د ایران د بهرنیو چارو وزیر عباس عراقچي اعلان کړی چې له امریکایي پلاوي سره د خبرو دوهم پړاو تر پای ته رسېدو وروسته، د دواړو هېوادونو تخنیکي کارپوهان به د چهارشنبې په ورځ په عمان کې سره وګوري.

نوموړي ویلي، کارپوهان به دا فرصت ولري چې د خبرو اترو جزئیات لا واضح کړي او د یوه احتمالي توافق لپاره چوکاټ طرحه کړي.

عراقچي زیاته کړې چې د کارپوهانو له غونډې وروسته به د شنبې په ورځ بیا له امریکايي استازي سره په عمان کې کتنه وکړي څو د تخنیکي خبرو پایلې وارزوي.

هغه د خبرو فضا ښه بللې او ویلي یې دي چې د یو شمېر اصولو او موخو په اړه ښه تفاهم رامنځته شوی دی.

د ایران او امریکا ترمنځ د خبرو دوهم پړاو د جمعې په ورځ د ایټالیا په پلازمېنه روم کې ترسره شو چې څلور ساعته یې دوام وکړ، او د عمان د بهرنیو چارو وزیر پکې د منځګړيتوب رول لوبولی دی.

د غزې د روغتیا وزارت وایي چې د اسرائیلو له لوري په وروستیو ۴۸ ساعتونو کې ترسره شوي هوایي بریدونه کې لږ تر لږه ۹۰ فلسطینیان وژل شوي دي.

اسرائیلي ځواکونو پر حماس د فشار زیاتولو لپاره خپلو بریدونو ته زور ورکړی، څو دغه ډله بې‌وسلې کړي او یرغمل شوي کسان خوشې کړي.

اسرائیل غزه له تېرو شپږو اوونیو راهیسې تر بشپړې محاصرې لاندې راوستلې، او د خوراکي توکو او نورو اړینو موادو د داخلېدو اجازه نه ورکوي.

مرستندویو ادارو خبرداری ورکړی چې زرګونه ماشومان له سو تغذیې سره مخ دي او زیاتره خلک یواځې یوه ورځنۍ خواړه لري.

د روغتیا نړیوال سازمان د امریکا له نوي سفیر څخه غوښتي چې پر اسرائیلو فشار راوړي، څو د غزې محاصره پای ته ورسوي او بشري مرستو ته اجازه ورکړي.

د افغانستان له سویل هلمند څخه راپورونه وایي چې د دې ولایت په ګرمسیر ولسوالۍ کې د ټرافیکي پیښې له امله شپږ تنه مړه شوي دي.

تر دې مهاله د پیښې لامل نه دی روښانه شوی، خو تر ډیره ټرافیکي پيښې د لویو موټرو د ګړندي سرعت له امله رامنځته کیږي.

د طالبانو تر واک لاندې د کابل امنیه قومندانۍ پخواني ویاند «جنرال» مبین افعانستان ته د پاکستان د بهرنیو چارو د وزیر راتګ ته په تمسخر ډول لیکلي، چې افغان چارواکي باید د افغانستان قیمتي سامانونه او شتمنۍ خوندي وساتي، ځکه چې پاکستاني غله په ډېر مهارت سره توکي پټوي.

هغه پر خپله ایکس‌پاڼه لیکلي، چې پاکستاني غله د توکو په چور او پټولو کې ډېر مهارت لري.

نوموړی دا څرګندونې داسې مهال کوي، چې نن سهار د پاکستان د بهرنیو چارو وزیر اسحاق ډار د یو پلاوي په ملتیا کابل ته راغلی او د طالبانو حکومت له ګڼ شمېر چارو سره یې لېدنې ترسره کړي دي.

د ایران او امریکا پلاوي د ایټالیا په پلازمېنه روم کې د عمان سفارت ته له رسېدو سره سم، خبرې اترې د عمان په منځګړیتوب پیل کړې.

د ایران لوري ویلي، که دا خبرې چې دوی یې «غیر مستقیم» بولي، په سمه لار روانې شي؛ نو امکان لري چې په راتلونکي کې دا خبرې «رسماً مستقیمې» شي.

امریکا بیا وايي چې دغه مذاکرات له پیله مستقیم دي، او تېره اوونۍ هم په همدې ډول ترسره شوي دي.

که څه هم تر دې دمه د خبرو له مېزه بهر رسمي جزییات نه دي خپاره شوي؛ خو دواړه لوري پر خپلو اساسي دریځونو ټینګار کوي.

ایراني پلاوي ویلي چې د خپل اټومي پروګرام بشپړ بندول به هېڅکله ونه مني؛ خو امریکایي استازي بیا وايي چې دوی ته تر ټولو مهمه خبره دا ده چې ډاډ ترلاسه شي چې ایران خپل اټومي پروګرام ته پوځي بڼه نه ورکوي.

د طالبانو حکومت د بهرنیو چارو وزیر امیرخان متقي د پاکستان د بهرنیو چارو وزیر اسحاق ډار سره لیدنه کې ویلي، چې دوی د کډوالو د را اېستلو پر بهیر خواشیني دي.

امیرخان متقي هیله څرګنده کړې، چې د کډوالو حقونه باید خوندي شي.

نوموړي دغه راز ویلي، چې دوی له پاکستان سره د اړیکو پراختیا ته لېواله دي.

بل لورته د پاکستان د بهرنیو چارو وزیر اسحاق ډار ویلي، چې له افغان کډوالو سره به ناوړه چلند نه کېږي او دوی په دې برخه کې کوټلي ګامونه پورته کوي.

نوموړي ویلي، د افغان کډوالو جایداد او سرمایې د هغوی ملکیت دی او هیڅوک یې په خپل سري ډول د اخیستلو هڅه نشي کولای.

دواړو لوریو دغه راز د سفارتي اړیکو پر پیاوړي کولو، ګډې همغږۍ، مشترکو پروژو او یو شمېر نورو موضوعاتو هم خبرې کړې دي.

په دې ناسته کې د پاکستان د بهرنیو چارو وزیر امیرخان متقي ته د اسلام اباد بلنه ورکړې.

د پاکستان د بهرنیو چارو وزیر اسحق ډار د طالبانو حکومت له رییس الوزرا ملا محمد حسن اخوند سره کتلي دي.

په دغه ناسته کې د امنیتي، سوداګریزو او د خلکو ترمنځ د اړیکو د پیاوړتیا په ګډون پر ګڼو دوه اړخیزو مسایلو خبرې شوې دي.

دواړو لوریو په لوړه کچه د چارواکو ترمنځ د خبرو پر دوام هوکړه کړې.

په پام کې ده، چې نوموړی نن څلور بجې شاوخوا ارګ کې یو خبري کنفرانس هم ولري.

د طالبانو حکومت د ریاست الوزرا د دفتر رییس عبدالواسع نن له غرمې مخکې له پاکستانه راغلي پلاوي ته په ارګ کې هرکلی ویلی.

د طالبانو حکومت مرستیال ویاند حمدالله فطرت ویلي، چې ښايي یاد پلاوی له رییس الوزرا سره هم د دواړو هیوادونو ترمنځ د سیاسي، اقتصادي، تجارتي او فرهنګي اړیکو پر پراختیا سربېره په پاکستان کې د مېشتو افغان کډوالو د اجباري اخراج موضوع په اړه خبرې وکړي.

د یادونې ده، چې د اسحاق ډار په مشرۍ دغه پلاوی نن سهار کابل ته را ورسېد.

‏د روسیې د بهرنیو استخباراتو رییس ادعا کړې، چې لویدیځ د خپلو جیوپولیټکو موخو ترلاسه کولو لپاره د طالبانو د مخالفو ډلو ملاتړ کوي.

سرګي نارشکن بیکو کې د افغانستان په اړه جوړې شوې غونډې ته ویلي، چې افغانستان کې د بهرنیو زیان رسوونکو لاسوهنو مخنیوی اړین دی.

هغه د غرب له لوري د افغانستان د شتمنۍ پر کنګل کېدو هم نیوکه کړې ده.

پاکستاني رسنیو راپور ورکړی، چې د پاکستان د بهرنیو چارو وزیر اسحاق ډار کابل ته راغلی.

کابل ته دا د ډار لومړی رسمي سفر بلل کېږي.

ټاکل شوې چې نوموړی به د یو پلاوي په مشرۍ د طالبانو له چارواکو سره لیدنې ولري.