تېره ورځ اسرائیلو د غزې پر بېلابېلو برخو بریدونه کړي، چې لږ تر لږه یې ۵۵ کسان وژلي.
دا بریدونه داسې مهال کېږي، چې پر اسرائیل فشارونه زیات شوي، ترڅو عملیات ودروي.
رویټرز ویلي، چې اروپايي ټولنې د بهرنۍ پالیسۍ مشرې کاجا کالاس له اسرائیلو سره د سوداګرۍ پر تړون د بیا کتنې غوښتنه کړې ده.
په ورته مهال بیا برېتانیا هم له دغه هېواد سره خپلې سوداګریزې اړیکې ځنډولې دي.
د ایران د نفتو وزیر محسن پاک نژاد ویلي، چې له افغانستان سره د کانونو په برخه کې د تخصصي تجربو د شریکولو او دوه اړخیزو همکاریو لپاره چمتو دي.
هغه د طالبانو د کانونو او پټرولیم وزیر هدایت الله بدري سره لیدنه کې ویلي، چې د کانونو په برخه کې له کابل سره د تهران تجربې شریکول د اقتصادي ودې لپاره یو ځانګړی فرصت دی.
پاک نژاد زیاتوي، چې دا همکاري به متقابل پرمختګ کې مرسته وکړي.
دا په داسې حال کې ده، چې د طالبانو پر حکومت د افغانستان د کانونو د لیلام په اړه سختې نیوکې موجودې دي.
د سمنګان ولایت د سکرو په یوه کان کې د چاودنې له امله ۷ تنه کان کېندونکي وژل شوي.
د سمنګان ولایت د طالبانو امنیې قومندانۍ په یوه خبرپاڼه کې تایید کړې چې په دغه چاودنه کې اووه تنه وژل شوي او دوه تنه نور زخمیان شوي دي.
یادې خبرپاڼه کې راغلي چې دغه چاودنه تېره شپه د دره صوف ولسوالۍ په ګوله کلي کې رامنځته شوې.
د اسرائیلو د پوځ پخواني مرستیال او د دموکرات ګوند مشر یائیر ګولان خبرداری ورکړی چې د غزې جګړه اسرائیل د نړیوالې انزوا لور ته بیایي او ښایي هېواد یې “یو رد شوی حکومت” وبلل شي.
ګولان د یوې محلي راډیو سره په تازه مرکه کې وویل: «یو عاقل هېواد د ملکیانو پر ضد جګړه نه کوي، ماشومان د ساتیرۍ لپاره نه وژني او خلک په پراخه کچه نه بېکوره کوي.»
هغه د اسرائیلو روانې کړنې د سویلي افریقا د پخواني اپارتاید رژیم سره پرتله کړې او څرګنده یې کړه: «یهودي ولس چې د تاریخ په اوږدو کې یې زور، نسلکشي او ظلمونه زغملي، اوس پخپله داسې غیرقابل توجیه اعمال ترسره کوي.»
بلخوا، د ملګرو ملتونو د بشري چارو مرستیال سکرتر جنرال تام فلچر هم خبرداری ورکړی چې که مرستې ژر تر ژره غزې ته و نه رسېږي، شونې ده چې نږدې ۱۴ زره نوي زېږېدلي ماشومان به په راتلونکو ۴۸ ساعتونو کې له لوږې او ناروغیو مړه شي.
دا څرګندونې داسې مهال کېږي چې نړیوال فشار پر اسرائیلو ورځ تر بلې ډېرېږي.
د پاکستان حکومت پرېکړه کړې، چې تر یوې بلې میاشتې پورې به هم د دوی هوايي حریم د هندي الوتکو پر مخ تړلی وي.
جیو نیوز راپور ورکړی، چې په تېره یوه میاشت کې هند د دغه حریم د بندېدو له امله ۸ میلیارده روپۍ تاوان کړی.
دا تاوان تر ډېره د تیلو او کمه برخه یې بیا د هندي الوتکو لپاره د اوږد مزل له امله اوښتی.
د یادونې ده، چې پاکستان د اپریل په ۲۴مه خپل هوايي حریم د هندي الوتکو پر مخ تړلی وو.
د پاکستان لومړي وزیر شهباز شریف ویلي، چې عاصم منیر د هند شوم بریدونه او پلانونه شنډ کړي او « مور وطن پاکستان» ته یې ستر ویاړونه راوړي.
نوموړي عاصم منیر ته د فیلډ مارشالۍ له امله مبارکي ورکړې او ویلي یې دي، چې د ده تر مشرۍ لاندې پاکستاني ځواکونو په خورا زړورتیا سره د پاکستان ځمکنۍ بشپړتیا ساتلې.
د یادونې ده، چې د پاکستان مرکزي کابینې تېره ورځ عاصم منیر ته مارشالي ورکړه او هغه یې د هند خلاف عملیاتو کې بریالی وباله.
د طالبانو حکومت د بلخ والي یوسف وفا ویلي چې پخواني نافذه قوانین د دوی له لوري لغوه شوي او دولتي ادارې باید یوازې د طالبانو نوي اصول او فرمانونه پلي کړي.
د بلخ ولایت مطبوعاتي دفتر په خپره شوې خبرپاڼه کې ویلي چې وفا په اداري غونډه کې د طالبانو حکومت د مشر شیخ هبتالله اخندزاده د امرونو پر عملي کولو هم ټینګار وکړ.
نوموړي مسؤلینو ته سپارښتنه کړې چې پخواني قوانین له اعتباره وغورځوي او پر ځای یې د طالبانو وضع شوي اصول تطبیق کړي.
هغه د بلخ د برېښنا ادارې ته لارښوونه کړې چې د پخوانیو چارواکو د کورونو او املاکو د برېښنا پاتې پورونه باید په قسطونو سره راټول کړي.
په ورته وخت کې، د طالبانو حکومت مشر هبتالله اخندزاده اعلان کړی چې د افغانستان پخوانی اساسي قانون نه مني او حتی یوه ماده یې هم د منلو وړ نه ده.
د سيانان تلویزیوني شبکې د څو امریکايي چارواکو له قوله، چې نومونه یې نه دي افشا شوي، راپور ورکړی چې نوې استخباراتي معلومات ښيي چې اسرائیل د ایران د اټومي تاسیساتو د احتمالي برید لپاره جدي چمتووالی نیسي.
چارواکو سيانان ته ویلي، دا اقدام ښايي نه یوازې د امریکا د ولسمشر ډونالډ ټرمپ له دریځ سره ښکاره اختلاف څرګند کړي، بلکې د سیمې د پراخې شخړې د رامنځته کېدو خطر به هم له ځانه سره ولري.
راپور زیاتوي، لا تر اوسه دا روښانه نه ده چې د اسرائیلو مشرانو د دغه برید وروستۍ پرېکړه کړې که نه؛ خو د داسې یوه اقدام احتمال په وروستیو میاشتو کې په څرګند ډول زیات شوی دی.
د امریکايي چارواکو په وینا، دا احتمال په ځانګړې توګه هغه مهال زیاتېږي چې د امریکا او د ایران ترمنځ خبرې یوې داسې هوکړې ته ورسېږي چې د اسرائیل له نظره ضعیفه یا نه منل کېدونکې وي.
د زلمي خلیلزاد مېرمنې شرل بنارد ویلي چې د طالبانو تر واک لاندې افغانستان ته د افغان کډوالو د بېرته ستنېدو په اړه اندېښنې “بېبنسټه” دي.
نوموړې ویلي، کډوال باید له ستنېدو و نه وېرېږي.
هغې د ښځو او نجونو پر زدهکړو د بندیز غندنه کړې او دا یې د نه منلو او له دیني پلوه بېبنسټه عمل بللی؛ خو د رسنیو هغه راپورونه یې رد کړي چې ګواکي طالبان د ښځو سخته ځپنه کوي.
نوموړې چې څه موده وړاندې کابل ته سفر کړی و، وړاندیز کړی چې که بېرته ستانه شوي افغانان د تعلیمي نظام په اړه اندېښمن وي، خپل ماشومان دې شخصي ښوونځیو ته ولیږي.
بنارد همداراز د طالبانو د حکومت منزوي کېدل د هېوادونو لهخوا “ناعادلانه او عجیب” بللي او ادعا یې کړې چې د ښځو وضعیت په هند کې د افغانستان په پرتله ډېر خراب دی.
هغې ویلي: «طالبان له ښځو سره هغسې ظالمانه چلند نه کوي لکه هند، چې یو پرمختللی او ځواکمن هېواد ګڼل کېږي.»
د بریتانیا حکومت د اسرائیل سفیر احضار کړی.
یاد حکومت ویلي چې د بهرنیو چارو وزیر ډیویډ لامي د اسرائیل سفیر د غزې په تړاو د پوځي عملیاتو د پراخېدو په غبرګون کې احضار کړی دی.
بل لورته برېټانوي رسنیو لیکلي، چې لامي به له اسرائیل سره د سوداګریزو خبرو اترو د درولو اعلان هم وکړي.
دا په داسې حال کې ده چې نن د کاناډا، برېتانیا او فرانسې مشرانو هم خبرداری ورکړی و، چې که اسرائیل پر غزې بریدونه بند نه کړي؛ نو دوی به پر دغه هېواد بندیزونه ولګوي.