د پاکستان ډان ورځپاڼي لیکلي، چې پاکستاني پوځ د شمالي وزیرستان د میرانشاه په ټاپي سیمه کې د ترهګریزو بریدونو په تور درې افغانان وژلي.
ډان ورځپاڼې ویلي، چې یاد کسان د ټيتيپي پر پټنځایونو د عملیاتو پر مهال وژل شوي.
پاکستاني رسنیو د یادو کسانو نومونه ضرار افغان، نقیب الله افغان او سرکش افغان یاد کړي دي.
د طالبانو حکومت تر اوسه په دې اړه څه نه دي ویلي.
د کندز په ښار کې د کابل بانک مخې ته د یو ځانمرګي برید له امله لږ تر لږه پنځه کسان وژل شوي او اووه نور ټپیان دي.
د کندز د طالبانو امنیه قومندانۍ ویاند جمعه الدین خاکسار ویلي، ځانمرګی بریدګر د کابل بانک ترڅنګ ځانته چاودنه ورکړې ده.
ځايي سرچینې د وژل شویو کسانو شمېر د طالبانو تر ورکړل شوو شمېرو ډېر، شاوخوا ۱۷ تنه ښيي.
په پېښه کې د بانک دوه ساتونکي هم وژل شوي، او ډېری قربانیان د طالبانو غړي دي چې د معاش اخیستلو لپاره بانک ته تللي وو.
تر اوسه کومې ډلې د دې برید مسئولیت په غاړه نه دی اخیستی.
په اسلام آباد کې د طالبانو حکومت پخوانی سفیر ملا عبدالسلام ضعیف وايي،د فلسطینیانو بې ځایه کول د منځني ختیځ د امن کولو لپاره حل لاره نه ده.
نوموړي زیاته کړې، که د امریکا ولسمشر ډونالډ ټرمپ په ریښتیا غواړي، چې په منځني ختیځ کې امن راشي؛ نو له منځني ختیځ دې د سرطان دانه «اسرائیل» لري کړي.
د ضعیف په خبره، اسرائیل په دغه سیمه کې له خلکو سره نه مذهبي، نه ژبني او نه هم کلتوري اړیکې لري.
دا په داسې حال کې ده، چې ټرمپ ویلي، فلسطینیان باید له غزې ووځي.
کندز کې د کابل بانک مخې ته چاودنه شوې.
راپورونه وایي، چاودنه پر هغو کسانو شوې چې د بانک مخ ته د معاشونو اخیستلو لپاره راټول شوي وو.
کندز کې د طالبانو امنیه قومنداني هم دا پېښه تائید کړې؛ خو د تلفاتو په اړه یې څه نه دي ویلي.
رویټرز د سپینې ماڼۍ د چارواکو له قوله خبر ورکړی، چې امریکا د نړیوالې جزایې محکمې پر یو څارنوال کریم خان د سفر او اقتصادي بندیزونه لګولي دي.
سرچینې ویلي، امریکا ته د کریم خان او د هغه د کورنۍ په ورتګ بندیز لګېدلی او په دغه هېواد کې د نوموړي بانکي حسابونه هم ظبط شوي دي.
سپینې ماڼۍ د کریم خان له لوري پر امریکا او اسرائیل لګېدلي تورونه بې اساسه بللي.
تر دې وړاندې بیا د جرمونو نړیوالې محکمې ویلي، چې د امریکا بندیزونه پر دوی کوم فشار نشي راوړی او هیڅوک له قانون پورته نه دي.
نړیوالې رسنۍ وایي، چې د ګواتمالا په پلازمېنه کې د یوه مسافر وړونکي بس د چپه کېدو له امله لږ تر لږه ۵۱ کسان مړه شوي دي.
د دې هېواد ولسمشر برناردو آروالو د پېښې په غبرګون کې درې ورځې ملي ماتم اعلان کړی.
د دغه هېواد د اور وژنې ډلې ویاند ویلي، ۳۶ د نارینه وو او ۱۵ د ښځینه وو جسدونه روغتون ته لېږدول شوي دي.
بس د پلازمېنې پر لور په حرکت کې و چې د یوه لوړ پل څخه ژورې ته ولوېد.
د امریکا ولسمشر ډونالډ ټرمپ واک ته له رسېدو وروسته د لومړي ځل لپاره د چین له ولسمشر شي جینپینګ سره ټلیفوني خبرې کړې دي.
ډونالډ ټرمپ د فاکس نیوز له شبکې سره په خبرو کې تایید کړې چې د چین له ولسمشر سره یې خبرې کړې دي.
ټرمپ د دغو ټلیفوني خبرو جزییات یې نه دي وړاندې کړي.
بلخوا، سپینې ماڼۍ تېره اوونۍ اعلان کړی و چې ټرمپ به د تعرفو او نورو مسایلو په اړه د چین له ولسمشر سره ټلیفوني اړیکه ونیسي.
د امریکا ولسمشر ډونالډ ټرمپ پر حماس غږ کړی چې د شنبې تر ماښام دې اسراييلي بندیان خوشې کړي.
ټرمپ ګواښ کړی که حماس دا کار ونه کړي، د غزې اوربند د لغوه کېدو وړاندیز به وکړي.
حماس د اسراييلي بندیانو د خوشې کولو لړۍ ځنډولې ده.
د حماس په وینا، اسراييل په غزه کې د اوربند هوکړه نقض کړې ده.
په ملګرو ملتونو کې د پاکستان سفیر منیر اکرم د امنیت شورا په غونډه کې ویلي، چې د داعش خراسان د جنګیالیو اصلي مرکز افغانستان دی، نه پاکستان.
منیر اکرم ټینګار کړی چې پاکستان له داعش، تحریک طالبان او بلوڅ ازادي غوښتونکو سره جدي مبارزه کړې ده.
نوموړي ویلي، پاکستان د څلوېښت کلونو راهیسې له تروریزم سره مبارزه کوي او درانه اقتصادي زیانونه یې ګاللي دي.
اکرم دغه راز ویلي، چې په افغانستان کې شاوخوا ۲۰ تروریستي ډلې فعالې دي.
په ورته وخت کې د امنیت شورا په غونډه کې د امریکا استازي ویلي، چې داعش خراسان په افغانستان او پاکستان کې د نړیوال امنیت لپاره خطر دی.
د ملګرو ملتونو لپاره د روسیې دایمي استازی واسیلي نیبنزیا وایي، مسکو له ډېر وخت راهیسې ویلي چې USAID په ټوله نړۍ کې له سختدریځو ملاتړ کوي.
نیبنزیا ویلي، چې هغه وخت دا خبره د “روسي تبلیغاتو” په توګه رد شوې وه.
نوموړي زیاته کړې، چې اوس ټولو ته ثابته شوه چې هر څه رېښتیا وو.
نوموړی دا څرګندونې داسې مهال کوي، چې څو ورځې وړاندې ایلن ماسک دا اداره د سخت دریځو د ملاتړ او د جرمونو لپاره د لارو چارو پر برابرولو تورنه کړې وه.