د طالبانو د حکومت د اطلاعاتو او کلتور وزارت د نشراتو معین مهاجر فراهي په هېواد کې له یو شمېر سیاسي شنونکو سره لیدلي دي.
د یاد وزارت د خبرپاڼې له مخې، په دې لیدنه کې له سیاسي شنونکو غوښتل شوي چې د زمري ۲۴مې «د طالبانو د حکومت پنځه کلن کېدو» د نمانځنې پر مهال د تېر شل کلن نظام او بهرنیو ځواکونو د کړنو په اړه خپرونې وړاندې کړي او همدارنګه په سیاسي، اقتصادي، امنیتي او نورو برخو کې د طالبانو د حکومت لاسته راوړنې خلکو ته ور وپېژني.
مهاجر فراهي همداراز له سیاسي شنونکو غوښتي چې په خپلو بحثونو کې د پاکستان د پوځي ادارې کړنې خلکو او نړیوالو ته بربنډې کړي.
