د طالبانو حکومت د کډوالو او بېرته راستنېدونکو چارو وزارت سرپرست مولوي عبدالکبیر وایي، د طالبانو نظام یوازې د مولایانو نه دی، بلکې دا د ټولو افغانانو ګډ نظام دی.
نوموړي له یوې دیني مدرسې څخه د زدکوونکو د فراغت یوې غونډې ته ویلي، چې مدرسې او ښوونځي د یو هدف لپاره دي.
هغه یو وار بیا د زده کړو پر پراختیا ټینګار کړی.
د امریکا د ولسمشر مرستیال جيډي ونس ویلي چې د امریکا حکومت د دې هېواد د وګړو مالیات د بې ارزښته پروژو په لګولو کې مصرف کړي، چې په کې افغانستان او نور هېوادونه شامل دي.
د نړیوالو رسنیو د راپورونو له مخې، هغه د دې ډول لګښتونو په اړه نیوکه کړې او زیاته کړې یې ده: «ولې باید د امریکا د مالیه ورکونکو پیسې په افغانستان کې د عصري هنرونو پروژو ته ورکړل شي؟ دا هماغه څه وه چې تر دې وروستیو پورې د خلکو له مالیاتو څخه تمویلېده.»
د یادونې ده چې تېره ورځ د امریکا میلیاردر او د ډونالډ ټرمپ سلاکار ایلان ماسک هم د فاکس نیوز سره په یوه مرکه کې، چې د ټرمپ ترڅنګ یې کړې، ویلي چې امریکا ولې طالبانو ته دومره زیاتې پیسې ورکړې دي.
د امریکا د استازو جرګې د بهرنیو اړیکو د کمیټې پخواني مشر د افغان کډوالو د استوګنې د احتمالي بندېدو په اړه اندېښنه څرګنده کړه.
مایکل مکال د امریکا له بهرنیو چارو وزیر څخه وغوښتل چې هغو افغانانو ته د ورکړل شوو ژمنو عملي کولو ته لومړیتوب ورکړي، چې له امریکا سره یې همکاري کړې وه.
رویټرز راپور ورکړی چې د امریکا د بهرنیو چارو وزارت د افغان کډوالو د انتقال او استوګنې دفتر ته لارښوونه کړې چې تر اپریل میاشتې د فعالیت د بندېدو لپاره چمتو شي.
که دا پرېکړه عملي شي، شاوخوا ۲۰۰ زره افغان کډوال چې د امریکا ته د تګ شرایط لري، به له دغه چانس څخه محروم شي.
د هیواد پخواني ولسمشر حامد کرزي په افغانستان کې د ایران له سفیر رضا بیګدلي سره کتلي.
ښاغلي کرزي په خپله ایکس پاڼه لیکلي، چې په دې ناسته کې یې د سیمیزو وضیعتونو او د دواړو هیوادونو د اړیکو پر پراختیا او تحکیم ټینګار کړی دی.
نوموړي په دې ناسته کې د ایران له سفیر مننه کړې چې په ایران کې یې افغان محصلینو ته د زده کړو فرصتونه برابر کړي دي.
هغه دغه راز له ایران سره د ګډو کلتوري میراثونو د لاپیاوړتیا لپاره یاده ناسته ګټوره بللې.
حماس د اسرائیلي یرغمل شویو څلورو کسانو مړي، چې یوه مېرمن او د هغې دوه ماشومان پکې شامل دي، د خان یونس په سیمه کې سره صلیب ته وسپارل.
د اسرائیلي پوځ په وینا، دا مړي د چهارشنبې په ورځ له سره صلیب څخه ترلاسه شوي دي.
د اسرائیل لومړي وزیر د دې پېښې په اړه وویل چې نن پنجشنبه د حکومت لپاره یوه غمجنه او سخته ورځ ده.
حماس ادعا کړې وه چې دا ماشومان او مور یې د اسرائیل په هوايي برید کې وژل شوي، خو د اسرائیل چارواکو دا نه ده تأیید کړې.
دا لومړی ځل دی چې حماس د اوربند له هوکړې وروسته د اسرائیلي یرغمل شویو کسانو مړي سره صلیب ته سپاري.
د هېواد پخواني ولسمشر حامد کرزي له یو شمیر مشرانو او ځوانانو سره کتلي.
ښاغلي کرزي په خپله ایکسپاڼه لیکلي، چې په دې کتنه کې گډونوالو د ملي اتحاد او اتفاق پر لاټینگښت تاکید کړی او افغانستان یې د ټولو افغانانو مساوي او مشترک کور بللی.
په دې لیدنه کې د مجلس ویناوالو د تعلیم پر ارزښت او د نجونو د ښوونځیو او پوهنتونونو د پرانیستلو په اړه خبرې کړې دي.
حامد کرزي په دې لیدنه کې د دایمي سولې او ثبات لپاره یې پر ملي تفاهم ټینګار کړی.
د امریکا میلیاردر او د ډونالډ ټرمپ سلاکار ایلان ماسک یو ځل بیا د واشنګټن له خوا طالبانو ته د مرستو په ورکولو انتقاد کړی دی.
نوموړي د فاکس نیوز سره په یوه مرکه کې، چې د ټرمپ ترڅنګ یې کړې، ویلي چې امریکا ولې طالبانو ته دومره زیاتې پیسې ورکړې دي.
دا په داسې حال کې ده چې واک ته د ډونالډ ټرمپ له رسېدو وروسته یې له مصر او اسراییل پرته په ټولې نړۍ بشري مرستې وځنډولې.
د افغانستان لپاره د ازبکستان ځانګړي استازي عصمت الله ایرګاشیف د امریکا له سفیر جنتن هېنک سره لیدنه کړې ده.
دواړو لورو د افغانستان د اوسني وضعیت او د ګډو همکاریو پر اړتیا خبرې کړې دي.
د ازبکستان د بهرنیو چارو وزارت په یوې خبرپاڼه کې ویلي، باید د افغانستان د وضعیت د ښه والي لپاره نړیواله همغږي رامنځته شي.
ازبکستان او امریکا د افغانستان د ثبات او پرمختګ لپاره د ګډو هڅو پر دوام هم ټینګار کړی دی.
پاکستان کې د طالبانو حکومت پخوانی سفیر ملا عبدالسلام ضعیف که څه هم د چا نوم نه دی اخیستی؛ خو ویلي یې دي چې واړه حرکتونه باید نادیده ونه نیول شي.
هغه، چې اکثره دغه ډول کنایو کې د طالبانو حکومت مشر شیخ هبتالله او یا هم د طالبانو حکومت مخاطب کوي؛ ویلي هوښیار خلک د ځان پر وړاندې وړې ستونزې لویوالي ته نه پریدي؛ بلکې په نطفه کې یې حلوي.
ضعیف زیاتوي، لوی طوفانونه له وړو څاڅکو څخه پیل کېږي.
د طالبانو حکومت وایي، چې دوی د شریعت او اسلامي قانون په رڼا کې ځان د جرمونو نړیوالې محکمې ته مکلف نه بولي.
د طالبانو حکومت په یوه اعلامیه کې په ډاګه کړې، چې دا محکمه عدل او انصاف نشي کوی او د دوی په خبره” د اشغال دوره” کې یې د زرګونه بې ګناه وژل شویو افغانانو د مجرمینو په اړه تر اوسه هیڅ نه دي کړي.
اعلامیه کې راغلي، چې د نړۍ لوی لوی قدرتونه د دې محکمې غړي نه دي او افغانستان یې هم خپل غړیتوب غیر ضروري بولي.
اعلامیه کې دغه راز ویل شوي، چې دغې محکمې تل د سیاسي تمایلاتو له مخې چلند کړی.