د روسیې ولسمشر ولادمیر پوتین سکرتر یوري اوشاکوف وایي، پوتین غواړي د سوریې له پخواني ولسمشر بشارالاسد سره وګوري.
نوموړي د دغې لیدنې نېټه نه ده په ډاګه کړې؛ خو زیاتوي چې دا لیدنه به نږدې وخت کې ترسره شي.
تر دې وړاندې پوتین ویلي وو چې له بشارالاسد سره د لیدلو هوډ لري.
د یادونې ده چې د دمشق تر سقوط وروسته بشارالاسد مسکو ته ولاړ.
اوکرایني چارواکي وایي، چې د روسیې په کازان کې د ایراني بېپیلوټه الوتکو په ساتنځای کې اور لګېدلی.
دوی ویلي، په دغه ځای کې ۱۳۶ الوتکې وې.
نیوزویک د سرچینو په حواله ویلي چې د دغو الوتکو ارزښت ۱۶ میلیونو ډالرو ته رسېده.
روسیې چارواکو تر اوسه په دې اړه څه نه دي ویلي.
ورف جرمي وسله والې ډلې د هایتي ښار په ساحلي ګاونډ سیته سولیل کې لږ تر لږه ۲۰۷ کسان وژلي دي.
د ملګرو ملتونو د بشري حقونو د عالي کمېشنرۍ د دفتر د راپور پر اساس، دا کسان له یوې اوونۍ په کمه موده کې وژل شوي، چې ۷۳ یې ښځې دي.
د سرچینې د معلوماتو له مخې، دا بریدونه د یادې ډلې د درې سوه غړو له لوري هغه مهال شوي چې د ووډ مذهبي مشرانو د دغې ډلې مشر د یاد مذهب په سپکاوي تورن کړی وو.
ددغې پېښې ډیری قربانیان د ووډو معبدونو او مذهبي مراسمو څخه وتښتول شول.
د طالبانو د کورنیو چارو سرپرست وزیر سراج الدین حقاني وایي، د افغانستان او پاکستان د ملتونو اړیکې باید له زیانمنېدو څخه وساتل شي، ترڅو د سیمې ثبات او پرمختګ تضمین شي.
نوموړي دا څرګندونې د افغانستان لپاره د پاکستان ځانګړي استازي صادق خان او راغلي پلاوي سره لیدنه کې کړي.
په دې لیدنه کې صادق خان ویلي، چې د دواړو هېوادونو ترمنځ د ستونزو حل ته ژمن دی او هڅه کوي، چې د کابل او اسلام اباد اړیکې لا پیاوړې شي.
د افغانستان لپاره د پاکستان د ځانګړي استازي محمد صادق خان دا لومړی سفر دی چې کابل ته یې ترسره کوي او ویل کیږي چې په دې سفر کې به د یو شمیر طالب چارواکو سره لېدنې ترسره کړي.
اسرائیلو د لومړي ځل لپاره د حماس د پخواني مشر اسماعیل هنیه په وژلو اعتراف وکړ.
د اسرائیلو د دفاع وزیر اسرایل کاتز ویلي، چې هیواد یې د روان کال په جولای میاشت کې په ایران کې اسماعیل هنیه وواژه.
رویټرز ویلي، چې دې اعتراف په سیمه کې د تهران او د اسرائیلو ترمنځ د کړکیچ خطر زیات کړی دی.
نوموړي د دفاع وزارت منسوبیو ته ویلي، چې دوی به د حماس مشران او د دغې ډلې زیربیناوې له منځه یوسي.
د هغه په خبره، اسرائیل به د حماس نور مشران هم د هنیه، سنوار او حسن نصرالله په برخلیک اخته کړي.
رویټرز خبري اژانس د ترکیې د ولسمشر رجب طیب اردوغان له قوله ویلي، چې انقره د سوریې له نوي مشر احمد الشرع سره نږدې اړیکې لري.
رجب طیب اردوغان په انقره کې د کابینې له غونډې وروسته ویلي، چې ترکیه به د سوریې د خلکو ملاتړ ته دوام ورکړي.
اردوغان زیاته کړې، چې په راتلونکي کې به سوریې ته د ترکي چارواکو سفرونه پراخ شي.
د یادونې ده چې دوه ورځې وړاندې د ترکیې د بهرنیو چارو وزیر هاکان فیدان دمشق ته په سفر هم تللی و او له احمد شرع سره یې په ځینو مسایلو خبرې کړې دي.
د افغانستان لپاره د پاکستان ځانګړي استازي، محمد صادق کابل ته راغلی.
محمد صادق پر خپله اېکسپاڼه لیکلي چې هغه تېر ماښام کابل ته را رسېدلی.
نوموړي ویلي، د طالب چارواکو له لوري یې هرکلی شوی دی.
نوموړي دغه راز زیاته کړې، چې د طالبانو د حکومت له چارواکو سره به بېلابېلې غونډې ولري چې د دواړو هېوادونو ترمنځ اړیکې لا پیاوړې شي.
د یادونې ده چې دا د اسلام اباد او طالبانو تر منځ له ترینګلو اړیکو وروسته د یوه پاکستاني پلاوي لومړی سفر دی.
د طالبانو حکومت د پاکستان د دفاع وزیر خواجه اصف خبرو ته توند غبرګون ښودلی.
د طالبانو حکومت مرستیال ویاند حمدالله فطرت په خپله ایکسپاڼه لیکلي؛ چې دوی د خواجه آصف دغه بې مسئولیته خبرې په کلکه ردوي او په وینا یې دا له تاریخي واقعیتونو څخه د خواجه آصف ناخبري بولي.
فطرت لیکلي:«تاریخ شاهد دی چې سلطان محمود غزنوي رحمة الله علیه هرځل د مظلومو ولسونو خصوصا د مسلمانانو د نجات او آزادۍ لپاره هند او نورو سیمو ته تللی و او غزنوي رحمة الله علیه د ټول مسلمة امت لپاره یو افتخار دی.»
هغه ویلي، چې د پاکستان د دفاع وزیر په کچه اشخاص دومره له حقائقو څخه ناخبره وي د تأسف ځای دی.
نوموړي دغه راز ویلي، چې خواجه اصف په داسې حال کې د سلطان محمود غزنوي په اړه ګستاخانه څرګندونې کوي چې د همدې هېواد په دفاعي میزائیلو باندې د محمود غزنوي نوم ايښودل شوی.
د یادونې ده چې دوه ورځې وړاندې خواجه اصف، سلطان محمود غزنوي د غل او ډاکو په نوم یاد کړی وو.
د روسیې د ولسمشرۍ ماڼۍ ویاند دیمیتري پیسکوف د سوریې د پخواني ولسمشر بشارالاسد د مېرمنې اسما اسد د طلاق د غوښتنې په اړه راپورونه رد کړل.
رویټرز د پیسکوف له قوله ویلي، چې دا راپورونه رښتیا نه دي.
تر دې مخکې یو شمېر ترکي او عربي رسنیو خبر ورکړی و، چې اسما اسد چې په بریتانیا کې زېږېدلې ده، له روسیې څخه د وتلو لپاره د طلاق غوښتنه کړې ده.
د پخواني ولسمشر حفیظ الله امین ځانګړی سکرتر حبیب الرحمن حبیبي وايي، ببرک کارمل د سردار محمد داود خان پر وړاندې د کودتا پلان ونیوو، چې میر اکبر خیبر یې مخالفت وکړ او دا چاره د دې سبب شوه، چې د کارمل او خیبر ترمنځ اړیکې خرابې شي.
نوموړي له آمو ټلویزیون سره په خبرو کې وویل چې کارمل د شوروي اتحاد استخباراتو ته نږدې سړی وو او په دې خاطر شورویانو غوښتل نوموړی په سردار داود د کودتا له لارې واک ته ورسوي.
حبیبي وویل، چې میر اکبر خیبر شوریانو ته د کارمل د مسلسلو راپورونو په واسطه د «کیجيبي» له لوري په کابل کې ووژل شو.
نوموړي د حکمتیار په مشرۍ د حزب اسلامي له لورې د هغه د وژلو خبرې رد کړې او زیاته یې کړه هغه مهال دا ډول اعلامیې د امتیاز اخیستو لپاره صادریدلې.