له ملي جنبش ګوند خفه شوي قومندان نظام الدین قیصاري له مارشال دوستم سره ټیلیفوني روغه جوړه کړې.

په دغه ټیلیفوني اړیکه کې دوستم د ګوند د غړیو ترمنځ پر یووالي ټینګار کړی او ویلي یې دي، چې له ایران سره یې اړیکې ښې دي.

دوستم ویلي، ایران ورسره ژمنه کړې چې د جنبش ګوند غړي به له خپل هېواد نه باسي.

قیصاري واک ته د طالبانو تر رسېدو وروسته د جنبش ګوند خلاف شو او څو ځله یې د دغه ګوند پر مشر هم توندې نیوکې وکړې.

هغه د طالبانو له راتګ سره سم مزار کې ونیول شو؛ خو له خوشې کېدو وروسته ایران ته وتښتېد، چې هلته هم له یو شمېر جعلي اسنادو سره نیول شوی وو.

نوموړی اوس مهال ایران؛ خو دوستم بیا ترکیه کې ژوند کوي.

د افغان سولې لپاره د امریکا پخواني ځانګړي استازي زلمي خلیلزاد ویلي، چې د نومبر په ۲۴ مه باید د نړۍ سترکې پاکستان ته وي.

هغه پاکستان کې وروستیو لاریونونو ته هیله ښودلې، چې د عمران خان د خوشې کېدو په برخه کې به ګټور تمام شي.

خلیلزاد د پاکستان له حکومت هم هیله کړې چې د خلکو حق ته درناوی وکړي.

د یادونې ده چې عمران خان له خپلو پلویانو غوښتي وو چې د نومبر په ۲۴ مه ټول پاکستان کې لاریونونه وکړي.

روسیې ویلي، د فرانسې له لوري کییف ته پر روسیې د برید اجازه ورکول د اوکراین د بربادۍ سبب کېږي.

د روسیې د بهرنیو چارو وزارت ویاندې ماریا زاخاروا خبرداری ورکړی، چې له اوکراین څخه د فرانسې ملاتړ د کییف د نابودۍ په معنی دی.

تېره ورځ فرانسې ویلي وو، چې اوکراین کولای شي فرانسوي لرې واټن ویشتونکي توغندي د روسیې پر خاوره وکاروي.

د افغانستان د ازادۍ جبهې مشر یاسین ضیاء ویلي، هڅه کوي چې په راتلونکي کال کې پر طالبانو نور فشار هم وارد کړي.

نوموړي ویلي، د عدالت او افغانانو د بیرته واک اخیستنې لپاره به له جګړې لاس وانخلي.

د هغه په خبره، تېر کال کې یې د طالبانو پر وړاندې د پام وړ لاسته راوړنې لرلې دي.

د یادونې ده چې د ازادۍ جبهې تر دې وړاندې هم په ځلونو ویلي چې د جګړې له لارې به طالبان له منځه یوسي.

د تخار ولایت د تالقانو له زندان څخه دوه هغه قاتلان تښتېدلي، چې ۹ میاشتې وړاندې یې د دشت قلعه په کروغ سیمه کې یو غریب مزدور کار وژلی وو.

یاد قاتلان نیک محمد او عین الدین نومیږي او ویل کېږي چې پاکستان ته تښتېدلي دي.

باوري سرچینو حماسه میډیا ته ویلي چې یاد کسان د تخار ولایتي قاضي ابوصفیان او د زندان د مشر په مرسته تښتېدلي دي.

د مقاومت په نوم جبهې ادعا کړې چې کابل کې یې دوه طالبان وژلي دي.

د سرچینې د معلوماتو له مخې، دا طالب سرتېري یې د ښار د لومړۍ امنیتي حوزې په مربوطاتو کې وژلي.

یادې جبهې زیاته کړې، چې دا برید یې غرمه مهال د طالبانو د استخباراتو پر ځواکونو کړی دی.

دوی ویلي، چې د طالب سرتېرو دوه میله وسله او یوه مخابره یې هم ترلاسه کړې.

د پښتون ژغورنې غورځنګ مشر منظور پښتین په کُرمه کې د وروستیو پېښو په اړه خواشیني ښودلې.

منظور پښتین ویلي، هڅه کوي چې له بېلابېلو سیمو سلګونه مشران راټول او هلته دایمي سوله راولي.

نوموړی زیاتوي، څو ورځې وړاندې یې په سیمه کې د سولې لپاره ګامونه پورته کول؛ خو ریاست منع کړي وو.

دا په داسې حال کې ده چې هلته د سنیانو او شعیه ګانو ترمنځ سختې جګړې روانې دي او ګڼه مرګ ژوبله یې یو بل ته اړولې ده.

ایران کې د افغانستان پخواني سفیر عبدالغفور لېوال لیکلي، چې د کُرمې جګړې مذهبي جګړې دي او د دغو جګړو منطق بې معنی دی.

نوموړي ویلي۱۴۰۰ کاله پخوا فقه کې توپیر راغی، خو د کُرمې، پاړه چینار او هنګو پښتنو پکې لاس نه درلود.

د هغه په خبره، پښتانه د انګریزانو ځای‌ناستي لوبوي؛ خو دوی لاهم نه پوهېږي.

د یادونې ده، چې کُرمه کې د شعیه او سني جګړو له کبله لسګونه کسان وژل شوي او لا هم دغه جګړه دوام لري.

کُرمې ته د تلونکي لوړ پوړي پاکستاني پلاوي پر چورلکې برید شوی.

پاکستاني رسنیو لیکلي، په دغه برید کې چورلکه نه ده وېشل شوې؛ خو دوی په دې اړه پلټنې پیل کړې، چې برید چا او د کومې موخې لپاره کړی وو.

کُرمه کې حالت له تېرو څو ورځو راهیسې خراب دي او هلته ګڼ شمېر عامو خلکو د وژل شویو کسانو په غبرګون کې پر لاریونونو هم لاس پورې کړی.

د طالبانو د حکومت مشر شیخ هبت الله اخوندزاده د کورنیو چارو د سرپرست وزیر سراج الدین حقاني واک محدود کړی.

حماسه میډیا د طالبانو د واټس اپ ګروپ څخه داسې معلومات ترلاسه کړي چې په کې لیکل شوي چې شیخ هبت الله اخوندازده د والیانو او امنیه قوماندانو د ورځنیو چارو واک کندهار ته انتقال کړی او تر دې وروسته به والیان او امنیه قوماندان له کورنیو چارو وزارت سربېره د هبت الله له دفتر څخه هم اجازه اخلي.

تر دې وړاندې هم د طالبانو مشر د کورنیو چارو او دفاع وزیرانو واک محدود کړی وو.