د خیبرپښتونخوا د عوامي نېشنل ګوند مشر محمود خان اڅکزي په کشمیر کې د وروستیو پېښو په اړه د پاکستان حکومت پر کړنو نیوکه کړې او ویلي یې دي چې د سیمې خلک له سخت وضعیت سره مخ دي.
اڅکزي ادعا کړې چې په کشمیر کې شاوخوا ۶۷ کسان وژل شوي او خلکو ته اجازه نه ورکول کېږي چې د خپلو وژل شویو کسانو لپاره راټول شي او ماتم وکړي.
نوموړي د سناتور مشتاق احمد د نیول کېدو یادونه هم کړې او ویلي یې دي چې هغه له احتجاج وروسته نیول شوی او نامعلوم ځای ته لېږدول شوی دی.
د عوامي نېشنل ګوند مشر د پاکستان پر سیاسي او اداري نظام نیوکه کړې او ویلي یې دي چې په اوسني وضعیت کې د وړتیا پر ځای معاملې او پیسې د خلکو د برخلیک په ټاکلو کې اغېز لري.
اڅکزي ټینګار کړی چې دا ډول کړنلارې دوام نه شي کولی او د خلکو ستونزې باید د سیاسي فشار پر ځای د قانون او انصاف له لارې حل شي.
دا په داسې حال کې ده چې په کشمیر کې وروستۍ ټاکنې لانجمنې شوې او پر وړاندې یې ولسي لاریونونه د پاکستاني پوځ له لوري په تاوتریخوالو او وژنو وځپل شول.
