د لبنان د حزبالله مشر نعیم قاسم یو ځل بیا ویلي چې تر هغې به د دغه سازمان د وسلو د سپارلو په اړه خبرې ونه شي، څو اسرائیلي ځواکونه د لبنان له خاورې نه وي وتلي او بریدونه یې نه وي درولي.
د «ټایمز اف اسرائیل» د راپور له مخې، قاسم په یوه خبرپاڼه کې ویلي چې حزبالله ته د اسرائیلو د ټاکنو پایلې مهمې نه دي او د اسرائیلو پر ضد به خپل مقاومت ته دوام ورکړي.
نوموړي ویلي چې اسرائیل باید د لبنان له خاورې ووځي او د دغه هېواد پر ضد بریدونه ودروي.
د راپورونو له مخې، لبنان او اسرائیلو په جون میاشت کې د یوه چوکاټي تړون په اړه هوکړه کړې وه چې موخه یې د حزبالله د وسلو سپارل، له هغو سیمو د اسرائیلي ځواکونو تدریجي وتل چې تر کنټرول لاندې یې دي او سیمې کې د لبناني پوځ ځای پر ځای کول وو. خو حزبالله د وسلو سپارلو سره مخالفت کړی دی.
