د پخواني ولسمشر حامد کرزي د دفتر رئیس، کریم خرم، د افغانستان پر خاوره د وروستیو بریدونو په غبرګون کې ویلي چې دا ډول حملې د افغانستان او پاکستان په تاریخ کې بې ساري دي.

ښاغلي خرم په خپله ایکس‌پاڼه لیکلي، چې دا پېښه یوازې یو نظامي عمل نه، بلکې د نړیوالو اصولو او قوانینو ښکاره نقض دی.

د هغه په وینا، نړۍ ورو ورو په داسې بې‌قانوني ډګر بدلېږي چې پکې نه حریم پاتې دی او نه اصول.

نوموړی زیاتوي چې افغانستان نه یوازې د سترو قدرتونو د سیالیو میدان ګرځېدلی، بلکې د سیمې هېوادونه هم خپلې متضادې ګټې پکې لټوي.

خرم خبرداری ورکړی چې په داسې “ځنګلي چاپېریال” کې د بقا یوازینی ضمانت ملي یووالی، ځواکمن ملت، او د فکري او تخنیکي کدرونو روزنه ده.

له څو میاشتو تېرېدو وروسته خبریال بشیر هاتف لاهم د طالبانو حکومت په بند کې دی.

نوموړی څو میاشتې وړاندې د طالبانو حکومت نېولی او تر اوسه یې د جرم په اړه څه نه دي ویل شوي.

بشیر هاتف هېواد کې د خبریال او شنونکي په توګه فعالیت کوو او تر دې وړاندې د شمشاد او ژوند تلویزیون د خپرونو مسول هم پاتې شوی.

تر اوسه د طالبانو حکومت د هغه د خوشې کېدو په اړه څه نه دي ویلي.

د مصالحې عالي شورا پخواني مشر ډاکټر عبدالله عبدالله د کابل او پکتیکا پر وروستیو هوایي بریدونو توند غبرګون ښودلی او ویلي یې دي، دا بریدونه د افغانستان د ځمکنۍ بشپړتیا ښکاره نقض دی.

عبدالله په خپره شوې اعلامیه کې ویلي: «موږ دا ډول نظامي اقدامات په کلکو ټکو غندو. د افغانستان د خاورې دننه هر ډول پوځي اقدام د نړیوالو قوانینو څرګنده سرغړونه ده او د ښه ګاونډیتوب له اصولو او د ملګرو ملتونو له منشور سره په ټکر کې دی.»

هغه له ټولو هېوادونو، په ځانګړي ډول له ګاونډیو هېوادونو غوښتي چې د افغانستان د پولو او ځمکنۍ بشپړتیا بشپړ درناوی وکړي.

عبدالله ټینګار کړی، چې د هر ډول اختلاف حل باید د منطق، ډیپلوماسۍ او رغوونکو خبرو له لارې وشي، نه د زور او بریدونو له لارې.

پاکستان کې د طالبانو حکومت پخواني سفیر ملا عبدالسلام ضعیف د پاکستان له‌خوا پر افغانستان د ترسره شویو هوایي بریدونو او سرغړونو کلکه غندنه کړې ده.

ضعیف ویلي، دا بریدونه د پاکستان د پوځ «احمقانه او غیرمسؤلانه اقدام» دی، او موخه یې دا ده چې د پاکستان واکمنان د خپل هېواد له خراب سیاسي او امنیتي وضعیت څخه د خلکو پام بل لوري ته واړوي.

هغه ټینګار کړی، چې د افغانستان پر خاوره دا ډول تجاوز د منلو نه دی او د دې کړنو ټول عواقب به د پاکستان پر حکومت او پوځ راجع وي.

د طالبانو حکومت د دفاع وزارت د پاکستان له‌خوا د افغانستان د هوايي حریم نقض په کلکو ټکو غندلی او دا یې «بې‌ساری، له تشدد ډک او کرغېړن اقدام» بللی دی.

د وزارت په اعلامیه کې ویل شوي، پاکستاني جټ الوتکو د ډېورند کرښې ته څېرمه د پکتیکا ولایت د مرغې په سیمه کې پر یوه ملکي بازار بمبار کړی او د کابل د پلازمېنې هوايي حریم یې هم نقض کړی دی.

اعلامیه زیاتوي:«موږ د افغانستان په حریم دا تجاوز په تر ټولو کلکو ټکو غندو او د خپل حریم څخه دفاع زموږ حق ده.»

یاد وزارت خبرداری ورکړی، چې که دا ډول بریدونه دوام وکړي او وضعیت ترینګلی شي، مسؤولیت او عواقب به یې د پاکستان پوځ ته راجع وي.

د ننګرهار پخواني والي ضیاءالحق امرخیل د پاکستان له لوري د کابل هوایي بریدونه د افغانستان پر حریم ښکاره تجاوز بللي دي.

هغه ویلي، په نړۍ کې یوازې دوه هېوادونه اسرائیل او پاکستان داسې تجاوزي کړنې ترسره کوي.

امرخیل ټینګار کړی چې د دغه «نه‌بخښوونکي عمل» پر وړاندې د افغان ولس یووالی حیاتي دی، ځکه پاکستان له لسیزو راهیسې د افغانستان د نظامونو د کمزوري کولو هڅې کوي.

نوموړي له نړیوالې ټولنې غوښتي چې د اسلام‌اباد پر وړاندې واضح دریځ ونیسي او د افغان حاکمیت د نقض په اړه چوپه پاتې نه شي.

د طالبانو حکومت د بهرنیو چارو وزیر مولوي امیرخان متقي نن په نوي دهلي کې له خپل هندي سیال ډاکټر ایس. جې. شنکر سره وکتل چې په دې لیدنه کې دواړو لوریو د سیاسي اړیکو د پیاوړتیا، اقتصادي همکاریو، سیمه‌ییزو پروژو او د خلکو ترمنځ د تګ راتګ د اسانولو په اړه بحث کړی.

متقي د هند له حکومت مننه کړې او دا سفر یې د دواړو هېوادونو ترمنځ د اړیکو په مسیر کې مهم او تاریخي تحول بللی.

هغه ویلي افغانستان کې د پانګونې پراخ فرصتونه شته او هندي پانګوال کولای شي په کرنه، روغتیا، کانونو او ترانسپورت کې فعالیت وکړي.

هندي وزیر جې شنکر د طالبانو حکومت د امنیتي هڅو ستاینه کړې او اعلان یې کړی چې د هند سفارت به له تخنیکي څخه دیپلوماتیکې کچې ته پورته کېږي.

هغه همدارنګه دهلي کې د افغان دیپلوماتانو منلو، د افغان بندیانو د ستونزو حل، د ویزو اسانتیا او د بشري مرستو د دوام ژمنه کړې.

دواړو لوریو د هوايي دهلیز د پراخېدو، د سوداګرۍ ګډې کمېټې جوړېدو او د پراختیايي پروژو په ځانګړي ډول د روغتیا، بریښنا او زیربناوو په برخه کې د همکاریو د ژورتیا پرېکړې کړي.

د مشرانو جرګې پخواني رییس فضل‌هادي مسلمیار د پاکستان له لوري په پلازمېنه کابل او پکتیکا ولایت کې د ترسره شوو هوايي بریدونو په سختو ټکو غندنه کړې ده.

نوموړي دا بریدونه د افغانستان پر ملي حاکمیت ښکاره تېری بللی او ویلي یې دي چې اسلام‌اباد د ټولو نړیوالو اصولو او قوانینو ښکاره سرغړونه کړې ده، چې هېڅ ډول توجیه نه لري.

مسلمیار له نړیوالې ټولنې او د ملګرو ملتونو له امنیت شورا څخه غوښتي چې د دغو بریدونو په اړه چوپ پاتې نه شي او بې‌طرفه څېړنې ترسره کړي.

هغه ټینګار کړی چې افغانستان یو خپلواک هېواد دی، ملت یې یو موټی او یو غږ دی، او هېڅ بهرنی ځواک د دې خاورې په کورنیو چارو کې د لاسوهنې حق نه لري.

د هیواد پخواني ولسمشر حامد کرزي د پاکستان له لوري پر کابل پکتیکا، خوست او ننګرهار پر ولایتونو د هوايي بریدونو په غبرګون کې دا بریدونه د نړیوالو اصولو ښکاره سرغړونه، د افغانستان پر حاکمیت تېری او د هېواد د خاورې پر تمامیت یرغل بللی دی.

ښاغلي کرزي په خپله ایکس‌پاڼه لیکلي، د پاکستان تګلارې د افغانستان او سیمې په اړه غیرمسؤلانه دي او اوسنی حالت د هماغو غلطو سیاستونو پایله ده چې پاکستان کلونه تعقیب کړي دي.

هغه له اسلام‌اباده وغوښتل چې د شخړو او تاوتریخوالي پر ځای خپلې تېروتنې ومني، د نړیوالو اصولو او د ګاونډیتوب حقونو ته درناوی وکړي او له افغانستان سره د ملګرتیا او متمدنې اړیکې پر بنسټ تعامل وکړي.

د هند د بهرنیو چارو وزیر اېس. جې شنکر ویلي، هند د افغانستان له‌خوا د اوبو د مدیریت او اوبه‌لګولو په برخه کې د همکارۍ د پراخولو او لېوالتیا هرکلی کوي او چمتو دی چې د افغانستان د اوبو د سرچینو د دوامدار مدیریت لپاره ګډ کار وکړي.

نوموړي د دواړو هېوادونو ترمنځ د اوبو د تنظیم او زراعت په برخه کې د «ګټورې همکارۍ» یادونه کړې او ویلي، هند غواړي دا اړیکې لا پسې پیاوړې شي ترڅو د افغانستان د طبیعي سرچینو د اغېزمنې استفادې زمینه برابره شي.