د خیبر پښتونخوا په دېره اسماعیل خان کې نن په دوو جلا وسلهوالو بریدونو کې د ګمرک څلور چارواکي او یو د ترافیک پولیس وژل شوی دی.
د پاکستانۍ رسنیو د راپور له مخې، وسلهوالو لومړی د فدرالي عوایدو ادارې پر چارواکو ډزې وکړې او وروسته یې د لویې لارې د ترافیک پولیسو پر یوه موټر برید وکړ.
د دواړو پېښو عاملان له سیمې تښتېدلي دي.
د دېره اسماعیل خان د پولیسو مشر ضیاالدین احمد د ګمرکي چارواکو د وژل کېدو پخلی کړی او ویلي یې دي چې د پېښو په اړه پلټنې روانې دي.
دا بریدونه په داسې حال کې شوي چې په دې وروستیو کې په خیبر پښتونخوا کې امنیتي وضعیت خراب شوی.
