والسټریټ ژورنال د امریکایي چارواکو د یوې ارزونې له مخې راپور ورکړی، چې ایران د امریکا او اسراییلو له بریدونو وروسته هم د پام وړ توغندیز ځواک ساتلی او د اسراییلو د پوځي چارواکو په اټکل، اوس مهال څه باندې ۱۵۰۰ بالستیک توغندي لري.
د راپور له مخې، ایران د لنډ واټن توغندیو او بېپیلوټه الوتکو د پام وړ زېرمه هم لري او د جګړې د بیا پیل په صورت کې کولی شي په سیمه کې د امریکا او متحدینو پوځي اهداف په نښه کړي.
په راپور کې د امریکا د دفاع وزارت د منځني ختیځ په چارو کې د وزیر د پخواني مرستیال سایمون لېډین له قوله ویل شوي، چې ان تر ټولو ټیټ اټکلونه هم ښيي، ایران د جګړې تر مخکیني حالت د خپل توغندیز زېرمتون له نیمایي ډېر بېرته رغولی دی.
خو امریکایي چارواکو ټینګار کړی، چې د دغې ارزونې د کرهوالي کچه ټیټه ده؛ ځکه د چمتو توغولو وړ توغندیو او په زېرمتونونو کې د ساتل شویو توغندیو دقیق شمېر معلومول ستونزمن دي.
