د فلسطیني رسنیو د راپورونو له مخې، تېره ورځ اسراییلي سرتېرو د رفح ښار په یوه بشري مرستندویه مرکز کې پر هغو کسانو ډزې کړې، چې د خوراکي توکو ترلاسه کولو لپاره راټول شوي وو.

د حماس د رسنیو دفتر ویلي، چې زرګونه وږو فلسطینیانو د مرستو مرکز ته د ننوتلو هڅه کوله، چې اسراییلي ځواکونو پر هغوی ډزې وکړې او ګڼ کسان یې ټپیان کړي دي.

د «یدیعوت احرونوت» اسراییلي ورځپاڼې راپور ورکړی، چې د مرستو یوه امریکا میشته موسسه چې د سویس له خوا ثبت شوې، له پیښې وروسته خپل کارکوونکي له رفح څخه ایستلي دي.

د دې بنسټ پخواني مشر تازه استعفا ورکړې، او دلیل یې د بشري اصولو د نقض ستونزې یادې کړې.

د سره صلیب ویاند کریستیان کاردون ویلي: «بشري مرستې باید د سیاست یا پوځ وسیله ونه ګرځي.»

د اسراییل لومړي وزیر بنیامین نتنیاهو ویلي، چې د ایران مذهبي مشر علي خامنه‌يي د امریکا او ایران تر منځ د احتمالي خبرو له پیله مخکې، پر ټوېټر د اسراییل د له منځه وړلو څرګندونې کوي.

نتنیاهو دا څرګندونې د یوه خبري کنفرانس پر مهال کړې، او ویلي: «دواړه لوري (ایران او امریکا) د خبرو اترو پر درشل ولاړ دي؛ خو خامنه‌يي بیا هم ښکاره وایي چې اسراییل باید له نقشې څخه پاک شي.»

شنونکي باور لري چې اسراییل ښایي د ایران پر ضد احتمالي برید ته د پلمې په لټه کې وي، څو د نړیوالو تمرکز له مذاکراتو بلې خوا ته واړوي.

بل‌خوا د سپینې ماڼۍ یوه جګپوړي چارواکي والانیوز ته ویلي، چې ولسمشر ډونالډ ټرمپ د اسراییل له ممکنه برید څخه اندېښنه لري.

د نوموړي په وینا، که اسراییل د ایران پر اټومي تاسیساتو برید وکړي؛ نو دا به د خبرو اترو روان بهیر له ستونزو سره مخ کړي.

د لغمان په مهترلام ښار کې د تندر د لوېدو له امله یو ۱۷ کلن تنکی ځوان خپل ژوند له لاسه ورکړی او دوه تنه نور چې یوه ماشومه ده، ټپیان شوي دي.

د طالبانو حکومت تر واک لاندې د لغمان ولایت د طبیعي پېښو د مدیریت رییس، خیرمحمد غازي، رسنیو ته ویلي چې دا پېښه نن د ماسپښین مهال د «ده زیارت» په سیمه کې رامنځته شوې.

نوموړی زیاتوي چې د ټپیانو له ډلې د یوه روغتیايي وضعیت د اندېښنې وړ دی.

د طالبانو حکومت سفیر سهیل شاهین په قطر کې د دغه هېواد د سوداګرۍ او صنایعو د خونې له رئیس سره لیدلي دي.

په دغه ناسته کې د افغانستان او قطر ترمنځ د اقتصادي همکاریو، نندارتونونو او د افغانو او قطري سوداګرو ترمنځ د غونډو د اسانتیا په اړه خبرې شوې دي.

قطر کې د طالبانو سفارت وایي، دواړو خواوو په افغانستان کې د پانګونې او د سوداګرو پر پراختیا ټینګار کړی دی.

د هند په پنچکوله سیمه کې د پورونو له امله د یوې کورنۍ ۷ غړو ځان وژنه کړې.

عیني شاهد پونیت رانا رسنیو ته ویلي، چې د شپې له خوا یې یو ولاړ موټر ولید، چې شپږ تنه پکې مړه وو، او یو تن د زنکدن پر مهال ورته ویلي چې له بانکونو ډېر پوروړي دي، خپلوانو یې مرسته نه ورسره کوله؛ نو مجبور شول زهر وخوري.

پولیسو دی روغتون ته رسولی وو؛ خو بیا یې هم ساه ورکړه.

په وژل شویو کسانو کې ۴۲ کلن پربین متل، د هغه مور، پلار، مېرمن، دوه لوڼې او یو زوی شامل دي.

یادې پېښې په ټولنیزو رسنیو کې پراخ غبرګونونه راپارولي دي.

د چین د شاندونګ ولایت په یوه کیمیاوي فابریکه کې زوروره چاودنه او اورلګېدنه شوې چې لږ تر لږه پنځه تنه یې وژلي او ۱۹ نور یې ټپیان کړي دي.

د شینهوا خبري آژانس د معلوماتو له مخې، د دې پېښې له کبله شپږ تنه لا هم لادرکه دي.

د رویټرز د راپور له مخې، له ۲۰۰ زیات د ژغورنې کارکوونکي سیمې ته استول شوي دي.

شاندونګ بندر د چین په ختیځ کې یو له مهمو بندرونو څخه ګڼل کېږي، چې پخوا له ایران نه د نفتو ستر واردوونکی و؛ خو د امریکا له بندیزونو وروسته له تېر کال راهیسې دغه واردات بند شوي دي.

رویټرز د خپلو سرچینو په حواله راپور ورکړی چې اسراییل او سوریې په دې وروستیو کې د په پوله کې د شخړو او ترینګلتیاو د کمولو په موخه مستقیمې خبرې پیل کړې دي.

راپور زیاتوي، چې د دواړو هېوادونو د امنیتي چارواکو ترمنځ په پوله کې ځینې ناستې هم ترسره شوې دي.

له دې وړاندې د سوریې د لنډمهالي حکومت ولسمشر احمد شرع هم له اسراییل سره د غیر مستقیمو خبرو پخلی کړی و او ویلي وو، چې د دغو خبرو موخه د ترینګلتیاو راکمول دي.

روسیې په رسمي ډول د طالبانو پر فعالیتونو موقتي ځنډ عملي کړی او د ترهګرو ډلو په نوملړ کې یې د طالبانو پر حکومت بندیزونه ځنډولي دي.

د روسیې د امنیتي خدمتونو فدرالي ادارې په تازه خپاره شوي لیست کې طالبان له دغه لیست څخه ایستلي دي.

په دغه نوملړ کې ۶۲ نور سازمانونه شته، چې روسیه کې یې فعالیت بند دی.

د یادونې ده، چې د روسیې سترې محکمې په اپریل کې دا پرېکړه کړې وه؛ خو د مۍ په شلمه عملې شوې ده.

د هند دفاع وزارت اعلان کړی چې له رادار نه پټېدونکي، دوه موتوره لرونکې پنځم نسل جنګي الوتکې جوړوي.

دا اقدام د هند او پاکستان ترمنځ د تازه نظامي شخړې او د وسلو سیالۍ په دوام کې ترسره کېږي.

هندي چارواکو ویلي چې دا پروژه به د دولتي الوتنو پراختیا ادارې تر مشرۍ لاندې پر مخ یووړل شي، او ژر به دولتي او خصوصي شرکتونه د الوتکې د نمونې جوړولو ته راوبلل شي.

دا په داسې حال کې ده، چې په دې وروستیو کې د هند او پاکستان ترمنځ په څلور ورځنۍ جګړه کې دواړو هېوادونو جنګي الوتکې، توغندي او ډرونونه کارولې.

سرچینې وایي، طالبان غواړي هند وهڅوي ترڅو د کابل او د هیواد په یوشمیر نورو سیندونو د اوبو او برښنا بند په جوړولو کې د دوی له حکومت سره مرسته وکړي.

د طالبانو د اوبو او انرژۍ وزارت یوې سرچینې ویلي، چې دوی هڅه کوي هند وهڅوي چې د کابل سیند او څلورو نورو سیندونو په اوږدو کې د بندونو جوړولو پروژو کې برخه واخلي چې له افغانستان څخه پاکستان ته بهیږي.

د سرچینې په وینا، د طالبانو د تماس او غوښتنې وروسته، هند د وړاندیز شوي بندونو په اړه د مفصلو امکاناتو د راپورونو غوښتنه کړې.

تمه کیږي چې د اوبو او برښنا وزارت د دفتر رئیس، قاري عزیز – چې د طالبانو د مشهور لابیګر «جنرال» مبین اوښې دی د بند جوړلو جزیات د هند سفارت سره شریک کړي.

د سرچینې په وینا، طالبانو هندي لوري ته ویلي چې د افغانستان او پاکستان ترمنځ د اوبو رسمي تړون شتون نلري، او له همدې امله هندي پانګه اچوونکي باید د پاکستان د اندیښنو له امله ونه ویریږي.

د یادونې ده، چې د کابل سیند، د څلورو نورو سیندونو سره یوځای؛ چې له افغانستان څخه سرچینه اخلي او پاکستان ته بهیږي، له اوږدې مودې راهیسې د افغانستان او پاکستان ترمنځ د جنجال ټکی ګرځیدلی.

تر دې وړاندې د طالبانو حکومت د اوبو او انرژۍ وزارت چارواکو ویلي وو، چې هڅه کوي په ټول افغانستان کې د خپلو سیندونو اوبه مهار کړي.