د ملګرو ملتونو امنیت شورا په ناسته کې د روسیې او امریکا استازو لفظي شخړه کړې.
دا ناسته په سوریه کې د روان بحران د مخنیوي لپاره جوړه شوې وه، چې په کې د روسیې او امریکا چارواکو یو بل د ترهګري په ملاتړ تورن کړي دي.
په ملګرو ملتونو کې د امریکا مرستیال سفیر رابرټ ووډ د سوریې د ولسمشر بشار الاسد ځواکونه او روسیه پر ښوونځیو او روغتونو د حملو پر مهال د ملکي وګړو په مرګژوبله تورن کړل او په ځواب کې یې په ملګرو ملتونو کې د روسیې سفیر واسیلي نیبینزیا وویل، دا تصور هم لا نه شي کېدای چې واشنګټن به په اخلاص سره د تروریزم پر ضد مبارزه وکړي.
د یادونې ده چې روسیه په روانه جګړه کې د سوریې ملګرې ده، چې وړمه شپه یې هم په حلب او ادلب کې د سوریې پر مخالفانو بریدونه کړي دي.
