د اسرائیل پولیس وایي، د نتنیاهو پر استوګنځي یې د راکټونو د توغولو په اړه درې مشکوک کسان نیولي دي.
د فرانسې خبري اژانس د معلوماتو پر اساس، یاد کسان د شنبې شپې پېښې کې د لاس لرلو له کبله نیول شوي دي.
نیول شوي کسان به د اسرائیل کورني امنیت ادارې ته د پوښتنو لپاره ولېږل شي.
تر دې وړاندې د اسرائیل پولیسو ویلي وو چې د نتنیاهو پر استوګنځي یو شمېر راکټونه ور توغول شوي وو؛ خو هغه مهال دی پر خپل استوګنځي کې نه وو.
د مقاومت په نوم جبهې ادعا کړې چې په کندز کې یې د طالبانو د استخباراتو درې غړي وژلي دي.
دوی په یوه خبرپاڼه کې ویلي، چې دا کسان یې د طالبانو د استخباراتو پر مدیریت د شوي برید په پایله کې وژلي دي.
خبرپاڼه کې راغلي، چې په دې برید کې دوه طالب سرتېري وژل شوي او د دوی یو موټر ویجاړ شوی دی.
بل لورته د طالبانو حکومت تر اوسه په دې اړه څه نه دي ویلي.
ټاکل شوې چې د پښتون قامي جرګه به د خپلو بندیانو د خلاصون لپاره د نومبر میاشتې په ۲۱مه نېټه په ټوله پښتونخوا کې لاریونونه پیل کړي.
د یادې جرګې د مشرتابه غړي حنیف پشتین ویلي، علي وزیر له تېرو درېیو میاشتو راهیسې د پاکستان د پنجاب بیلابیلو زندانونو ته وړل شوی او لا یې هم د خلاصون په اړه پرېکړه نه ده وروستۍ شوې.
د نوموړي په وینا، علي وزیر اوس د پنجاب له زندانونو د سند زندانونو ته انتقال شوی دی.
نوموړی د لاریونونو خبره داسې مهال کوي، چې ویل کېږي، تر قامي لویې جرګې وروسته د پښتون ژغورنې غورځنګ مشر منظور پښتین تر سختو ګواښونو لاندې دی.
د اوکراین ولسمشر ولادمیر زیلنسکي ویلي، ټوله هڅه کوي چې روانه جګړه راتلونکی کال د دیپلوماسۍ له لارې پای ته ورسوي.
د رویټرز د راپور له مخې، زیلنسکي ویلي، سره له دې، چې اوس هم جګړه روانه ده؛ خو مسکو بیا هم د سولې د خبرو غوښتونکی دی.
زیلنسکي دغه راز زیاته کړې، چې د روانې جګړې د پای ته رسېدو لپاره باید دوی خپلې ټولې هڅې وکړي.
دا په داسې حال کې ده، چې ټرمپ هم د دغې جګړې په پای ته رسېدو ټینګار کوي.
د کاناډا حکومت ویلي، چې د طالبانو له لوري د دوی د یو متقاعد سرتېري نیولو موضوع څېړي او دا د کاناډا په لومړیتوبونو کې ده.
د دغه هېواد لومړي وزیر جاسټین ټروډو ویلي، چې د نیول شوي سرتېري ډېوېډ لاوري کورنۍ سره قونسلي ملاتړ شوی او د دوی حکومت په دې برخه کې له ټولو لارو هڅه کوي چې دغه ستونزه حل کړي.
تر دې وړاندې کاناډايي رسنۍ خبر ورکړی وو، چې طالبانو په کابل کې متقاعد کاناډايي پوځي ډېوېډ لاوري نیولی دی.
تر اوسه د طالبانو حکومت په دې اړه څه نه دي ویلي.
اسرائیل یو وار بیا په غزه کې هغه ښوونځی بمبار کړی، چې له جګړې څخه پناه غوښتونکو په کې پناه اخیستې وه.
د سرچینو د معلوماتو له مخې، په دغه برید کې لس تنه وژل شوي او شل نور ټپیان دي.
بل لورته د غزې روغتیا وزارت اعلان کړی، چې بمبار شوی ښوونځی د ابو عاصي په نوم وو، چې د ملګرو ملتونو له لوري یې ملاتړ کېده.
اسرائیلي چارواکو تر اوسه د دغه بمبار شوي ښوونځي په اړه څه نه دي ویلي.
لیکواله: فاطمه ملکزۍ
رانجه د افغاني او اسلامي کلتور په چوکاټ کې ځانګړی اهمیت لري. دا نه یوازې د سینګار یوه دودیزه برخه ده، بلکې په ډېرو ځایونو کې د سترګو د درملنې په توګه هم کارول کېږي. د رانجو استعمال د سیمې د کلتور، دودونو او خلکو د اړتیاوو سره سم مختلف ډولونه لري.
رانجه یوازې په افغانستان کې نه، بلکې د هند نیمې وچې او منځنۍ آسیا د لرغونو تمدنونو یوه مهمه برخه ګڼل کېږي.
دا په لرغوني مصر، هند، فارس او منځنۍ آسیا کې د ښکلا او درملنې لپاره کارول کېده. خلکو باور درلود چې رانجه د سترګو د ناروغیو مخنیوی کوي او د سترګو روغتیا ته ګټور دی. په هند او افغانستان کې رانجه د ښځو د زینت یوه مهمه برخه وه. دا په ځانګړې توګه د ودونو او نورو ځانګړو مناسبتونو لپاره کارول کېده.
رانجه په کورونو کې له طبیعي موادو څخه جوړېده، لکه د زیتون یا بادامو د تیلو لوګی چې په نرم پوډر بدلول کېده. په افغانستان کې د رانجو جوړول ځانګړې طریقې لري. د رانجو توره تېږه د یوې اونۍ یا څو ورځو لپاره په پاکو اوبو کې خیشته کېږي. بیا دا تېږه د یوې ځانګړې غونډارې په مرسته په دقت سره میده کېږي، او د پاکوالي لپاره پکې لږ اوبه اضافه کېږي. ځینې وختونه، میده شوی رانجه د ململ له نرۍ ټوټې څخه هم تېرېږي ترڅو نرموالی یې یقیني شي. په کلیوالو سیمو کې ځینې ښځې د رانجو لپاره کوچ، سنګې بصري، یا نور طبیعي مواد ورګډوي، چې دا د سترګو د روښانتیا او روغتیا لپاره لا ګټور کړي.
په ښارونو کې د رانجو جوړولو چارې اکثراً نارینه ترسره کوي، خو په کلیوالو سیمو کې دا یوازې د ځانګړو ماهرو ښځو مهارت دی. په یوه کلي کې معمولاً یو یا دوه ښځې د رانجو جوړولو تجربه لري.
رانجه د ښکلا او درملنې په دواړو برخو کې ځانګړی ځای لري. طبیعي رانجه سترګې له ګردونو او دوړو څخه ساتي. سترګې جذابې او روښانه ښکاره کوي . طبیعي رانجه د سترګو ستړیا کموي او د نظر روښانتیا ته ګټور ګڼل کېږي.
رانجه یوازې د سترګو لپاره نه، بلکې په افغانې ټولنه کې د نورو دودیزو کارونو لپاره هم کارول کېږي. ښځې د ښکلا لپاره په مخ د رانجو خالونه وهی. د بد نظر او حسد څخه د ماشومانو د ساتنې لپاره، نویو زیږیدلو ماشومانو ته د رانجو خال وهل کېږي او پر پزه یې هم یوه د رانجو کرښه باسي.
په افغانستان کې رانجه د ښکلا او فرهنګي میراث یوه مهمه برخه ده. په دودیز ډول، دا په کلیوالو سیمو کې د ښځو لپاره د ښکلا یوه ارزانه او اسانه وسیله وه. رانجه نه یوازې د ښځو لپاره، بلکې ځینې وخت د ماشومانو د سترګو د ساتنې لپاره هم کارول کېده، چې له دوړو او نورو زیانونو څخه یې سترګې خوندي پاتې شي.
د عصري ښکلايي موادو پراختیا سره، رانجه اوس مهال د کاجل، آي لائنر، او نورو معاصرو ښکلايي موادو لخوا تر ډېره یې ځای نیولی دی. سره له دې، رانجه لا هم د دودیزو او فرهنګي محفلونو لپاره کارول کېږي او په ځانګړو مناسبتونو کې د افغانې میرمنو لپاره ځانګړی ارزښت لري.
رانجه د پښتو ادب او هنر یوه مهمه موضوع ده. د دې یادونه په ګڼو سندرو، شاعرۍ او متلونو کې شوې ده. د قمر ګلې مشهوره سندره:
“زه چې په تورو سترګو تور رانجه کړم پورې مورې
ځواني مې ګورې مورې جدا له یاره…”
په دې توګه، د پښتنو شاعرانو په شعرونو کې رانجه هم یو مهم عنصر دی. په پښتو ادب کې، رانجه نه یوازې د ښکلا بلکه د عاطفي او عاشقانه روابطو نښه هم ګڼل کېږي.
رانجه د افغانې او اسلامي کلتور یوه نه بېلېدونکې برخه ده. دا یوازې د ښکلا وسیله نه ده، بلکې د درملنې، روحاني پاکوالي او فرهنګي هویت نښه ده. د رانجو دودیزې لارې او جوړونې طریقه په خپله د دې کلتوري ارزښت یوه ښکاره بېلګه ده، چې د خلکو په ورځني ژوند او دودیزو مراسمو کې مهم ځای لري.
د ملي مقاومت په نوم جبهې ادعا کړې چې په بدخشان کې یې ۸ طالب سرتېرو ته مرګ ژوبله اړولې ده.
یادې جبهې په خپله ایکسپاڼه لیکلي، چې تېره شپه د دوی د ډلې کسانو د بدخشان ولایت د ارګ او کشم په ولسوالیو کې په طالب سرتېرو بریدونه وکړل چې څلور طالب سرتېري یې وژلي او ۴ نور یې ټپیان کړي.
د طالبانو حکومت تر اوسه په دې اړه څه نه دي ویلي.
د پاکستان د پوځ لوی درستیز جنرال عاصم منیر له افغانستان سره د ډيورنډ پر کرښه د ساتنې او د ترهګرو ډلو په وړاندې د پولو د مدیریت لپاره د یو پیاوړي سیستم د رامنځته کېدو خبر ورکړی دی.
ډان ورځپاڼې د جنرال عاصم منیر له قوله ویلي چې، دوی دا سیستم د ترهګرو ډلو نه د پولو د ساتلو په موخه رامنځته کړی دی.
جنرال عاصم منیر پهدې اړه نور جزیات نه دي ورکړي؛ خو ویلي چې په افغانستان کې د طالبانو حکومت دې دا باوري کړي چې د افغانستان خاوره د ترهګرو ډلو له لوري نه استعمالیږي.
د یادونې ده چې تېره ورځ د پاکستان د بهرنیو چارو وزارت ویاندې ممتاز زهرا بلوڅ ویلي، چې له افغانستان څخه د راپېښو ګواښونو په اړه باید نور د دوی زغم ونه ازمایل شي.
د طالبانو حکومت تر اوسه په دې اړه څه نه دي ویلي.
کاناډایي رسنۍ سي ټي وي خبر ورکړی چې طالبانو کابل کې یو متقاعد عسکر یې نیولی دی.
دوی د سرچینې د نوم نه ښودلو په شرط ویلي چې دعه عسکر ډیویډ لاوري نومیږي او د تېرې دوشنبې په ورځ کابل ته له داخلېدو سره سم نیول شوی دی.
د معلوماتو پر اساس، ریون رای کابل کې د خصوصي امنیتي او مشورتي خدمتونو شرکت اداري مشر و.
تر اوسه د طالبانو حکومت د هغه د نیول کېدو په اړه څه نه دي ویلي.