د ایران د بهرنیو چارو وزیر عباس عراقچي وایي ټاکل شوې چې ددې هیواد ولسمشر مسعود پزشکیان په دوه اړخیزو غونډو او یوشمیر ستراتیژیکو سندونو د لاسلیک په موخه تاجکستان او روسیې ته سفر وکړي.
ښاغلي عراقچي ویلي چې د ولسمشر په توګه د ښاغلي پزشکیان دا لومړی سفر دی چې مسکو ته یې ترسره کوي.
دغه سفر به د روانې جمعې په ورځ ترسره شي.
تحریک طالبان پاکستان ډلې د بنو په ډومېل سیمه کې د پاکستاني پوځیانو پر پوستو بریدونه کړي، چې دوه پوځیان یې وژلي.
سیمهییزې سرچینې وایي، دا برید د پوستو له سل مترۍ شوی، چې پکې درې وسله وال هم وژل شوي.
بل لورته د ډي اي خان سیمه کې هم د پاکستاني پوځیانو پر پوستو برید شوی، چې په کې یو پولیس وژل شوی.
په همدې حال کې د خیبر ایجنسي په ورسک کې هم یو پولیس وژل شوی دی.
د سوډان پلازمېنې خرطوم پر شاوخوا سیمو راکټي بریدونه شوي چې ۱۲۰ کسان وژل شوي او لسګونه نور ټپیان دي.
راپورونه وایي، دا لومړۍ شمېرې دي او ښایي د تلفاتو کچه نوره هم لوړه شي.
سوډان کې د دولتي ځواکونو او وسله والو ترمنځ نښتې روانې دي، چې اوس مهال یې سخت زور اخیستی دی.
دمګړی سیمې ته مرستندویه ډلې رسېدلې او د مړو او ټپیانو په خوندي کولو بوختې دي.
د طالبانو حکومت د کورنیو چارو سرپرست وزیر سراج الدین حقاني په کابل کې د سعوي عربستان به سفیر فیصل طلق البقمي سره لیدلي دي.
د طالبانو حکومت د کورنیو چارو وزارت ویاند عبدالمتین قانع په خپله ایکسپاڼه لیکلي چې، په دغې لیدنه کې سراج الدین حقاني د دواړو هېوادونو ترمنځ د ژورو اسلامي او تاریخي اړیکو پر اهمیت خبرې کړې دي.
قانع زیاته کړې، چې په دې لیدنه کې البقمي د طالبانو له حکومت سره د اړیکو د لا پراختیا ژمنه کړې او د دواړو هېوادونو ترمنځ د «ګډو اسلامي او کلتوري ارزښتونو» پر بنسټ د همکارۍ پر دوام یې تاکید کړی دی.
طالبانو د خوست ولایت شېخ زاید پوهنتون ۱۷ استادان منفک کړي دي.
رسنیو کې لاس په لاس شوي مکتوب کې لیدل کېږي چې ټول د شرعیاتو پوهنځي استادان دي.
سره له دې چې دا مکتوب د یاد پوهنتون ادارې ته رسېدلی؛ خو تر اوسه په رسمي ډول د طالبانو حکومت په دې اړه څه نه دي ویلي.
یو شمېر سرچینې بیا وایي چې د دغه پوهنتون ځینې نور استاد بیا له کادري بستونو لرې شوي دي.
د شمالي اتلانتیک تړون سازمان یا ناټو د بالتیک حوزې درې غړي هېوادونه نن له روسیې څخه د ورپېښو احتمالي ګواښونو په اړه غونډه لري.
د یادې غونډې اصلي هدف د روسیې د بېړیو له خوا د احتمالي ګواښونو مخنیوی او د ځینو مهمو تاسیساتو ساتنه بلل شوې.
ایستونیا، لاتویا او لیتوانیا د دې غونډې جوړوونکې دي او ویل کېږي، چې د ناټو سرمنشي او یو شمېر نورمشران به هم په کې برخه ولري.
د یادونې ده، چې روسیه له بالتیک سمندرګي څخه د خپلو تېلو کښتیو د انتقال لپاره ګټه اخلي.
د ملګرو ملتونو د بشري مرستو همغږې کوونکې اداره(اوچا) وايي، افغانستان کې له خلکو سره د مرستو لپاره نږدې ۲۸۰ میلیونه ډالرو ته اړتیا لري.
یادې ادارې ویلي، چې یوازې په روان کال کې ۱۴.۳ میلیونه وګړي روغتیايي برخو ته اړتیا لري.
د دوی په خبره، په پام کې ده، چې له دې ډلې یوازې ۹.۳ میلیونه کسانو ته روغتیايي خدمات وړاندې شي.
د سرچینې د معلوماتو له مخې، چې په اړمنو کسانو کې ۵۳ سلنه یې مېرمنې او پاتې نور یې ماشومان او معلول وګړي دي.
ټاکل شوې چې نن د حماس او اسرائیل ترمنځ په دوحه کې مذاکرات پیل شي.
دا مذاکرات په غزه کې د اوربند طرحې نهايي او عملي کولو په اړه پیلیږي.
تر دې وړاندې د امریکا ولسمشر جوبایډن تمه ښودلې وه، چې راتلونکو ۴۸ ساتونو کې به د بندیانو تبادله پیل شي.
د یادونې ده چې د دغې طرحې یوه یوه کاپي دواړو لورویو ته هم سپارل شوې.
د ملګرو ملتونو د ځورونې او غیر انساني کړنو لپاره راپور ورکوونکی الیس جیل وایي، چې د طالبانو په بند کې زنداني رایان کوربت بېړنۍ روغتیایي درملنې ته اړتیا لري.
نوموړي د طالبانو له حکومت غوښتي چې له مرګ څخه د کوربت د ژغورلو لپاره باید د هغه درملنه وشي.
د الیس په خبره، که د کوربت درملنه ونه شي؛ نو ښایي هغه ان ژوند له لاسه ورکړي.
تر اوسه د طالبانو حکومت په دې اړه څه نه دي ویلي.
د امریکا ولسمشر جوبایډن د خپلې ولسمشرۍ د دورې وروستۍ وینا وکړه.
هغه د امریکا پر بهرني سیاست د خبرو ترڅنګ د حماس له لوري د برمته شویو اسرائیلي وګړو د خلاصون په اړه ویلي چې په دې اړه هم خبرې نهايي شوي.
د بایډن په خبره، له دغې وینا څخه ۴۸ ساعته وروسته به د دغو بندیانو د ازادولو لړۍ پیل شي.
ان بي سي نیوز د یو لوړ پوړي امریکايي چارواکي له قوله ویلي، ښايي په لومړي پړاو کې هغه سرتیري ازاد شي، چې په یو بد وضعیت کې قرار لري.