امریکایي خبري شبکې سيبياېس په يو راپور کې ويلي، په سویس کې د روانو مذاکراتو یوه ګډونوال ډیپلومات ویلي چې د اسرائیل او د لبنان د حزبالله ډلې ترمنځ د شخړې د ارزونې او حل لپاره یوه بېړنۍ ناسته د سولې خبرو اترو د لومړۍ ورځې پروګرام ته ورزیاته شوې ده.
دغه ډیپلومات ویلي چې تمه ده دا موضوع د امریکایي او ایراني پلاوو ترمنځ د لومړۍ رسمي غونډې پر مهال هم مطرح شي او د دواړو لورو د بحثونو له مهمو موضوعاتو څخه وي.
د راپور له مخې، د لبنان د وضعیت، د اوربند د ټینګښت او د سرحدي تاوتریخوالي د کمولو په اړه اندېښنې د خبرو اترو د ګډونوالو د پام وړ موضوعات ګرځېدلې دي.
