برېټانیا کې یوې هندي کورنۍ ځان افغان کډوال معرفي کړی او اوس مهال د برېټانیا حکومت هغوی مجرمین پېژندلي دي.
ډیلي میل لیکلي، دغې کورنۍ غوښتل چې د افغان کډوالو لپاره له ورکړل شویو اسانتیاو ګټه واخلي.
دغې څلور کسیزې کورنۍ، چې پخوا یې ځانونه د هند استوګن معرفي کړی وو، په ۲۰۲۲ کال کې یې د برېټانیا حکومت ته ویلي چې دوی افغانان دي.
د یادونې ده چې تر دې وړاندې هم ګڼو پاکستانیانو په بېلابېلو هېوادونو کې د پناه اخیستو لپاره ځانونه افغانان معرفي کړي.
پر یمن د اسرائیلي ځواکونو تر برید وروسته د دغه هېواد پوځ د اسرائیل یو شمېر سیمې په نښه کړي.
د ایراني رسنیو د راپورونو له مخې، د دغو بریدونو له کبله په تل ابیب کې د خطر زنګ وهل شوی او تر دوو میلیونو زیات اسرائیلیان پټنځایونو ته تښتېدو ته اړ شوي دي.
سرچینه زیاتوي، د یمن ځواکونو د بریدونو له کبله ۱۶ اسرائیلیان وژل شوي.
د طالبانو د بهرنيو چارو وزير مولوي امیرخان متقي په پکتيکا کې د طالبانو بريد له انصاف څخه لیرې وبلله او ويې ويل چې افغانان ښه او بد نه هېروي.
ښاغلي متقي وویل:«موږ به د جهاد پر مهال د پاکستان احسان او د پکتیکا په برمل ولسوالۍ بریدونه هېر نه کرو.»
امیرخان متقي پرون پر افغانستان د پخواني شوروي د یرغل د ۴۵مې کلیزې په مناسبت جوړې شوې غونډې ته وویل چې پاکستان د پکتیکا په برید کې د وزیرستاني کډوالو په ګډون ماشومان، ښځې او سپین ږیري وژلي دي.
نوموړي ټینګار وکړ چې د وزیرستان کډوالو لس کاله وړاندې د پاکستان د حکومت له خوا د خپلو کورونو له ویجاړولو وروسته افغانستان ته پناه راوړې وه او اوس په سختو شرایطو کې ژوند کوي.
د حزب اسلامي مشر ګلبدین حکمتیار په یوې اعلامیې کې په پکتیکا کې د پاکستان هوایي برید غندلی او دا یې د افغانستان پر حریم ښکاره تېرې بللی.
د ښاغلي حکمتیار اعلامیه چې د نوموړي ګوند اړوند ډیلي شهادت ایکسپاڼې خپره کړې په کې لیکل شوي:«كه اسلام آباد د بريد لپاره دا توجيه وړاندې كوي چي دلته یې د مخالفو وسله والو مركزونه په نښه كړي؛ نو دا وسله وال خو يو مهال د پاكستان له مدرسو افغانستان ته د دوى له لوري او د افغانانو خلاف د جگړې لپاره رالېږل شوي وو؛ پاكستاني سياستوال اعتراف او اعتراض كوي چي ولي دېرش زره پاكستاني جنگيالي افغانستان ته د جنگ لپاره لېږل شوي وو؟»
د حزب اسلامي مشر د طالبانو او پاکستان حکومتونو ته د مشورې په ډول لیکلي:« اسلام آباد دې د وسله والو مخالفينو ستونزه د كور دننه او د تدبير، تعقل او حكمت په مرسته حل كړي او هم د خپلو سياسي مخالفينو ستونزه؛ دا سيمه په مجموع كې امن او د جگړو ختمولو ته ضرورت لري؛ نه د يوې بلي جگړې پيلولو ته؛ كابل ته هم دغه مشوره لرو.»
د ډیورنډ کرښې ته څیرمه په ډنډ پټان او کرمې کې د طالبانو او پاکستاني ځواکونو د تېرې شپې په بریدونو کې د اوښتې مرګ ژوبلې په اړه معلومات نشته.
یو شمیر سرچینو ویلي چې دغه بریدونه تیره شپه پر ډیورند رامنځته شوې خو د اوښتې مرګ ژوبلې په اړه معلومات نشته.
د پښتون ژغورنې غورځنګ غړي حنیف پشتین د طالبانو اعلامیې ته په غبرګون کې ویلي چې په پکتیکا کې میشت د وزیرستان اوسیدونکو ته د مهاجر ویل سم کار نه دی.
ښاغلي پشتین ویلي په پښتونخوا کې افغانانو او په کابل کې وزیرستانیانو ته د مهاجر کلمه استعمالول د پېنډۍ او پنجاب ادبیات دي او هيڅوک دا حق نه لري چې له دوی هویت (افغانیت) واخلي.
د پښتون ژغورنې غورځنګ دغه غړي زیاته کړې چې وزیرستانیان په پکتیکا کې مهاجر نه بلکې د خپل افغان وطن پر سینه مېشت دي.
د هېواد پخواني ولسمشر حامد کرزي ویلي، چې هند خپل یو تکړه زوی له لاسه ورکړ.
ښاغلي کرزي په خپله ایکسپاڼه لیکلي، چې ډاکټر من موهن سینګ د افغانستان د خلکو یو نه هیریدونکی متحد او ملګری و.
نوموړي زیاته کړې چې د موهن سنګ په مړینه ژور خپګان څرګندوي او په وینا یې د هغه کورنۍ، حکومت او د هند خلکو ته د خپلې ژورې خواخوږۍ مراتب وړاندې کوي.
هندي رسنۍ وایي، د هند پخوانی لومړی وزیر من موهن سنګ د ۹۲ کلونو په عمر ومړ.
د هندي رسنیو په خبره، من موهن سنګ د دغه هېواد ډیلي د آل انډیا طبعي علومو په انسټېټیوټ کې مړ شوی دی.
من موهن سنګ د ۲۰۰۴ کال څخه تر ۲۰۱۴ کال پورې د همد د لومړي وزیر په توګه دنده ترسره کړې ده.
د پرځیدلي جمهوري نظام د چارو ادارې لوی رییس ډاکتر فضل محمود فضلي د کابل پوهنتون د فارغانو سپین رنګه لباس ته په غبرګون کې په خپل ایکسپاڼې لیکلي: «طالب او مجاهد نه یوازې د ښکیلاک ارزانه مزدوران دي، بلکې د بدرنګۍ او تورې دورې نمایندګان هم دي.»
طالبان وایي، د فارغینو سپین رنګه لباس افغاني دی، په داسې حال کې چې د ټولنیزو رسنیو ګڼو کارونکو دا لباس د طالبانو فرهنګ بللی او لیکلي، چې دا د افغانانو فرهنګ نه دی او که وی د کابل پوهنتون له تاسیسه تر اوسه دا د اشپزانو یونیفورم چا نه دی اغوستی.
ویل کېږي، چې خوست کې طالبانو د هغو کسانو مخه نیولې، چې غوښتل یې پر پکتیکا او خوست د پاکستان د وروستي بمبار له کبله لاریون وکړي.
د سیاسي چارو شنونکي نجیب ننګیال ویلي:«خوست کې یوې ډلې افغانانو د پاکستان د تېري په ضد د لاریون تابیا نیولې وه؛ خو د حلقه بګوش غلام رژیم استخباراتو یې مخه نیولې.»
نوموړی وایي، طالبانو د لاریون تابیا کوونکو ته ویلي چې زمونږ اړیکې له دوست هېواد سره مه خرابوئ.