پنټاګون غواړي ۵۴۰۰ کارکوونکي له دندو ګوښه کړي.

رویټرز خبر ورکړی، چې دا کار د ټرمپ له لوري د کاري ځواک کمولو د طرحې لومړنی اقدام دی، چې راتلونکې اوونۍ به پیل شي.

ویل کېږي چې پنټاګون به خپل ۹۵۰ زره ملکي کارکوونکي له پنځه څخه تر ۸ سلنې پورې کم کړي.

د امریکا جمهوري غوښتونکي سناتور تیم بورچت یو وار بیا ټینګار کړی، چې وسله والو ډلو ته د پیسو د نه ورکړې قانون باید ژر تر ژره تصویب او د ولسمشر ډونالډ ټرمپ میز ته وړاندې شي.

هغه ویلي، چې په دې اړه به راتلونکې سه شنبه یوه ناسته هم را وبلل شي.

د دغه قانون له مخې به له افغانستان سره د امریکا مرستې بندې شي.

د یادونې ده چې د یاد قانون مسؤده د جوبایډن وخت کې د امریکا د استازو جرګې تصویب کړې وه.

د پاکستان د بهرنیو چارو وزیر اسحاق ډار وایي چې پاکستان د طالبانو له حکومت سره همکاریو ته ژمن دی.

هغه ټینګار کړی چې د طالبانو حکومت باید ډاډ ورکړي چې د افغانستان خاوره به د پاکستان پر ضد نه کارول کیږي.

اسحاق ډار ادعا کړې چې په افغانستان کې د امریکايي ځواکونو پاتې وسلې د پاکستاني طالبانو ټي‌ټي‌پي لاس ته ورغلي دي.

هغه ویلي که درېیم هېوادونه په پاکستان کې مېشت افغان کډوال و نه مني، نو پاکستان به دغه کډوال بېرته افغانستان ته واستوي.

د طالبانو حکومت تر اوسه په دې اړه څه نه دي ویلي؛ خو تر دې وړاندې یې په ځلونو ویلي چې د افغانستان خاوره به د هېڅ هېواد پر ضد نه کارول کیږي او پوځي تجهیزات په خوندي ډول ساتل شوي دي.

د مقاومت په نوم جبهې د سیاسي کمېټې مشر عبدالله خنجاني وایي, چې افغانستان د طالبانو له واکمنۍ وروسته هم شته او تاریخ دا ثابته کړې ده.

هغه ادعا کړې چې طالبان به بېرته خپلو خوندي پناه‌ځایونو ته ستانه شي، چیرې چې هغوی د تېرو دوو لسیزو په جریان کې پټ وه.

هغه زیاته کړې چې طالبان د افغانستان په ټولنه کې ځای نه دی موندلی او له نړیوالې انزوا سره مخ دي.

خنجاني ټینګار کړی چې د طالبانو د قدرت انحصار او تعصب د دې ډلې دننه هم اختلافات رامنځته کړي دي.

د امریکا د بهرنیو چارو وزیر مارکو روبیو ویلي، د القاعده او داعش ډلې خلاف طالبانو د امریکا خبره ځمکې ته نه ده غورځولې.

هغه ویلي، طالبانو تل په دې برخه کې له امریکا سره غوره همکاري کړې.

روبیو زیاته کړې، طالبان په ټول افغانستان واکمن نه دي؛ نو ځکه ځای ځای ترهګرې ډلې حضور لري.

د هېواد پخواني ولسمشر حامد کرزي له ملي سوداګر میرویس عزیزي سره کتلي.

حامد کرزي په دې لیدنه کې د میروس عزیزي لخوا په هیواد کې د سرطاني ناروغیو د معالجې د یو مجهز روغتون، د طب پوهنتون او مختلفو روزنیزو تأسیساتو د جوړولو قدردانی او مننه کړې او د تحصیلي او علمي بنسټونو جوړول یی د هیواد د آبادۍ او پرمختګ لپاره مهم او اساسي بللي.

حامد کرزي یو ځل بیا هیله څرګنده کړې چې د هیواد د نجونو لپاره د تعلیم دروازې خلاصې شي.

د طالبانو حکومت د کډوالو او بېرته راستنېدونکو چارو وزارت سرپرست مولوي عبدالکبیر وایي، د طالبانو نظام یوازې د مولایانو نه دی، بلکې دا د ټولو افغانانو ګډ نظام دی.

نوموړي له یوې دیني مدرسې څخه د زدکوونکو د فراغت یوې غونډې ته ویلي، چې مدرسې او ښوونځي د یو هدف لپاره دي.

هغه یو وار بیا د زده کړو پر پراختیا ټینګار کړی.

د امریکا د ولسمشر مرستیال جي‌ډي ونس ویلي چې د امریکا حکومت د دې هېواد د وګړو مالیات د بې ارزښته پروژو په لګولو کې مصرف کړي، چې په کې افغانستان او نور هېوادونه شامل دي.

د نړیوالو رسنیو د راپورونو له مخې، هغه د دې ډول لګښتونو په اړه نیوکه کړې او زیاته کړې یې ده: «ولې باید د امریکا د مالیه ورکونکو پیسې په افغانستان کې د عصري هنرونو پروژو ته ورکړل شي؟ دا هماغه څه وه چې تر دې وروستیو پورې د خلکو له مالیاتو څخه تمویلېده.»

د یادونې ده چې تېره ورځ د امریکا میلیاردر او د ډونالډ ټرمپ سلاکار ایلان ماسک هم د فاکس نیوز سره په یوه مرکه کې، چې د ټرمپ ترڅنګ یې کړې، ویلي چې امریکا ولې طالبانو ته دومره زیاتې پیسې ورکړې دي.

د امریکا د استازو جرګې د بهرنیو اړیکو د کمیټې پخواني مشر د افغان کډوالو د استوګنې د احتمالي بندېدو په اړه اندېښنه څرګنده کړه.

مایکل مکال د امریکا له بهرنیو چارو وزیر څخه وغوښتل چې هغو افغانانو ته د ورکړل شوو ژمنو عملي کولو ته لومړیتوب ورکړي، چې له امریکا سره یې همکاري کړې وه.

رویټرز راپور ورکړی چې د امریکا د بهرنیو چارو وزارت د افغان کډوالو د انتقال او استوګنې دفتر ته لارښوونه کړې چې تر اپریل میاشتې د فعالیت د بندېدو لپاره چمتو شي.

که دا پرېکړه عملي شي، شاوخوا ۲۰۰ زره افغان کډوال چې د امریکا ته د تګ شرایط لري، به له دغه چانس څخه محروم شي.

د هیواد پخواني ولسمشر حامد کرزي په افغانستان کې د ایران له سفیر رضا بیګدلي سره کتلي.

ښاغلي کرزي په خپله ایکس پاڼه لیکلي، چې په دې ناسته کې یې د سیمیزو وضیعتونو او د دواړو هیوادونو د اړیکو پر پراختیا او تحکیم ټینګار کړی دی.

نوموړي په دې ناسته کې د ایران له سفیر مننه کړې چې په ایران کې یې افغان محصلینو ته د زده کړو فرصتونه برابر کړي دي.

هغه دغه راز له ایران سره د ګډو کلتوري میراثونو د لاپیاوړتیا لپاره یاده ناسته ګټوره بللې.