د افغانستان پخواني ولسمشر محمد اشرف غني په افغانستان کې په طالبانو او پاکستاني حکومت غږ کړی چې د پښتونخوا او بلوچستان خلکو ته د انتخاب حق ورکړي.

ښاغلي غني په خپلې ایکس‌پاڼې په پکتیکا او خوست کې د پاکستان د هوايي ځواکونو برید غندنې په اړه اعلامیې کې لیکلي:«افغانستان، خیبر پښتونخوا او بلوڅو ته له نورو قومونو سره په ګډه په بلوچستان کې د سوله ییز ژوندانه، ودانۍ او سوکالۍ امکان او انتخاب ورکړ شي او افغانستان ته د ستراتېژیک سرحد د کتو پرځای، د هغه بشپړې خپلواکۍ ته درناوی وشي.»

پخواني ولسمشر لیکلي، لسیزې وشوې چې د ډیورنډ کرښې د دواړو خواوو د ولسونو د ځپنې، او د ځینو کړیو د سیاسي ګټو له پاره هلته د تاوتریخوالي د پارونې او وژنې تګلاره پرله پسې پراخېږي.

ښاغلي غني لیکلي:«انګرېز استعمار له لویه سره دا کرښه د ګډ تاریخ، ګډ کلتور او ګډ فکر لرونکو ولسونو د بېلولو او د هغوی د ودې د مخنیوي له پاره ایستلې او د هغوی فزیکي امحا او وژنه یې دغه هدف ته د رسېدو وسیله ټاکلې وه.»

دا لومړی ځل دی چې یو افغان سیاستوال د پاکستان پر وړاندې دا ډول قاطع او ښکاره نظر څرګندوي.

پخواني ولسمشر محمد اشرف غني د پکتیکا په برمل ولسوالۍ کې د پاکستان برید جنایت بللی او دا یې د ګډې وینې د بهیدو دوام بللی.

ښاغلي غني ویلي، پاکستاني کارپوهان او فعالان په دې اړه یوې موافقې ته رسېدلي چې له خیبر پښتونخوا او بلوچستان سره د هغه هېواد د چارواکو چلند د بنګله دېش له جوړېدو مخکې له ختیځ پاکستان یا ختیځ بنګال ته ورته دی.

پخواني ولسمشر خبرداری ورکړی چې دا ډول کړنې ددې پرځای چې د پاکستان کورنۍ کشاله هواري کړي، د ویش لامل یې کیږي.

د غني په خبره، د ستونزو د حل لپاره نړۍ ته سترګې نیول عاقلانه سیاست نه دی.

د یادونې وړ ده چې پکتیکا په برمل او خوست کې پاکستاني هوایي بمباریو کې تر پنځوسو ډیر هیوادوال وژل شوي وو او ګڼ نور ټپیان دي.

د پاکستان استخباراتو پوري تړلي ټویټر حساب” مارخور” جلال اباد کې د هند قونسلګري د ټپي شوي افغان کارکوونکي عبدالودود عکسونه خپاره کړي.

دوی د عبدالودود د پاسپورت تصویرونه هم خپاره کړي او ویلي یې دي چې نوموړی د هند استخباراتو مهم غړی و او پاکستان کې یې ورانکارې کړنې ترسره کولې.

دوی ویلي، د ۲۰۲۱ کال له سیاسي تحوول وروسته نوموړی د “را” یا د هند استخباراتو سره وو، چې اوس یې بېرته سفارت کې دنده پیل کړې وه.

په ورته وخت کې پاکستان کې پخواني افغان مرستیال سفیر شمس زردشت اندېښنه څرګنده کړې چې ښایي پاکستان د افغانستان محرمو اسنادو ته لاسرسی موندلی وي.

نوموړي ویلي، دغه ډول تصویرونه هوایي ډګرونو کې اخیستل کېږي چې تر ډېره محرم وي.

د پاکستان د بهرنیو چارو وزارت ومنله چې افغانستان کې یې بریدونه کړي.

د یاد وزارت ویاندې ممتاز زهرا بلوڅ ویلي، چې دا بریدونه یې په تروریستي ډلو ترسره کړي.

هغې د ځای له نوم اخیستلو پرته وویل، چې فرضي کرښې ته نږدې یې د افغانستان په سیمو کې پر ترهګرو بریدونه کړي.

د بلوڅ په وینا، پاکستان دا بریدونه د خپلو خلکو او پاکستان پر وړاندې د امنیتي ګواښونو کمېدو لپاره ترسره کړي.

د یادونې ده چې تېره شپه د پاکستان جیټ الوتکو د پکتیکا برمل ولسوالي کې د عامو خلکو کورونه بمبار کړل، ښځې او ماشومان یې شهیدان کړل.

د ملي امنیت پخواني سلاکار ډاکټر رنګین دادپر سپنتا ویلي، چې پر افغانستان د پاکستان بریدونه او د عامو خلکو وژل د نړیوالو قوانینو ښکاره نقض دی.

هغه ویلي، پاکستان باید وپوهیږي چې خپل کرل به وریبي.

نوموړی زیاتوي، هر هېواد چې له مشروع حکومت بې برخي وي، نړۍ یې غږ نه اوري.

د طالبانو د بهرنیو چارو سرپرست وزیر امیرخان متقي د پکتیکا په برمل ولسوالي کې د پاکستان برید ته په غبرګون کې ویلي چې افغانان په خپله خاوره تېری نه هیروي.

متقي ویلي، پاکستان باید له دوی سره غوره مسؤلانه تګلاره غوره کړي.

متقي دغه راز زیاته کړې، چې پاکستان کوم د ننګ کار نه دی کړی، فقط یو څو ښځې او ماشومان یې شهیدان کړل.

د یادونې ده چې د برید سیمې ته نن د طالبانو د قومونو او قبایلو چارو او دفاع سرپرست وزیران هم ورغلي دي.

غزه کې یو وار بیا د اسرائیلي ځواکونو په بریدونو کې پنځه خبریالان وژل شوي.

دا بریدونه نن شوي چې د پنځو خبریالانو په شمول پکې لس تنه وژل شوي او ګڼ شمېر نور ټپیان دي.

وژل شوي خبریالان د القدس الیوم ټلویزون کارکوونکي وو.

اسرائیلو تر اوسه په دې اړه څه نه دي ویلي.

نن د جدي شپږمه؛ پر افغانستان د شوروي اتحاد د یرغل له ورځې سره برابره ده.

شوروي اتحاد د جدي په ۶مه په افغانستان یرغل راوړ او دلته د حفیظ الله امین واکمني نسکوره شوه.

د شوروي اتحاد پر وړاندې افغانانو جهاد پیل او د نږدې دوو میلیونو شهیدانو په ورکولو سره یې بېرته خپلواکي واخیسته.

د چارو شنونکي وایي، د شورویانو تر ماتې وروسته د مجاهدینو خپل منځي اختلاف افغانستان یوې بلې لویې ستونزې سره مخ کړ او یو لوی فرصت یې له لاسه ورکړ.

د دغې ورځې په مناسبت طالبانو هم په یو خپرې کړې اعلامیه کې د افغانانو مېړانه ستایلې او د شوروي یرغل یې غندلی دی.

د سوریې نوي حکومت په دغه هېواد کې د کرسمس لمانځلو ته د اجازې تر څنګ د دغو مراسمو کلک امنیتي تدابیر هم ټینګ کړي وو.

د سوریې عیسویان په دغه هېواد کې د کرسمس لمانځلو لپاره ډلې ډلې ځانګړو کلیساګانو ته راټول شوي وو.

سره له دې چې شام التحریر یوه مذهبي جنګي ډله وه؛ خو د واک ترلاسه کولو وروسته یې خپل سیاست بدل او خلکو ته یې هر ډول ازادي ورکړه.

رویټرز خبري اژانس ویلي، چې سوریه کې د مخالفو وسله والو په برید کې ۱۴ پولیس وژل شوي دي.

د سرچینې د معلوماتو له مخې، دا برید د بشار الاسد واکمني ته د ژمنو کسانو له لوري شوی.

دا برید د سوریې په طرطوس سیمه کې شوی.

بل لورته د سوریې نوي حکومت هم د دغه برید پخلی کړی.

د سوریې د نوي حکومت له راتګ وروسته دا لومړی ځل دی، چې د دوی پر ځواکونو دا ډول لوی برید ترسره کېږي.