چین د مصنوعي ځیرکتیا پر هغو خدمتونو نوي محدودیتونه نافذ کړي چې د انسانانو په څېر عاطفي اړیکې رامنځته کوي.
د نویو مقرراتو له مخې، AI ملګري او مجازي معشوقان نور نه شي کولی داسې تعاملات ولري چې د کاروونکو عاطفي تړاو، اعتیاد یا پر واقعي ټولنیزو اړیکو منفي اغېز زیات کړي.
د دغو مقرراتو له عملي کېدو سره، د چین سترو ټکنالوژۍ شرکتونو د خپلو AI ملګرو او شخصي مجازي اجنټونو ځینې ځانګړتیاوې بندې کړې دي.
دې اقدام د ګڼو کاروونکو له خوا د خواشینۍ غبرګونونه راپارولي او ډېرو د خپلو مجازي ملګرو وروستۍ خبرې او یادښتونه خوندي کړي دي.
چارواکي وایي، نوي قوانین د دې لپاره وضع شوي چې AI د انسانانو د احساساتي انحصار وسیله نه شي او د کورنۍ او ټولنیزو اړیکو ځای وانه خلي.
دغه مقررات د هغو AI سیسټمونو لپاره دي چې د متن، غږ یا انځور له لارې د انسان په څېر شخصیت او عاطفي اړیکې وړاندې کوي، خو د پېرودونکو خدمتونه او کاري یا ښوونیز مرستیالان ترې مستثنا دي.
په همدې حال کې، د عاطفي AI ملګرو د زیاتېدونکي نفوذ په اړه نړیوال بحثونه هم پراخ شوي دي.
څېړونکي خبرداری ورکوي چې که څه هم دا ډول ټکنالوژي د یوازیتوب احساس کمولای شي، خو د احساساتي تړاو، اعتیاد او د واقعي اړیکو د کمزوري کېدو خطر هم ورسره مل دی.
سره له دې چې شرکتونو کاروونکو ته د خپلو AI ملګرو د معلوماتو د خوندي کولو اسانتیا برابره کړې، ګڼ شمېر کسان وایي چې د دغو مجازي اړیکو پای ته رسېدل به د دوی په ژوند کې د پام وړ عاطفي تشه رامنځته کړي.
