د افغانستان لپاره د بریتانیا ځانګړي استازي، ریچارډ لیندزي، د ملګرو ملتونو د مرستندویه پلاوي (یوناما) د ماموریت د یو بل کال لپاره د غځېدو هرکلی کړی دی.
ریچارډ لیندزي ویلي چې یوناما د خپلو ملي او نړیوالو شریکانو ترڅنګ د افغانستان له خلکو سره د بشري مرستو په رسولو کې مهم رول لري.
نوموړي زیاته کړې چې دغه اداره د نړیوالې ټولنې د مرستو او هڅو د همغږۍ لپاره هم یو مهم بنسټ دی او د افغانستان له خلکو سره د مرستې په برخه کې اغېزناک فعالیت ترسره کوي.
د هغه په وینا، د یوناما د ماموریت تمدید به د افغانستان لپاره د نړیوالو بشري او پرمختیايي همکاریو د دوام په برخه کې مرسته وکړي.
