د ټېلګرام بنسټګر پاووېل دوروف د فرانسې د پولیسو لخوا نېول شوی دی.
هغه د خپلې شخصي الوتکې په واسطه له اذربایجان څخه د فرانسې “بورژه” ته تللی، چې له خپلې الوتکې څخه د ښکته کېدو پر مهال د فرانسې د پولیسو لخوا نېول شوی دی.
د فرانسې چارواکو ویلي، له حکومت سره د ده نه همکاري یو له هغو لاملونو څخه وه چې د فرانسې حکومت د پاووېل دوروف نیولو ته اړ شي.
بل لورته د ایکس ټولنیزې شبکې مشر ایلن ماسک هم د هغه نیول کېدل غندلي.
ماسک ویلي، ژر ده چې اروپا کې به په لایک هم خلک ونیول شي.
د لبنان حزب الله په یوه نوې بیانیه کې ادعا کړې چې پر اسرائیلو باندې د خپل برید لومړی پړاو یې پای ته رسولی.
حزب الله ویلي د اسرائیلو پر شاوخوا سلو اډو او پوځي پوستو له ۳۲۰ څخه د زیاتو راکټونو په ویشتلو سره یې لومړنی پړاو بشپړ کړی دی.
تر اوسه څرګنده نه ده چې دغه راکټونه د دوی په هدف لګېدلي او که نه.
اسرائیلو هم تر اوسه د ور اوختو زیانونو په اړه څه نه دي ویلي.
دا په داسې حال کې ده چې د اسرائیلو پوځ په لبنان کې د حزب الله پر مرکزونو د خپلو جنګي الوتکو د برید اعلان وکړ.
د اسرائیلو د پوځ ویاند، دانیل هجري، ویلي دي چې هیواد به یې «د پام وړ اونۍ» ولري.
د اسرائیلو پوځ ویلي، دا بریدونه یې وروسته له هغه کړي، چې خبر شول حزب الله پلان لري چې پر اسرائیلو راکټي بریدونه وکړي.
حزب الله په یوه بیان کې اعلان کړی چې د اسرائیلو پر ضد یې پراخ ځوابي بریدونه پیل کړي دي.
اسرائیلو د ۴۸ ساعتونو لپاره بیړنی حالت اعلان کړی.
اسرائیلي رسنیو په مختلفو سیمو کې د الارم سایرن او د اوسپنې د دفاعي سیستم د فعالولو خبر ورکړی دی.
دا په داسې حال کې ده چې څو ساعته وړاندې د اسرائیلو پوځ په لبنان کې د حزب الله پر مرکزونو د خپلو جنګي الوتکو د برید اعلان وکړ.
د اسرائیلو د پوځ ویاند، دانیل هجري، ویلي دي چې هیواد به یې «د پام وړ اونۍ» ولري.
هغه د اسراییلو له خلکو وغوښتل چې هوښیار پاتې شي.
د اسرائیلو پوځ ویلي، دا بریدونه یې وروسته له هغه کړي، چې خبر شول حزب الله پلان لري چې پر اسرائیلو راکټي بریدونه وکړي.
د بلجیم د بهرنیو چارو وزیرې حاجا لحبیب د طالبانو د امربالمعروف نوي توشیح شوي قانون ته په غبرګون کې ویلي چې دا قانون د افغانستان د نیمایي نفوس د له منځه وړلو هڅه ده.
لحبيب په خپله ایکسپاڼه ليکلي چې د طالبانو د دغه قانون موخه له عامه ځايونو د ښځو ايستل دي.
هغې ټینګار کړی چې د افغان ښځو غږ او حیثیت باید پیاوړی شي.
نوموړې ویلي چې هېواد يې د افغانستان له مدني ټولنې ملاتړ کوي.
د یادونې ده چې د طالبانو حکومت نوي توشیح شوي قانون د ګڼو سیاسیونو، هېوادونو او سازمانونو غبرګونونه را پارولي.
د تېر جمهوري حکومت د بهرنیو چارو وزیر حنیف اتمر وایي، چې د طالبانو د امر بالمعروف له قانون سره د خلکو اندېښنې او کرکه په بشپړه توګه د پوهېدو او توجیه ده.
اتمر ویلي، لومړی په دې قانون کې هغه څه شامل دي چې بهرني او د افغاني ټولنې له عقایدو، ارزښتونو، اخلاقي او حقوقي نظام او همدارنګه د اسلامي نړۍ د معاصر تمدن او نړیوالې ټولنې سره په تضاد کې دي.
هغه ویلي، چې دا ښکاره ظلم او تاریخي شاتګ زموږ پر ولس د اسلامي شریعت په نوم تحمیل شوی او بل هېڅ اسلامي هېواد پر خپلو خلکو داسې قانون نه دی پلی کړی.
نومودي ویلي، چې د هېواد د سیاسي، مدني او فرهنګي ټولنو پوهانو، فقهاوو او غړو تاریخي مسوولیت دی چې د خلکو د حقونو د تامین په لاره کې د دوی د حقونو او آزادیو د بنسټونو او هویت د ساتلو او د هغو د اغېزمنتوب تضمین وکړي.
د هغه په خبره، اسلامي نړۍ بنسټيز مسووليت لري چې د دغه قانون په ردولو او په هېواد کې د عادلانه او مشروع نظام په رامنځته کولو کې د افغانستان د خلکو تر څنګ ودرېږي او پرې نه ږدي چې د مسلمانانو ارزښتونه او عقايد او له نورو خلکو سره د هغوى اړيکې او تعامل تر پښو لاندې شي چې د اسلام په نوم دې نړۍ ته زیان ورسوي.
نوموړی دا څرګندونې داسې مهال کوي چې د طالبانو حکومت نوی قانون توشیح کړی او په ښځو یې سخت بندیزونه لګولي دي.
د کاناډا د بهرنیو چارو وزارت د طالبانو د امر بالمعروف نوی توشیح شوی قانون غندلی او ویلي یې دي چې دا قانون د افغانستان د خلکو په ځانګړې توګه د ښځو او نجونو د چوپتیا یوه بله هڅه ده.
کاناډا د طالبانو پر حکومت غږ کړی چې پر ښځو او نجونو ټول بندیزونه لرې کړي او د بشري حقونو سرغړونې پای ته ورسوي.
د طالبانو حکومت مشر ملا هبتالله اخندزاده په دې وروستیو کې یو قانون توشیح کړ چې ډېری بندیزونه یې پر خلکو لګولي.
دغه قانون په پراخه کچه له نړۍوالو نیوکو سره مخ شوی دی.
د بشري حقونو سازمانونو دغه قانون د بشریت ضد او ناوړه چلند بللی او له طالبانو یې غوښتي چې د بشري حقونو تر پښو لاندې کولو او انساني کرامت ته د سپکاوي مخه ونیسي.
د وږي درېیمه په کابل کې پر امریکايي پوهنتون د برید له اتمې کالیزې سره برابره ده.
دغه برید د وږي پر دریمه پیل او د وږي میاشتې د څلورمې ورځې تر سهار لس بجو یې دوام وکړ.
په دغه برید کې د محصلینو په ګډون ۱۶ تنه ووژل شول.
دا برید وروسته له هغه وشو چې د امریکايي پوهنتون دوه استادان، امریکايي تیموتي ویکس او اسټرالیايي کوين کینګ د طالبانو له خوا وتښتول شول.
که څه هم تر اوسه د یاد برید مسوولیت چا نه دی منلی؛ خو طالبانو ویلي وو چې په دې اړه به پلټنې وکړي.
د بلوچستان په کوېټه کې یوې بمي چاودنه ۳ پاکستاني پوځیان وژلي او ۱۶ نور یې ټپیان کړي دي.
د رویټرز د خبر له مخې، دا پېښه د یشین په سیمه کې رامنځته شوې.
که څه هم پاکستانیو رسنیو خبر ورکړی وو، چې په برید کې یو تن وژل شوی او ۱۲ نور ټپیان دي؛ خو رویټرز ویلي، چې دغه برید کې ۱۹ تنو ته مرګ ژوبله اوښتې.
بل لورته بیا د پشین روغتون مسوولین وايي چې د پېښې له ځایه ۱۸ ټپیان دغه روغتون ته ور وړل شوي دي.
ویل کېږي، چې په ټپیانو کې د دو تنو وضیعت د اندېښنې وړ دی.
تر اوسه چا د دغې پېښې مسوولیت نه دی منلی.
د جماعت اسلامي ګوند مشر حافظ نعیم الرحمن وایي، معنی دارې خبرې کولای شي چې د طالبانو حکومت او پاکستان ترمنځ اړیکې ورغوي.
هغه دغه راز ټینګار کړی، چې طالبان باید پاکستان ته ډاډ ورکړي چې د افغانستان خاوره د پاکستان پر ضد نه کارول کېږي.
پاکستانۍ ډان ورځپاڼې راپور ورکړی، چې نعیم الرحمن دغه راز د طالبانو او پاکستان حکومت ترمنځ له خبرو ملاتړ کړی.
پاکستان له سعودي عربستان څخه ۱.۲ میلیارده ډالره پور غوښتی.
د یاد هېواد د مالیې وزیر محمد اورنګ زیب له خپل عربستاني سیال سره ټیلفوني خبرو کې د دغه پور غوښتنه کړې.
اورنګزېب هیله څرګنده کړې، چې عربستان یې غوښتنې ته مثبت ځواب ووایي.
نوموړي تېره اوونۍ اسلامي او مشرق بانک سره هم کتلي او غوښتنه یې کړې چې د دوی لاسنیوی وکړي.
د یادونې ده چې پاکستان اوس مهال له بد اقتصادي وضعیت سره مخ دی.