د طالبانو حکومت مشر شیخ هبت الله اخوندزاده موسساتو ته امر کړی چې ښځینه کارمندانې له دندو منفک کړي.
ټولنیزو رسینو کې لاس په لاس شوي مکتوب کې لیدل کېږي، چې ټولې موسسې د دغه امر په عملي کولو مکلفې دي.
د طالبانو اقتصاد وزارت په کندهار کې یوې موسسې ته دغه حکم اورولی او ویلي یې دي، چې که موسسې دغه حکم عملي نه کړي؛ نو فعالیتونه به یې وتړل شي.
د طالبانو حکومت د امر بالمعروف کسانو کونړ کې د یوې اجباري نکاح مخه نیولې.
یاد وزارت په خپله ایکسپاڼه لیکلي، چې په کونړ کې یې د یوې ۱۸ کلنې پیغلې نکاح چې ۷۰ کلن سپینږیري سره تړل کېده مخه نیولې.
دغه وزارت زیاته کړې، چې د یادې اتلس کلنې نجلۍ پلار د دوه سوه زرو افغانیو په بدل کې غوښتل خپله لور اویا کلن بوډا ته په نکاح کړي.
د روسیې د بهرنیو چارو وزارت ویاندې ماریا زاخاروا له کابل او اسلام اباد غوښتي، چې د ستونزو د حل لپاره له خبرو اترو کار واخلي.
نوموړې ویلي، مسکو د افغانستان او پاکستان ترمنځ په فرضي کرښه د وروستي کړکېچ له کبله اندېښمن دی.
هغې ویلي، دوی هیله لري، چې کابل او اسلام اباد د ستونزو حل په رغنده خبرو کې ولټوي.
دا په داسې حال کې ده، چې پر پکتیکا د پاکستان د جټ الوتکو له بمبار وروسته؛ تېره ورځ خوست او پکتیا کې له فرضي کرښې هاغاړه طالبانو پاکستاني پوځیان په نښه کړي وو.
اسرائیلي رسنیو د اسماعیل هنیه د وژل کېدو څرنګوالي په اړه معلومات خپاره کړي.
د ټایمز اف اسرائیل ویلي، چې د اسماعیل هنیه په بالښت کې هغه ته بم ځای پر ځای شوی وو.
دا بم له څو میاشتو وړاندې په دغه خونه کې ځای پر ځای شوی وو.
سرچینه زیاتوي؛ هنیه د خونې د کولر د خرابوالي له کبله خپل اتاق پرېښی وو؛ خو وروسته تخینکي کارکوونکو کولر جوړ او هنیه بېرته خپلې خونې ته راغلی وو، چې د شپې یوه نیمه بجه پرې ماین چاودنه کړې وه.
د یادونې ده، چې تېره اوونۍ د اسرائیل دفاع وزارت ومنله چې په دې پېښه کې د دوی لاس وو.
د امریکا ولسمشر جوبایډن ویلي، پېښمانه دی، چې له ټاکنیزو سیالیو یې لاس واخیست.
نوموړي زیاته کړې، که دی په ولسمشریزو سیالیو کې وی؛ نو ټرمپ ته به یې ماتې ورکړې وه.
ګارډین په سپینه ماڼۍ کې د سرچینو له قوله ویلي، چې بایډن صحنې ته د کاملا هرېس په راوستلو سخت پېښمانه شوی دی.
د یادونې ده، چې د ټرمپ پر وړاندې په یوه مناظره کې له پاتې راتلو وروسته؛ بایډن له ټاکنیزو سیالیو په شا او هرېس یې را وړاندې کړه.
په جنوي کوریا کې د موان نړیوال هوايي ډګر کې د یوې الوتکې لوېدو له کبله ۴۷ تنه وژل شوي دي.
د یاد هېواد د رسنیو د معلوماتو پر اساس، دغې الوتکې د ښکته کېدو پر وخت خپل کنټرول له لاسه ورکړی وو.
په یاده الوتکه کې ۱۷۵ مسافر سپاره وو.
لوېدلې الوتکه د ججو ایر شرکت اړوند ده، چې مسافر به یې لېږدول.
د سوریې د اطلاعاتي سازمان نوي رییس ویلي، چې د بشارالاسد د واکمنۍ ګڼې ادارې له منځه وړل شوي دي.
انس خطاب ویلي، دا ادارې به بېرته له سره جوړې او د خلکو لپاره به د اسانتیاوو د برابرولو مرکزونه وګرځي.
هغه د اسد په واکمنۍ کې دا ادارې له فساد ډکې بللې دي.
نوموړي د سوریې پخواني حکومت کې د خلکو پر وړاندې ظلم او د هغوی ځورولو ته په اشارې ویلي، چې دوی هڅه کوي د سوریې خلک له هر ډول اسانتیاوو برخمن کړي.
د پښتون ژغورنې غورځنګ مخکښ غړی حنیف پشتین د افغان ډیپلومات نجیب ننګیال او پاکستاني خبریال حسن خان بحث ته په اشارې سره لیکلي چې د پښتنو غلامي ځکه اوږده شوه چې د حسن خان غوندې تش په نوم پښتانه د پنجابي ریاست سهولتکاران دي.
ښاغلي پشتین په خپل فیسبوک پاڼې لیکلي: «حسن خان څومره په سپین سترګۍ وایي چې وزیرستانیان د پاکستان خپل خلک دي نو وژلي دي یې وي؛ افغانستان څه کار لري چې غندي یې؟!»
د پښتون ژغورنې غورځنګ دغه غړي حسن خان ته د پیغور په ژبه وایي:«
حسن خانه یوه شیبه د هغو مظلومو ماشومانو له وینې ونه شرمیدې چې څومره په بې دردۍ شهیدان شوي وو؟!
ریاستونه خو هیڅکله خپل خلک نه وژني،بلکې تحفظ یې کوي، پاکستان چې زموږ خلک وژني، موږ هم د استعمار په سترګه ورته ګورو او هیڅکله به یې خپل ریاست ونه شمېرو.»
هغه حسن خان مخاطب کړی او ویلي یې دي چې له ټولو افغانانو او پښتنو دا تمه مه کوه چې ستا غوندې دې ضمیرونه مړه وي او د پښتنو په نسل کشۍ دې خاموش او د خپل بادار لپاره دې چاپلوسي وکړي.
د مالیې پخواني وزیر انوارالحق احدي پر افغانستان د پاکستان برید غندلی او ویلي یې دي چې دا چاره له نړیوالو اصولو سرغړونه ده.
ښاغلي احدي پر خپله فېسبوکپاڼه لیکلي، د اوسني ضعیف افغان حکومت علت له خلکو فاصله اخیستل دي.
نوموړی له طالبانو غوښتي چې د حکومت قاعده لویه او پراخې نړیوالې اړیکې پیدا کړي.
هغه له پاکستان هم غوښتي چې له افغانستان سره له دوښمني لاس واخلي.
وروسته له هغه چې په حماسه میډیا کې د جمهوري نظام د ملي امنیت شورا پخواني ویاند مولوي رحمت الله اندړ د طالبانو د بهرنیو چارو وزیر مولوي امیرخان متقي څخه د هغو الوتکو پوښتنه وکړه، چې خپله تېره واکمني کې یې له سقوط وړاندې ویلي وو، چې خوندي ځای ته یې استولي.
د طالبانو د بهرنیو چارو وزارت اقتصادي اړیکو رییس شفیع اعظم په ځواب کې ورته لیکلي:« په طالبانو داسې بده ورځ راغله چې خپل سر یې هم خوندي نکړای شو.»
ښاغلي اعظم د حماسه میډیا د خبر د تبصرو په برخه کې لیکلي:«هغه الوتکې او ټانګونه د کابل او نورو سیمو افغانانو لیدل چې د بمبار له ویرې یې پرې د ونو ښاخونه او ترپالونه واچول. هغه ټول بیا ستاسې ملګرو ډي ډي آر کړل.»
د طالبانو د بهرنیو چارو وزارت دغه چارواکي له مولوي اندړ څخه پوښتلي :« اوس تاسې ازبکستان ته د ۶۵ روغو الوتکو حساب ملت ته ورکړئ.»