لیکوال: محمد حلیم فدایي

‏د طالبانو د استخباراتو عمومي ریاست، د کورنیو چارو وزارت او د دفاع وزارت په لارښوونه د دوی کرایې فېسبوک او اېکس چلوونکو پاکستان ته د افغان نجونو د مشروطې اجازې په ورکولو سختې نیوکې پیل کړې دي. دوی اوس هماغه غوښتنه کوي چې جمهوریت پلوو او عام ولس د طالبانو په لومړي او اوسني حاکمیت کې کوله. خو ملا هیبت الله او د طالبانو رسنیزو پلویانو په تېرو وختونو کې هر ډول نقد د دښمنۍ او بغاوت عمل ګاڼه. خو نن ورځ دوی خپله ښکاره نیوکې پیل کړې دي او که د دوی په اصطلاح ووایو، بغاوت یې کړی دی. داسې ښکاري چې د ولس او نړیوالو زغم د طالبانو سیاستونو ته نور ختم شوی دی.

‏دا ښکاره نیوکې دا په ګوته کوي چې د کابل او کندهار ترمنځ اختلافات زیات شوي دي، او داسې برېښي چې طالبان د خپل حاکمیت زوال په خپلو سترګو ویني. سربېره پر دې، دا میاشت د طالبانو لپاره ډېره خطرناکه وه. د افغانۍ ارزښت د ډالر په وړاندې تر ۱۰۰ هم پورته شو. ټرمپ پر طالبانو مالي محدودیتونه ولګول. د جرمونو نړیوالې محکمې د ملا هیبت الله او ملا عبدالحکیم حقاني د نیولو امر صادر کړ. د امریکا د بهرنیو چارو وزیر د طالبانو د مشرانو پر سر د اسامه بن لادن په پرتله د لوی انعام اېښودلو ګواښ وکړ. همدارنګه، پاکستان ته د افغان نجونو مشروط اجازه‌ورکول او په افغانستان کې د هغوی بندیزونه زیاتیدل، د اسلامي نړۍ د علماوو لخوا د نجونو د زده کړو بندیز کبیره ګناه ګڼل کېدل، او عباس ستانکزي د ملا هیبت الله فرمانونه د شریعت پر ځای د هغه د شخصي طبیعت پایله وبلله. په دې کې د تخار په پېښه کې د یو چینایي وګړي وژل کېدل هم شامل دي، چې دا ټولې موضوعګانې د طالبانو مشرتابه سخت وارخطا کړي دي.

‏په دې وروستیو کې د طالبانو پلویان په رسنیو کې نیوکې کوي او هڅه کوي چې ملا هیبت الله له خپل دریځ څخه په شاه کړي. خو داسې ښکاري چې ملا هیبت الله به هیڅکله له خپل دریځ څخه تېر نه شي. بلکې برعکس شاید نور سخت فرمانونه هم صادر کړل

یادونه: حماسه میډیا د یوې بې پرې رسنۍ په توګه د ټولو سیاستوالو ، لیکوالو او نظر خاوندانو لیکنو او نظریاتو ته درناوی لري، دا لیکنه د حماسه میډیا نظر نه څرګندوي بلکې د لیکوال نظر دی او مونږ  یې کټ مټ دلته خپروو.

د ایران د بهرنیو چارو وزیر عباس عراقچي کابل ته د خپل سفر په ترڅ کې د طالبانو حکومت د دفاع له وزیر مولوي یعقوب مجاهد سره وکتل.

په کابل کې د ایران سفارت د دې غونډې انځور خپور کړی، خو په اړه یې نور جزیات نه دي ورکړي.

د یادونې ده چې عباس عراقچي افغانستان ته د خپل یو ورځني سفر په ترڅ کې د طالبانو حکومت له رییس الوزرا ملا محمد حسن اخوند او د بهرنیو چارو له وزیر امیرخان متقي سره کتلي دي.

د طالبانو حکومت د کورنیو چارو وزارت مرستیال محمد نبي عمري د محسن داوړ وروستیو څرګندونو ته په اشارې ویلي، چې دوی کولای شي له پولو څخه د باندې په ۵۰۰ کلدارو هم سړی ووژني.

نوموړی زیاتوي، هغه څوک چې د پښتنو د حقونو لپاره مبارزه کوي اول باید د طالبانو پر پله پل کېږدي.

تر دې وړاندې محسن داوړ ویلي وو چې طالبانو د ده د وژلو په سر ۵۰۰ زره ډالره انعام ټاکلی دی.

د طالبانو حکومت رییس الوزرا د ایران د بهرنیو چارو له وزیر عباس عراقچي سره کتنه کې د افغانستان او ایران ترمنځ د دوه اړخیزو سیاسي او اقتصادي اړیکو د پیاوړتیا لپاره د دواړو هېوادونو ترمنځ د چارواکو د سفرونو پر زیاتوالي ټینګار کړی.

د طالبانو حکومت مرستیال ویاند حمدالله فطرت په خپله ایکس‌پاڼه لیکلي، چې په دې لیدنه کې ملا محمد حسن اخوند ویلي، چې د اوبو په برخه کې ایران ته د ضرر رسولو هوډ نه لري.

ښاغلي اخوند زیاته کړې، چې کله ناکله د افغانانو اعدام هم عامه احساسات راپاروي، نو باید د ښه ګاونډیتوب پر اساس ورسره د مهربانۍ له مخې چلن وشي.

دغه راز په دې لیدنه کې عباس عراقچي ویلي، چې د ایران امنیت د افغانستان د امنیت پورې تړلی دی.

عراقچي زیاته کړې، چې دوی په ابرومندانه ډول د کډوالو اېستلو ته ژمن دي.

د ایران د بهرنیو چارو وزیر سید عباس عراقچي په کابل کې د طالبانو حکومت له رییس الوزرا ملامحمد حسن اخند سره کتلي دي.

تر اوسه د دغې لیدنې جزیات نه دي راغلي.

هغه تر دې وړاندې د بهرنیو چارو له سرپرست وزیر امیرخان متقي سره هم کتلي وو.

د یادونې ده، چې عباس عراقچي نن په یو ورځني سفر کابل ته راغلی دی.

هېواد کې د ډالرو له پورته کېدو سره سم، د طالبانو حکومت تر واک لاندې د افغانستان بانک اعلان کړی، چې د افغانیو ارزښت ساتنې لپاره به ۲۵ میلیونه امریکايي ډالر لیلام کړي.

دغه بانک ویلي، چې دا ډالر سبا لیلامیږي.

بل لورته بیا د هېواد په بازارونو کې د افغانیو پر وړاندې د ډالرو ارزښت مخ پورته روان دی؛ خو د افغانستان بانک بیا وايي، چې د افغانیو ارزښت ساتنې لپاره کافي سرچینې لري.

د امریکا د ولسمشر ډونالډ ټرمپ له لوري بهرنیو هېوادونو ته د مرستو له بندیز سره سم، په بېلابېلو هېوادونو کې امریکا ته د تلونکو ۴۰ زره افغانانو پرازونه هم ځنډېدلي.

دا کسان په پاکستان، قطر، البانیا او نورو هېوادونو کې په تمه و، چې امریکا ته به ولاړ شي.

دا تر ډېره هغه افغانان دي، چې په تېرو شلو کالونو کې یې له امریکا سره دندې کړې دي.

باوري سرچینې وایي، چې د طالبانو حکومت د بهرنیو چارو وزارت سیاسي مرستیال شېر محمد عباس ستانکزي کابل پریښی.

ویل کېږي چې نوموړی مرور متحده عربي اماراتو تللی.

که څه هم هغه ته د کندهار طالبانو په هوایي ډګر کې د تلو اجازه نه ورکوله؛ خو د حقاني ډلې په زوره الوتکې ته پورته کړی.

عباس ستانکزي څو ورځې وړاندې د طالبانو حکومت په مشر شیخ هبت‌الله سختې نیوکې کړې وې، چې ولې د نجونو د زده کړو مخه یې نېولې ده.

رویټرز خبر ورکړی، چې د امریکا ولسمشر ډونالډ ټرمپ به د خپلې دویمې واکمني پر مهال لومړنی بهرنی سفر سعودي عربستان ته وکړي.

دا په داسې حال کې ده، چې تر دې وړاندې سعودي عربستان ویلي چې له امریکا سره به راتلونکو څلورو کلونو کې خپله سوداګري شپږ سوه میلیارده ډالرو ته وغځوي.

ټرمپ تر دې وړاندې هم سعودي ته سفر کړی او ویلي یې دي، چې که سعودي د بیا په څېر سوداګري ته لېوالتیا وښيي؛ نو نوموړی به بیا هم ریاض ته سفر وکړي.

د امریکا د بهرنیو چارو وزیر مارکو روبیو چې د طالبانو یو له سختو مخالفانو څخه دی وايي، طالبانو تر هغه ډېر امریکايي اتباع یرغمل کړي، چې راپور یې نه دی ورکړل شوی. د بهرنیو چارو وزیر مارکو روبیو په خپل ایکس پاڼې ولیکل: «که دا ریښتیا وي، موږ سمدستي د طالبانو په لوړ پوړو مشرانو خورا لویه جایزه وټاکو، شاید د هغه څه څخه لوړ چې مونږ په اسامه بن لادن ته ایښې وو.”