د ایران د اسلامي انقلاب ساتونکو ځواکونو (سپاه پاسداران) ادعا کړې چې د هرمز تنګي په فضا کې یې یوه MQ-9 ریپر بېپیلوټه الوتکه د خپل هوايي دفاعي سیستم په وسیله ویشتلې ده.
د سپاه پاسداران اړوندې سپاه نیوز رسنۍ د راپور له مخې، دغه الوتکه د هرمز تنګي پر سر د الوتنې پر مهال په نښه شوې، خو دا نه ده روښانه شوې چې له کوم ځایه پورته شوې وه.
راپور کې ویل شوي چې MQ-9 ریپر بېپیلوټه الوتکې تر ډېره د امریکا د هوايي ځواک له خوا کارول کېږي.
سپاه پاسداران همداراز ادعا کړې چې د فبرورۍ له ۲۸مې، د ایران پر ضد د امریکا او اسرائیل د جګړې له پیل راهیسې، ایران له ۳۰ زیاتې MQ-9 ریپر بېپیلوټه الوتکې شنډې یا نیولې دي.
تر اوسه امریکا د سپاه پاسداران د دغو ادعاوو په اړه رسمي غبرګون نه دی ښودلی.
