‏د طالبانو کورنیو چارو وزارت د امنیتي چارو معینیت د کریمنل تخنیک ریاست وایي، چې د شیخ هبت‌الله آخندزاده د لسمې شمېرې فرمان د پلي کولو په موخه یې د هغو ټولو طالبانو او عامو کسانو بایومتریک ختموي، چې پخواني حکومت سره د طالبانو او یا له طالبانو سره د همکارۍ په نوم تورن او بایومټریک وو.

دوی یادو کسانو ته خبر ورکړی چې د خپل د ثبت شوي بايومتريکي معلوماتو د ختمېدو په موخه، د کورنيو چارو وزارت د امنيتي چارو ستر معينيت اړوند د کریمنال تخنیک ریاست بایومتریک عمومي مدیریت ته ورشي، تر څو بایومتریکي معلومات یې مشخص او د سیستم څخه لرې شي.

خيبر پښتونخوا کې د سړک غاړې ماین چاودنې پنځه پاکستاني پولیس ټپیان کړي دي.

سرچینې وایي چې دغه چاودنه د بنو ضلعې په ماما خېلو سيمه کې رامنځته شوه چې له امله یې لږ تر لږه پنځه پوليس ټپيان شوي دي.

تر اوسه ددغې پېښې مسولیت کومې ډلې نه دی منلی.

د یادونې ده چې نن د پاکستان د امنیتي څېړنو او مطالعاتو مرکز هم ویلي، چې ۲۰۲۴ کال د پاکستان د امنیتي ځواکونو لپاره تر ټولو خونړی کال و.

د سره صلیب نړیوالې کمیټې ویلي، چې په ۲۰۲۴ کال کې د چاودیدونکو توکو له خطرونو سره تړلو پېښو کې ۴۵۵ کسانو ته مرګ ژوبله اوښتې.

د دې ادارې د راپور له مخې، د قربانیانو له ډلې ۳۵۹ کسان ماشومان وو.

د سره صلیب نړیوالې کمېټې ویلي چې په روان میلادي کال کې یې په افغانستان کې د چاودیدونکو توکو له خطرونو سره تړلې ۲۳۴ پېښې ثبت کړي دي.

دغه کمیټې زیاته کړې چې افغانستان لا هم د چاودیدونکو توکو په وړاندې یو له زیان منونکو هېوادونو څخه دی.

د سوریې بهرنیو چارو وزیر اسد الشیباني په خپل لومړي بهرني سفر سعودي عربستان ته ځي.

اسد الشیباني پر خپله اېکس‌پاڼه لیکلي چې دا د ویاړ ځای دی چې د خپل هېواد په استازيتوب په خپل لومړي نړیوال سفر سعودي عربستان ته ځم.

نوموړي ویلي چې سعودي عربستان سره په هره برخه کې ښې ستراتیژیکې اړیکې غواړي.

نوموړي ددغه سفر کره نیټه نه ده په ډاګه کړې.

د یادونې ده چې اسد الشیباني ته د سعودي د بهرنیو چارو وزیر شهزاده فیصل بن‌فرهان بن عبدالله بلنه ورکړې.

د کابل شاه‌وعروس بند نن د یو شمېر طالب چارواکو په شتون کې ګټې اخیستنې ته وسپارل شو.

د یاد بند د ګټې اخیستنې مراسمو کې د طالبانو د ریاست الوزرا اقتصادي مرستیال ملا عبدالغني برادر ویلي چې افغانستان کې په اوبو پانګونه نه ده شوې.

ملابرادر زیاتوي، نن ورځ په نړیوال سیاست کې اوبه خورا مهم اقتصادي عنصر دی او په یو شمېر هېوادونو کې یې ارزښت تر نفتو هم زیات دی.

د هغه په خبره، طالبانو دا اړتیا درک کړې او د اوبو مدیریت ته جدي پاملرنه کوي.

‏د یادونې وړ ده چې شاه‌وعروس بند د ۷۸متره لوړوالي په درلودو سره د ۹.۴میلیون مترمکعب اوبو د ذخیره کولو ظرفیت لري، چې شاوخوا ۳۵۰۰ هکټاره ځمکه به خړوبه او همداراز به ۱.۲میګاواټه برېښنا تولید کړي.

د پاکستان د امنیتي څېړنو او مطالعاتو مرکز ویلي، چې ۲۰۲۴ کال د پاکستان لپاره تر ټولو خونړی کال و.

دغه مرکز ویلي، چې سږ کال په پاکستان کې پر امنیتي ځواکونو ۴۴۴ بریدونه شوي، چې په ترڅ کې یې ۶۸۵ امنیتي ځواکونه وژل شوي دي.

دوی ویلي، چې سږ کال په دغه بریدونو کې يو زرو ۶۱۲ تنه ملکیان وژل شوي دي.

یاد مرکز زیاته کړې، چې سږ کال په پاکستان کې هره ورځ په اوسط ډول ۷ کسانو خپل ژوند له لاسه ورکړى دى.

د دوی د معلوماتو له مخې، په پاکستان کې سږ کال د تاوتریخوالي په پېښو کې ۲زره ۲۶۷ پوځیان او ملکي وګړي ټپیان شوي دي.

یاد مرکز دغه راز ویلي، چې سږ کال تر ټولو ډېر بریدونه په خیبر پښتونخوا او بلوچستان ایالتونو کې شوي دي.

راپورونه وایي، چې تېره شپه نامعلومه وسله والو د ډیره اسماعیل خان په درابن سیمه کې د پاکستاني پولیسو پر یو چیک پواینټ برید کړی.

د راپورونو له مخې، په دغه برید کې څلور پولیس افسران وژل شوي او دوه نور ټپیان شوي دي.

راپورونه زیاتوي چې د وسله والو کسانو دغه برید ډېر ناڅاپي و او له پرمختللو وسلو یې کار اخیستی.

تر اوسه ددغې پېښې مسولیت کومې ډلې نه دی منلی؛ خو دا ډول بریدونو ته په دې وروستیو کې تحریک طالبان پاکستان ډلې زور ورکړی.

راپورونه وايي چې په خیبر پشتونخوا کې د تحریک طالبان پاکستان له لوري ۱۵ لویې او وړې امنیتي پوستې نېول شوي دي.

راپورونه زیاتوي چې دغه پوستې پاکستاني پوځیانو د وسلوالو دقیق لیزري بریدونو، د ځمکنیو ماینونو پرله‌پسې چاودنې، او د خوراکي توکو نشتوالي له کبله ټي‌ټي‌پي ته پرېښي دي.

تر اوسه دواړو لوریو په دې اړه رسمي څه نه دي ویلي.

د یادونې ده چې تېره ورځ په سوشل میډیا کې ځینې ویډیوګانې لاس په لاس کېدلې، چې د ټي‌ټي‌پي ډلې یوه امنیتي پوسته نېولې وه او خوښي یې څرکندوله.

روسیې او اوکراین د جګړې سلګونه بندیان یو بل سره تبادله کړل.

دغه هېوادونو د متحده عربي اماراتو په منځګړیتوب یو وار بیا جنګي اسیران تبادله کړل.

د اوکراین ولسمشر، ولودیمیر زیلینسکي ویلي چې د دې اقدام په نتیجه کې ۱۸۹ اوکرایني بندیان بېرته خپل هېواد ته ستانه شول.

بل لوررته د روسیې دفاع وزارت ویلي چې د دواړو لورو ۱۵۰ بندیان خوشي شوي دي.

دوی په دې اړه یې وضاحت نه دی ورکړی چې ولې د دواړو خواوو له لوري د خوشي شویو بندیانو په شمېر کې توپیر شته.

د سوریې د بهرنیو چارو وزیر اسد الشیباني له کویټ څخه وغوښتل چې په دمشق کې خپل سفارت بیرته پرانیزي او له سوریې سره دیپلوماتیکې اړیکې بیا پیل کړي.

اسد الشیباني دا غوښتنه دمشق ته د کویټ د بهرنیو چارو وزیر عبدالله علي ال یحیی د سفر پر مهال کړې ده.

نوموړي ویلي چې موږ په کویټ کې له خپلو وروڼو څخه غواړو چې ژر تر ژره خپلې اړیکې له دمشق سره بیا پیل کړي.

د یادونې ده چې واک ته د سوریې د نوي حکومت له رسېدو وروسته ددغه حکومت چارواکو د ډېری هېوادونو له استازو سره کتلي او د دوه اړخیزو همکاریو غوښتنه یې کړې ده.