هندي پولیسو د میټا د هند د څانګې د مشر پر ضد د فېسبوک د هغو پوسټونو له امله قضیه ثبت کړې چې ویل کېږي د هند لومړي وزیر نریندرا مودي په کې په سپکوونکې بڼه ښودل شوی و.
د رویټرز د راپور له مخې، دا قضیه د حیدراباد ښار د سایبري جرمونو څانګې ثبت کړې او ټاکل شوې چې د میټا شرکت ته هم رسمي خبرتیا واستول شي.
راپور وايي، یاد پوسټونه د هند د ملي ازموینو د پوښتنپاڼو د افشا کېدو پر ضد د اعتراضونو پر مهال خپاره شوي وو.
میټا تر اوسه د دې قضیې په اړه رسمي غبرګون نه دی ښودلی.
