په نړیوالو بازارونو کې د نفتو د بیو د کمېدو لړۍ دوام لري او د برېنټ خام نفتو بیه د تېرو څلورو میاشتو تر ټولو ټیټې کچې ته نږدې شوې ده.
د راپورونو له مخې، د برېنټ خام نفتو، چې د نړیوالو بازارونو لپاره د بیو مهم معیار ګڼل کېږي، په لومړنیو معاملو کې ۰.۵ سلنه ارزښت له لاسه ورکړی او د هر بېرل بیه یې ۷۶.۷۱ ډالرو ته راکمه شوې ده.
تر دې یوه ورځ وړاندې هم د برېنټ بیه نږدې یو سلنه راټیټه شوې وه او د مارچ میاشتې له پیل راهیسې تر ټولو ټیټې کچې ته رسېدلې وه.
د اقتصاد شنونکي وايي، د نفتو په بیو کې وروستی کمښت د دې تمې له امله رامنځته شوی چې د هرمز تنګي له لارې به د نفتو لېږد بېرته عادي شي او نړیوال بازار ته به د انرژۍ عرضه زیاته شي.
د امریکا، اسراییل او ایران ترمنځ د تاوتریخوالي په پیل کې، د هرمز تنګي د بندېدو له امله د نفتو او انرژۍ بیې په چټکۍ لوړې شوې وې، ځکه دغه سمندري لار د نړۍ له مهمو نفتو لېږدونکو مسیرونو څخه شمېرل کېږي.
همداراز، د انرژۍ پر تاسیساتو د متقابلو بریدونو له امله هم په نړیوالو بازارونو کې د نفتو او نورو انرژۍ سرچینو بیې لوړې شوې وې، خو اوس د وضعیت د ښه کېدو له اټکل سره بیې بېرته د راکمېدو په حال کې دي.
