د احصایې نړیواله اداره وایي، افغانستان د خپلواکۍ د اخیستو په پلمه ۲۸ ځلې خپل بیرغ بدل کړی.
دغې ادارې پر خپله ایکسپاڼه د هغه هېوادونو لېست خپور کړی چې له خپلواکۍ وروسته یې دوه یا ډېر ځله خپل بیرغ بدل کړی.
په دغه لیست کې لېدل کېږي، چې عراق، ایران، لیبیا، میانمار، وینزویلا او جنوبي افریقا دوه دوه ځله خپل بیرغ بدل کړی؛ خو افغانستان ۲۸ ځله خپل بیرغ بدل کړی.
د یادونې ده چې په افغانستان کې هر حکومت واک ته له رسېدو وروسته خپل بیرغ ته بدلون ورکړی.
چین د ډونالډ ټرمپ لخوا د تعرفو لوړولو ته په غبرګون کې اعلان وکړ چې د امریکايي توکو او ادارو پر ضد به د تعرفو او محدودیتونو اقدامات ترسره کړي.
د چین د مالیې وزارت ویلي، چې له شپږو ورځو وروسته به پر ټولو امریکايي توکو ۳۴ سلنه تعرفې ولګول شي.
بیجنګ دا هم ویلي، چې له جمعې ورځې به امریکا ته د منځنیو او درنو کمیابه فلزاتو د صادراتو کنټرول پیل کړي؛ چې پکې ساماریوم، ګادولینیوم، تربیوم، ډیسپروزیم، لوتیتیم، اسکاندیم او ایتریوم شامل دي.
چین همداراز ۱۱ ادارې د نه باور وړ ادارو لیست ته زیاتې کړې دي او دغه اقدام یې پر دغه ادارو د بندیزولو د لګولو لپاره کړی دی.
د طالبانو حکومت د بهرنیو چارو وزارت سرپرست امیرخان متقي د افغانستان لپاره د متحده عربي اماراتو له ځانګړي استازي سره د دوهاړخیزو اړیکو، سوداګرۍ، د ترانزیت پراختیا، افغانانو ته د ویزو د ورکولو آسانتیاوو او ځینو سیمهییزو مسایلو په اړه خبرې کړې دي.
ښاغلي متقي په دې لیدنه کې د کابل او ابوظهبي اړیکې مثبتې بللې دي او هیله یې څرګنده کړې چې د هغه د وروستي سفر پر مهال له اماراتو سره شوي توافقونه به پلي شي او د دواړو هېوادونو ترمنځ به سوداګریزې او ترانزیتي اړیکې لا پیاوړې شي.
په دې لیدنه کې د اماراتو استازي هم دوهاړخیزې اړیکې مثبتې بللې دي او د دې سفر هدف یې د دواړو هېوادونو د بهرنیو چارو وزیرانو ترمنځ د شويو توافقونو تعقیب بللی دی.
د روژې له ۲۹مې د کوچني اختر تر درېیمې پورې په ټول هېواد کې ۸۰ ټرافیکي پېښې رامنځته شوې دي.
د طالبانو حکومت تر واک لاندې د ټرافیکو عمومي ریاست یوې خبرپاڼه کې ویلي، چې دغو پېښو کې ۳۰ تنه مړه شوي او ۱۵۵ نور ټپیان دي.
وژل شویو کسانو کې دوه ښځې او نهه ماشومان دي؛ خو په تپیانو کې بیا اته ښځې او ۳۰ ماشومان شامل دي.
د اسرائیل پوځ تائید کړه، چې لبنان کې یې د حماس یو بل قومندان حسن فرحات وژلی دی.
له پوځ څخه خپره شوې خبرپاڼه کې راغلي، چې پر نوموړي د لبنان جنوب صیدا کې برید شوی.
د پوځ د معلوماتو له مخې فرحات پر اسرائیلو د څو بریدونو طراح وو.
دوی ویلي، چې پر حماس ډلې به خپلو بریدونو ته دوام ورکوي.
ټولنپوه مصطفی مهر آیین د ایران مذهبي مشر علي خامنهیي ته په یو بل لیک کې لیکلي، چې نه زه ستا بنده یم او نه هم ته د ایران د ملت ارباب.
هغه چې د خپل لومړي پرانیستي لیک له امله څارنوالۍ ته غوښتل شوی و؛ خپل بل لیک کې ویلي، چې د ظلم او استبداد محکمه کې به حاضر نشي.
مهرآیین لیکلي، په هغه سیاسي نظام کې چې ټولې ادارې فلج او د فعالیت هیڅ نښه یې نه وي؛ خامنهیي هم باید خپل ظالمانه قضاوت بند کړي.
د یادونې ده چې مهرآیین ته څارنوالي کې قضایي دوسیه هم خلاصه شوې.
د جنوبي کوریا محکمې د دې هېواد د استیضاح شوي ولسمشر، یون سوک یول د لرې کولو حکم صادر کړ.
دغه محکمې د ولسمشر د استیضاح لپاره د پارلمان پرېکړه هم تایید کړه.
دا پرېکړه وروسته له هغې وشوه چې یون سوک یول د قوس په میاشت کې موقتي نظامي حکومت اعلان کړی و.
محکمې ویلي، د یول لهخوا د نظامي حکومت اعلان د خلکو اساسي حقوق تر پښو لاندې کړي او د هېواد ثبات ته یې جدي زیان رسولی دی.
د هند د سینما مشهور ستوری منوج کمار نن د ۸۷ کلونو په عمر په ممبۍ کې له نړۍ سترګې پټې کړې.
د هند لومړي وزیر نریندرا مودي د منوج کمار پر مړینه خواشیني څرګنده کړې.
د انډي ټيوي د راپور له مخې، د منوج کمار زوی کونال ګوسوامي د خپل پلار مړینه تایید کړې او ویلي یې دي چې نوموړی له اوږدې مودې راهیسې له ناروغۍ کړېده.
منوج کمار، چې اصلي نوم یې «هري کرشناګري ګوسوامي» و، په ۱۹۳۷ کال کې په هند کې زېږېدلی و.
نوموړی د «روتي، کپرا او مکان»، «کرانتي» او «آدمی» په څېر فلمونو کې د پیاوړو رولونو لوبولو له امله د یوه افسانوي ستوري په توګه یادېده.
یو شمیر طالب پلوو شاعرانو د ننګرهار په نارنج ګل مشاعره کې د افغانو ښځو او پښتون ژغورنې غورځنګ پر ضد شعرونه او ترانې زمزمه کوي.
په داسې حال کې چې په مشاعره کې ټول شعرونه د ننګرهار د اطلاعاتو او کلتور ریاست له نظره تیره وي خو لیدل کېږي چې طالبان په لوی لاس دې ډول شعرونو ته اجازه ورکړې.
د نارنج ګل دودیزې مشاعرې ته د کوزې پښتونخوا څخه د راغلو شاعرانو له ډلې یې چې طالبانو سره همدردي لري د افغان میرمنو او پښتون ژغورنې غورځنګ په ضد شعرونه وایي خو هیڅوک ورته څه نه وایي.
امریکایي خبریال لورا روزن وایي، ښایي راتلونکو دوو یا درېیو اوونیو کې د عمان په کوربه توب د ایران او امریکا خبرې پیل شي.
نوموړي د یوې سرچینې په حواله ویلي چې دا خبرې به لومړی غیر مستقیمې وي او په اول پړاو کې به د مستقیمو د مذاکراتو پر چارچوب ورټولې وي.
د هغه په خبره، ښایي د ایران له لوري په دغه ټیم کې د بهرنیو چارو سیاسي مرستیال مجید تخت روانچي او د یاد وزارت حقوقي مرستیال کاظم غریب ابادي شامل وي.