د طالبانو حکومت د ارشاد، حج او اوقافو وزارت مرستیال عزیزالرحمن منصور د ایران ملي سرود ته د نه درېدو له کبله د ایران له خلکو بښنه غوښتي.

نوموړی د اسلامي یووالي کنفرانس کې د ایران ملي سرود پر مهال پر خپل ځای ناست وو.

منصور ویلي، ایران یې ورور، ګاونډی او کلتوري شریک دی؛ خو په دوی (طالبان) کې دا کلتور دی، چې دا ډول ترانو ته نه دریږي.

د هغه په خبره دا یو قصدي عمل نه وو، خو د هغه کلتور دوام وو، چې افغانستان کې یې دوی په خپل منځي غونډو کې لري.

نوموړي ویلي، د ایران خلک د ده پر دغې کړنې خواشیني شوي، چې اوس یې دوی له امله بښنه غواړي.

د طالبانو حکومت ریاست الوزرا څخه په خپره شوې خبرپاڼه کې پر علماوو غږ شوی، چې په هغو مناظرو او رسینزو بحثونو کې ونډه وانخلي چې خلک لار ورکي کوي او تشویشونه پیدا کوي.

په خبرپاڼه کې راغلي، علما دې له هغو بحثونو هم لاس واخلي، چې د بعضې خلکو لپاره د فتنې سبب ګرځي او عامه ذهنیت یې له درک څخه عاجز وي.

دوی سپارښتنه کړې چې علما باید په رسنیو او سټیجونو کې هغه مسائیل بیان کړي، چې د عامو خلکو په کې د دنیا او اخرت ګټه وي.

دا خبرپاڼه وروسته تر هغې خپریږي، چې کابل کې په یو خصوصي ټلویزون کې طالب عالم په زغرده وویل چې د طالبانو په واکمني کې باید هیڅوک دا تمه ونه لري چې له شپږم ټولګي پورته به د نجونو ښوونځي پرانېستل شي.

د طالبانو حکومت مشر ملا هبت‌الله اخندزاده یو وار بیا د امربالمعروف وزارت د وروستي قانون پر اجرا ټینګار کړی.

هغه دیني عالمانو سره کتنه کې ویلي، چې عالمان هم باید په دې برخه کې کار وکړي.

نوموړي دیني عالمان د ټولنیز ثبات لپاره مهم بللي دي.

د هبت الله په خبره، پخوا د منبر او نظام ژبه په تضاد کې وه او اوس باید دا ژبه یوه وي.

د یادونې ده چې تر دې وړاندې هم د طالبانو حکومت مشر د امربالمعروف قانون پر پلي کېدو ټینګار کړی و.

یو شمېر سرچینو ویلي، چې پخوانی طالب قومندان عبدالمجید خراساني د صنعت او سوداګرۍ وزارت کې د تشبثاتو د رییس په توګه ټاکل شوی.

نوموړی د سنبلې میاشتې پر اتمه نېټه د طالبانو حکومت له لوري نیول شوی وو.

څه موده وړاندې طالب ویاند ذبیح الله مجاهد هم ویلي وو چې نوموړی په کور کینول شوی.

د یادونې ده چې عبدالحمید خراساني د طالبانو حکومت په منځ کې جنجالي څېره پېژندل کېږي.

ویل کېږي، چې ترکیې هېواد پنځه سوه افغان کډوال نېولي او بیرته یې افغانستان ته را لېږي.

یو شمېر افغان کډوال وايي، د ترکیې هېواد چارواکو ورته ویلي، چې د دایمي استوګنې کارتونه ورکوي او په دې اړه یې ورته ټاکلی ځای هم ښودلی؛ خو کله چې دوی هلته ورغلي، نو پولیسو نیولي او اوس بندیان دي.

په رسمي ډول د ترکیې دولت په دې اړه څه نه دي ویلي؛ خو له یوې مودې راهیسې یې د افغان کډوالو په جبري ډول را شړل پیل کړي دي.

د افغانستان د ملي ازادۍ ګوند ویلي، د جلا وطنه حکومت له جوړېدو هغه وخت ملاتړ کوي، چې د ولسواکۍ اصول، د وګړو بنسټيز حقونه او ټولنیز عدالت پکې په پام کې نیول شوی وي.

د رحمت الله نبیل په مشرۍ یاد ګوند دا څرګندونې وروسته تر هغې کوي، چې څو ورځې وړاندې دوستم په یوه انلاین غونډه کې د جلا وطنه حکومت د جوړېدو طرحه ورړاندې کړه.

د ګوند په اعلامیه کې راغلي، چې هر مشروع او قانوني – سیاسي بدیل دې د ملي اجماع، ټولنیز عدالت او د وګړو اساسي حقونو د تضمین پر بنسټ رامنځته شي.

اعلامیه کې ټینګار شوی، چې که دا حکومت په نړۍوالو غونډو کې د افغانستان استازولي کوي؛ نو دوی یې ملاتړي دي.

د حزب الله ډلې مشر حسن نصرالله ویلي، چې د اسرائیلو د وروستیو بریدونو ځواب به ورکړي.

هغه ویلي، په دې اړه کره وخت ځانګړی شوی او ژر به پرېکړه هم وکړي.

نوموړي اسرائیلو ته خبرداردی ورکړی، چې دوی هره ورځ په لبنان کې د اسرائیلو په لټه دي او که اسرائیل د دوی خاورې ته ننوځي؛ نو د وژلو لپاره به یې ډېر خوښ شي.

نصر الله یو وار بیا ټینګار کړی، چې پر اسرائیل به د دوی بریدونه تر هغې دوام ولري، ترڅو په غزه کې جګړه پای ته نه وي رسېدلي.

د یادونې ده، چې اسرائیل په وروستیو بریدونو کې د حزب الله ډلې تر دېرشو زیات کسان وژلي او تر درې زرو زیات ټپیان دي.

جهادي مشر شیخ الحدیث والقران استاد عبدالرب رسول سیاف د اسلامي نهضت بنسټګر برهان الدین رباني په اړه ویلي، چې یو مهربان شخصیت وو او دی به یې مینه د تل لپاره له یاده ونه باسي.

هغه ویلي، چې نوموړي په دې لاره کې ډېر زحمتونه ګاللي او له ده سره یې د مرستیال په توګه له دندې خوښي څرګنده کړې.

د سیاف په خبره، رباني د ستونزو پر وړاندې لکه غر ولاړ وو او د افغانستان جهاد دوره کې یې بې شمېره تکلیفونه وګالل.

شمالي وزیرستان کې د یو بانک مدیر ووژل شو.

یاد کس د ځایي “نشنل بانک” مدیر و چې نن په میرعلي بازار کې په یو وسله وال برید کې ووژل شو.

د نوموړي سره دغه برید کې دوه تنه نور ټپیان شوي دي.

تر اوسه ددغه برید مسولیت کوم چا نه دی منلی.

د ترکیې د بهرنیو چارو وزیر هاکان فیدان اسرائیل په سیمه کې د کړکېچ په زیاتولو تورن کړي.

هغه د لبنان پر حزب الله وروستیو بریدونو ته په اشارې ویلي، چې حزب الله له ځواب پرته بله لاره نه لري.

نوموړي د ترکیې ټي ار ټي رسنۍ سره خبرو کې ویلي، چې لبنان کې وروستيو بریدونو دا اندېښنه راپورته کړې چې جګړه به مصر، اردن او ټولې سیمې ته ورسیږي.

د یادونې ده چې لبنان کې د تېرې ورځې د بریدونو پایله کې لسګونه کسان مړه او زرګونه ټپیان شوي دي.