‏د حزب اسلامي ګوند مشر ګلبدین حکمتیار د داخلي جګړې او بهرنیو سره د جګړې د احتمال خبرداری ورکړی.

نوموړي ویلي چې افغانستان په سم لورې نه دی روان، راتلونکی یې تیاره او هیواد د جدي ګواښونو سره مخ دی.

ښاغلي حکمتیار دغه راز ویلي چې افغانستان اوس یوه لویې شورا ته اړتیا لري، خو د لویې جرګې نوم یې نه دی اخیستی.

هغه په خپلو خبرو کې زیاته کړې: «موږ داسې حکومت ته اړتیا لرو چې د قانون پر اساس وي او د خپلو مسئولیتونو او صلاحیتونو روښانه تعریف ولري؛ خو له بده مرغه، اوس موږ یو ملي تړون او د قانون اساسي نه لرو.»

‏د تورخم یو شمېر ځایي سرچینې وایي، چې د تورخم دروازه د درېیمې ورځې لپاره تړلې ده.

سرچینې وايي، چې په دغه دروازه کې سلګونه کسان بې ځایه شوي دي او د ډېرو ښځو، ماشومانو او ناروغانو حالت بحراني دی.

د تورخم دروازه د شنبې په ورځ د یوې نوې سرحدي پوستې د جوړولو په اړه د اختلاف له امله تړل شوې.

تېره ورځ د تورخم کمیسار عبدالجبار حکمت ویلي و چې هڅه کوي دا ستونزه د پاکستاني لوري سره د خبرو اترو له لارې حل کړي.

د حزب اسلامي مشر، ګلبدین حکمتیار د طالبانو ترمنځ د داخلي اختلافاتو ته په پام سره ویلي چې د افغانستان وضعیت داسې ښکارې چې طالبان یو له بل سره «په ماشه» ولاړ دي.

ګلبدین حکمتیار په یوه ویډیو کې ویلي، چې له یوې خوا عام خلک له وطنه فرار کوي او له بلې خوا له ایران، پاکستان، ترکیه او امریکا هم کډوال راایستل کېږي؛ خو زموږ په مهاجرینو کې کمښت نه دی راغلی.

ګلبدین حکمتیار په دې وینا کې د افغانستان د خلکو څخه غوښتنه کړې چې د موجوده بحراني وضعیت سره د مقابلې لپاره لاس په لاس شي او اجازه ورنه کړي چې افغانستان د بلې جګړې ښکار شي.

هغه ویلي، چې د هېواد بد وضعیت داخل د هېواد کې خلک زیات پریشانه کړي دي.

د استرالیا سنا کې افغان الاصله سناتوره فاطمه پیمان وایي، چې ایران خپل هېواد کې ښځو ته د خپل غږ پورته کولو او په دموکراسي کې د ګډون اجازه ورکړې.

هغې ویلي، په دې اړه د لویدیځ د تبلیغاتو له کبله دوی ته ناسم معلومات رسیږي.

پیمان وړمه ورځ پرخپلې ایکس پاڼه ایران کې د ښځو وضعیت ته په اشارې، د ” ښځه، ژوند ازادي” په نوم یو شعار هم خپور کړی و، چې بېرته یې ړنګ کړی.

حماس غورځنګ وايي، له اسرائیل سره د اوربند نور پړاوونه یې د بندیانو تبادلې پورې مشروط دي.

د یاد غورځنګ یو مشر باسم نعیم ویلي، چې که اسرائیل اوربند غواړي؛ نو باید پر خپلې هوکړې ودریږي.

اسرائیل تېره ورځ ویلي وو، چې د پاتې فلسطینیانو د خوشې کولو لړۍ تر هغه وخته ودروي؛ ترڅو حماس د دوی غوښتنې ونه مني.

د مصر ولسمشر عبدالفتاح السیسي د سوریې د انتقالي حکومت مشر احمد الشرع د عرب‌لیک هېوادونو بېړنۍ ناستې ته وربللی دی.

دا ناسته د مصر په پلازمېنه قاهره کې د مارچ په پنځمه جوړیږي.

په سوریه کې واک ته د شام التحریر له رسېدو وروسته، مصر ویلي، چې په دغه هېواد کې باید له بهرنۍ مداخلې پرته یو ټول شموله حکومت رامنځته شي.

د یادونې ده، چې د احمد الشرع دا سفر د اړیکو د پراختیا لپاره مهم بلل شوی.

د ملګرو ملتونو امنیت شورا ویلي، چې د فبروري ۲۷مه به د غیر رسمي کارپوهانو ډلې (IEG) غونډه ترسره شي.

د امنیت شورا ویلي، چې غونډه به د اقلیمي بدلون، سولې او امنیت پر موضوع تمرکز وکړي.

امنیت شورا زیاته کړې، چې دغه غونډه به په ځانګړي ډول افغانستان کې د اوسني وضعیت په اړه بحث وکړي.

تر دې دمه امنیت شورا د غونډې د جزییاتو په اړه نور معلومات نه دي ورکړي.

د اسرائیل لومړي وزیر، بنیامین نتانیاهو ویلي، چې د سوریې جنوب باید “غیرنظامي” وي او اسرائیل به هلته د سوریې ځواکونو د حضور اجازه ورنه کړي.

هغه وایي، اسرائیل به د تحریر الشام ډلې یا د نوي سوریې حکومت پورې تړلو تحریر الشام وسله والو ته دې سیمې ته د داخلېدو اجازه ورنه کړي.

هغه زیاته کړې: «موږ به اجازه ورنه کړو چې د تحریر الشام جنګیالي یا د نوي سوریې پوځ د دمشق جنوبي سیمو ته ننوځي. موږ غواړو چې د سوریې جنوب، په قنیطره، درعا، او سویدا کې، بشپړ غیرنظامي شي.»

د یادونې ده چې واک ته د تحریر الشام له رسېدو وروسته، اسرائیل خپل سرتېري د سوریې په دننه کې، د ملګرو ملتونو تر څار لاندې غیرنظامي سیمه کې ځای پر ځای کړل.

د سوریې نوي حکومت د اسرائیلي ځواکونو د وتلو غوښتنه کړې.

ملګرو ملتونو هم د سوریې په خاوره کې د اسرائیلي پوځي حضور د نړيوالو توافقاتو نقض بللی او د اسرائیلي سرتېرو د شاتګ غوښتنه یې کړې.

د افغان سولې لپاره د امریکا پخوانی ځانګړی استازی زلمی خلیلزاد وایي، د پاکستان د پوځ له کبله د دغه هېواد اقتصاد، امنیت او سیاست خراب شوي دي.

نوموړی زیاتوي، پوځ باید اصلاحات راولي او یوازې پر خپلې اصلي دندې تمرکز وکړي.

د خلیلزاد په خبره، د پاکستان پوځ په هرڅه کې مداخله کوي؛ نو ځکه یې هر څه خراب کړي.

د تېر جمهوري حکومت لومړي مرستیال امرالله صالح لیکلي، چې خراسان اوس یو تښتول شوی نوم دی او له نږدې لس کالو راهیسې داعش غواړي چې خراسان د یو ولایت په توګه تر خپل کنټرول لاندې راولي.

هغه د خراسان دعوه کوونکو ته ویلي، چې خراسان اوس یوازې یو خیال دی او که ریښتیا څوک خراسان غواړي؛ نو له دې نوم څخه اوه نور هېوادونه زېږیدلي او باید د ټولو د نیولو دعوه وکړي.

د صالح په خبره، خراسان لاتین ژبې ته ورته دی، چې وغوړېده؛ خو اوس نشته.