټیټ کار دی لکه يو ملا چې چاته بد نومونه کاروي. ما دا ډول خبرې اکثره له لوستو خلکو اورېدلي دي، خو پاتي ریښتنې افغانان هيڅکله ځان په دې کچه بحثونو کي نه ښکيلوي او تل خپلو هنرمندانو ته مينه او درناوی ښودلی.»

نوموړې ټینګار کړی چې افغانان له پخوا د هنر او هنرمند درناوی کوي.

د ډیوه پتنګ په وینا، سالمې نیوکې او نظر څرګندول یو حق دی، خو سپکاوی او توهین د ستونزو حل نه شي کېدای.

ډیوه پتنګ همداراز له خلکو غوښتي چې د خبرو پر مهال له زغمه او درناوي کار واخلي او د سپکو الفاظو پر ځای د ادب چوکاټ وساتي.

د ایران د بهرنیو چارو وزیر، سید عباس عراقچي د دوشنبې په ورځ د د اټومي انرژۍ نړیوال اژانس له عمومي رییس رافایل ماریانو ګروسي سره ولیدل.

د بهرنیو رسنیو د راپورونو له مخې، دا لیدنه په داسې حال کې ترسره شوې چې د تهران او واشنګټن ترمنځ د اټومي خبرو د بیا پيلېدو هڅې روانې دي.

ویل کېږي، د دې ناستې موخه د ایران د اټومي پروګرام په اړه د موجودو اختلافاتو کمول او د احتمالي کړکېچ د پراخېدو مخنیوی و.

د طالبانو حکومت د ملي دفاع وزارت له لوري د دفاعي ځواکونو لپاره نوی پوځي یونیفورم په رسمي ډول اعلان شو.

دغه اعلان نن د یاد وزارت په تالار کې د یوې غونډې پر مهال وشو چې پکې د وسلوال پوځ لوی درستیز قاري فصیح‌الدین فطرت، د وزارت یو شمېر رئیسانو او د مرکزي قطعاتو قوماندانانو ګډون کړی و.

نوی یونیفورم د کومانډو، سرحدي ځواک او ملي اردو ځواکونو لپاره ټاکل شوی دی.

قاري فصیح‌الدین فطرت د نوي پوځي لباس په اړه ویلي، چې یونیفورم د نظم، انضباط او هویت څرګندونه کوي او ځواکونه باید عسکري نظم په بشپړ ډول مراعت کړي.

د هغه په وینا، نوی یونیفورم د یووالي او وحدت سمبول دی او هغه کسان چې په وسلوال پوځ کې شاملیږي باید د هېواد دفاع خپله ژمنتیا وګرځوي.

همدارنګه، د اطلاعاتو او ستراتیژیکو نشراتو رئیس عنایت‌الله خوارزمي ویلي، چې هر نظامي باید قوي اراده او لوړ فکر ولري، د دښمن پر وړاندې سخت او د مسلمانانو پر وړاندې نرم واوسي، له خپل مسؤلیت څخه غافل نه شي او عسکري نظم ته ژمن پاتې شي.

د ایران د بهرنیو چارو وزیر، سید عباس عراقچي ویلي چې له اټومي کارپوهانو سره به یوځای د دوشنبې په ورځ له رافائل ماریانو ګروسي سره ژورې تخنیکي خبرې وکړي.

نوموړي زیاته کړې چې د امریکا سره د سې‌شنبې ورځې د ډیپلوماټیکو لیدنو څخه مخکې به د عمان د بهرنیو چارو له وزیر بدر البوسعیدي سره هم وګوري.

عراقچي ویلي چې دا مهال په ژنو کې حضور لري او د یوه عادلانه او منصفانه هوکړې د ترلاسه کولو لپاره له واقعي نظریو سره راغلی دی.

هغه ټینګار کړی: «هغه څه چې د خبرو پر مېز نه دي، د ګواښونو پر وړاندې تسلیمېدل دي.»

د ایران په سوېل ختیځ کې د وسله‌وال برید له امله دوه کسان وژل شوي او دوه نور ټپیان شوي دي.

د راپورونو له مخې، دا پېښه د زاهدان ښار ته څېرمه رامنځته شوې، چیرته چې وسله‌والو کسانو پر هغه موټر ډزې کړې چې د کان کارګر یې لېږدول.

د ایراني دولتي رسنیو د سیمه‌ییزو چارواکو له قوله ویلي، کارګر د کان څخه خپلو کورونو ته روان وو چې په لاره کې پرې وسله‌وال برید وشو.

امنیتي ځواکونو د پېښې په اړه پلټنې پیل کړې دي، خو تر اوسه هېڅ ډلې د برید مسوولیت نه دی منلی.

چارواکو ویلي چې د برید کوونکو د پېژندنې او نیولو لپاره هڅې روانې دي.

د ایران د بهرنیو چارو وزارت ویاند، اسماعیل بقایي، د کوبا پر وړاندې د امریکا د اقتصادي بندیزونو د زیاتوالي او فشار د اعمالو په اړه سخت غبرګون وښود او د کوبا له خلکو او حکومت سره یې خپله همغږي اعلان کړه.

د یاد وزارت په خپره شوې خبرپاڼه کې ویل شوي، چې د امریکا لخوا پر کوبا د ۶۴ کلونو اقتصادي محاصرې پایلې سختې بشري او مادي ستونزې رامنځته کړي دي او د دغه هیواد لخوا د کوبا پر خلکو اساسي بشري حقونه په جدي توګه تر پښو لاندې شوي دي.

اسماعیل بقایي ټینګار کړی، چې اقتصادي بندیزونه د ملګرو ملتونو د منشور اصولو او نړیوالو حقوقو، په ځانګړې توګه د ملتونو د سرنوشت ټاکلو حق، د ملي حاکمیت درناوي او د نورو هیوادونو په کورنیو چارو کې د مداخلې د منع له اصولو څخه په ښکاره توګه سرغړونه ده.

ایران، د امریکا د دې دوامداره او سیستماتیکې سرغړونې په اړه خبرداری ورکړی او ویلي یې دي چې د کیوبا د خلکو پر حقونو دا پراخ تیري، چې د بشریت پر وړاندې جرم په توګه ګڼل کیږي، باید د امریکا له خوا ځواب شي.

د افغانستان کرکټ کپتان راشید خان نن د افغانستان او متحده عربي اماراتو ترمنځ د T20 نړیوال جام په لوبه کې خپل تاریخي ۷۰۰مه وېکټ ترلاسه کړه.

د افغانستان دغه ځلانده ستوري دا مهمه وېکټ د محمد عرفان د “هیټ ویکټ” له لارې واخیسته، چې د UAE په ۱۶م اوور کې له منځه لاړه.

راشید خان لوبه د ۶۹۹ وېکټو سره پیل کړې وه او د دې لاسته راوړنې وروسته یې هم ډېر احتیاط وکړ.

همدا رنګه، د T20 کرکټ تاریخ کې تر دې دمه هیڅ بل بالر ۷۰۰ وېکټونه نه دي اخیستي.

د وېکټونو په جدول کې د ډواین براوو ۶۳۱ وېکټو سره دویم دی، او د فعالو کرکټرو څخه سونیل نارین ۶۱۳ وېکټو سره دریم دی او همدا رنګه راشد خان د افغانستان لپاره په T20 کې تر ټولو ډېر وېکټ اخیستونکی وبلل شو، چې د خپلې ۷۰۰مې وېکټې سره، د افغانستان لپاره یې ۱۹۱ وېکټونه ثبت کړل.

راشید خان د ۲۰۲۳ کال د ملا تیر عملیاتو وروسته لږ تر لږه خپل غوره فعالیت نه دی کړی، خو په وروستیو لوبو کې یې په لوړ سکور لرونکو سیالیو کې هم ثابته فعالیت کړی دی.

د قرغیزستان په اوش ولایت کې پولیسو د «بندیت» عملیاتو په ترڅ کې د پیسو پر شرط چرګ جنګوونکي نیولي.

د قرغیزستاني رسنیو له قوله، پولیسو ویلي، چې د کارا-سوو ولسوالۍ کې د یوې کورنۍ ودانۍ په انګړ کې څو تنو د پیسو پر شرط د چرګو جنګولو لوبه تنظیم کړې وه.

په یاد ځای کې له ۱۰۰ څخه د ډېرو ګاونډیو هېوادونو خلکو او د ۲۰۰ څخه زیاتو محلي خلکو ګډون کړی و.

راپورونو په ښکاره ډول د ګاونډیو چرګ جنګوونکو نومونه او ځایونه نه دي افشا کړي؛ خو ویلي یې دي چې دغه وګړي به یواځې د چرګانو جنګولو دپاره دغه هیواد ته ورتلل.

ټول ګډونوال پولیسو توقیف کړي او د هویت تثبیت او د ګوتو نښې یې اخیستل شوي دي.

رسنیو ویلي، د ګاونډي هېواد اووه وګړي د قانون د سرغړونې له امله ۵۵۰۰سوه پیسې جریمه شول.

د یاد هیواد پولیسو ویلي، د غیرقانوني لوبو د تنظیموونکو په وړاندې به جنايي قضیه هم پیل شي او قانوني اقدامات به ترسره شي.