د بلوڅ یووالي کمېټې مشرې ماهرنګ بلوڅ په یوه خبرپاڼه کې چې له زندانه خپره شوې، په بلوچستان کې د ځینو پخوانیو افغان پوځیانو د احتمالي فعالیتونو په اړه اندېښنه څرګنده کړې ده.
هغې ویلي، په تېرو څو میاشتو کې د بلوچستان له بېلابېلو سیمو داسې راپورونه ترلاسه شوي چې ګواکې د افغانستان د پخواني نظام ځینې پوځي کسان له پاکستاني امنیتي ځواکونو سره یو ځای په عملیاتو کې برخه اخلي.
ماهرنګ بلوڅ ادعا کړې چې دغه کسان د بلوڅانو پر ضد په ځینو عملیاتو او کړنو کې ښکېل دي او دا وضعیت کولای شي د افغانانو او بلوڅانو ترمنځ پر تاریخي اړیکو منفي اغېز وکړي.
هغې همداراز ویلي چې په یوه سیمه کې د یوه ښوونځي د پوځي مرکز په توګه د کارېدو ادعاوې هم شته.
د بلوڅ یووالي کمېټې مشرې خبرداری ورکړی چې دا ډول راپورونه د بلوڅانو ترمنځ اندېښنه او ناخوښي زیاتوي.
هغې د افغانستان له چارواکو غوښتي چې د دغو ادعاوو په اړه پلټنې وکړي او که داسې کسان موجود وي، د هغوی د فعالیتونو مخه ونیسي.
ماهرنګ بلوڅ ټینګار کړی چې بلوڅان او افغانان له اوږدې مودې راهیسې تاریخي او کلتوري اړیکې لري او دواړو ولسونو باید د سیاسي شخړو او لنډمهالو ګټو له امله له یو بل څخه لرې نه شي.
هغې ویلي، دا اړیکې باید د دولتونو د تګلارو، شخصي ګټو او سیاسي معاملاتو قرباني نه شي.
