ټاکل شوې چې د تورخم دروازه سر له سبا د هر ډول تګ راتګ پر مخ پرانیستل شي.
دا لاره، چې له نږدې ۲۵ ورځو راهیسې تړلې وه، د دواړو هېوادودنو د سوداګرۍ ګډې خونې د چارواکو له پرلپسې ناستو وروسته سبا بېرته پرانېستل کېږي.
ټاکل شوې چې په دې اړه نن هم د همغږۍ غونډه وشي.
تر دې وړاندې پاکستاني لوري ویلي وو، چې د دغې دروازې د پرانېستلو لپاره یې شرط دا دی، ترڅو د تورخم دې غاړې هر ډول تاسیسات د پاکستان په خوښه جوړ شي.
د نوي تعلیمي کال د پیل په درشل کې د مشرانو جرګې پخوانی مشر فضل هادي مسلم یار یوځل بیا د طالبانو په حکومت غږ کړی چې نجونو ته د زده کړې او کار اجازه ورکړي.
ښاغلي مسلم یار ویلي چې افغان ټولنه د میرمنو له شتون پرته نیمګړی او د هیواد پرمختګ پرته د نجونو د زده کړې او کار څخه ناشونې دی.
د جمهوري نظام دغه لوړپوړي چارواکي له طالبانو وغوښتل چې تر شپږم ټولګي پورې د ښوونځیو او پوهنتونونو دروازې د نجونو پر مخ پرانیزي، ترڅو دوی هم د هېواد په روښانه راتلونکي کې برخه واخلي.
د طالبانو حکومت د کډوالو او بېرته راستنېدونکو چارو وزارت ویاند له پاکستان غوښتي، چې د افغان کډوالو د اېستلو په اړه پر خپلې پرېکړې له سره غور وکړي.
عبدالمطلب حقاني ویلي، چې دا ډول یو اړخیزې پرېکړې د هیچا په ګټه نه دي.
نوموړي ویلي، افغان کډوال باید د یوې دوه اړخیزې هوکړې پر اساس را و اېستل شي.
تر دې وړاندې د پښتونخوا ایالتي وزیر علي امین ګنډاپور هم ویلي وو، چې دغې پرېکړې سره مخالف دی.
د کب ۲۷مه، افغانستان کې د خبریالانو له ملي ورځې سره برابره ده.
سږکال دا ورځ په داسې حال کې را رسېږي، چې افغانستان کې رسنۍ او خبریالان له سختو ننګونو سره مخ دي.
له تېرې څه باندې یوې میاشتې راهیسې طالبانو په کور دننه پر رسنیو هر ډول سیاسي خپرونې بندې کړې او واک ته د دوی له رسېدو وروسته اطلاعاتو ته لاسرسی سخت شوی دی.
دغه راز بیا په تېرو څه باندې درې کالو کې لسګونه رسنۍ تړل شوې، سلګونه خبریالان بې دندو شوي او ګڼ شمېر نور یې بیا د طالبانو حکومت له لوري ځورول شوي دي.
په همدې حال کې بیا د طالبانو حکومت د اطلاعاتو او فرهنګ وزارت د همدې ورځې په مناسبت ویلي، چې افغانستان کې د رسنیو وضعیت د ښه والي لوري ته روان دی.
د غزې روغتیا وزارت وايي، چې اسرائیلو په تېرو ۲۴ ساعتونو کې ۱۵ فلسطیني وګړي وژلي دي.
دا وګړي په بېلابېلو سیمو کې د بمباریو له کبله وژل شوي.
بل لورته د اسرائیل حکومت هم دا بریدونه منلي؛ خو په دې اړه یې زیات جزیات نه دي ورکړي.
د غزې چارواکي وايي، چې د اوربند له ټینګېدو وروسته هم اسرائیلو څو ځله دا هوکړه ماته کړې او لسګونه کسان یې وژلي دي.
د امریکا دولتي رسنیو د بودجې له لغوه کولو سره په یو وخت؛ فاننشل ټایمز راپور ورکړی، چې د برېتانیا حکومت د بي بي سي د بودجې کمولو په لټه کې دی.
د بي بي سي عمومي مدیر ټیم دیوي ویلي، چې دوی په دې اړه د برېتانیا د بهرنیو چارو وزارت له چارواکو سره خبرو ته چمتو دي.
تر دې وړاندې د برېتانیا چارواکو د دولت د لګښتونو بیا کتنې پروګرام کې ویلي، چې پر بي بي سي د بودجې کمول د دوی له انتخابونو څخه دی.
د یادونې ده، چې امریکا هم تېره ورځ د ټولو دولتي رسنیو کارکوونکو دندې وځنډولې.
په پام کې ده، چې د امریکا ولسمشر له خپل روسي سیال سره روانه اوونۍ د اوکراین د جګړې په اړه خبرې وکړي.
رویټرز ویلي، ټرمپ هڅه کوي، چې د ۳۰ ورځني اوربند ټینګېدو لپاره د روسیې هوکړه تر لاسه کړي.
تر دې وړاندې مسکو منلې، چې اوکراین کې به دېرش ورځنی اوربند کوي.
بل لورته بیا ټرمپ ویلي، زیات امکان لري، چې دا خونړۍ جګړه ودریږي.
د خیبر پښتونخوا ایالتي وزیر علي امین ګنډاپور افغان کډوالو ته د پاکستان د حکومت له لوري د ضرب الاجل په ټاکلو نیوکه کړې.
ګنډاپور ویلي، چې دی د دغې پرېکړې مخالف دی او افغان کډوال نباید د پاکستان له خاورې په زوره وشړل شي.
نوموړی زیاتوي، دا تګلاره په تېر کې هم عملي شوې وه، چې د بشري حقونو ضد وه.
د یادونې ده، چې پاکستان د مارچ تر وروستۍ نېټې افغان کډوالو ته وخت ورکړی، چې له پاکستان څخه ووځي.
بلوچستان کې له وروستیو بریدونو وروسته؛ د شهباز شریف حکومت اوس په داسې تګلارې کار کوي، چې پر اساس یې پوځ، حکومت او سیاسي ګوندونه یوموټی او د وسله والو پر وړاندې مبارزه زیاته کړي.
د راپورونو له مخې، د شریف حکومت غواړي پرمختللې وسله تر لاسه او د بلوڅ او ټي ټي پي پر وړاندې عملیات چټک کړي.
اوس مهال نوموړی د دغه پلان د عملي کولو لپاره په کار بوخت دی.
دا په داسې حال کې ده، چې تېره ورځ هم د بلوچستان په نوشکي کې ۹۰ پاکستاني پوځیان وژل شوي وو.
د پاکستان د لومړي وزیر سلاکار رانا ثناءالله یو وار بیا د طالبانو حکومت تورن کړی، چې له ترهګرو ډلو ملاتړ کوي.
نوموړي ویلي، چې د افغانستان خاوره د دوی پر ضد کارول کېږي.
ثناءالله زیاتوي، چې دوی تل د افغانانو ملاتړ کړی او کوي یې.
هغه دغه راز هند تورن کړی، چې پر جعفر ایکسپریس اورګاډي د برید تر شاه د دغه هېواد لاس وو.