د هند د سینما مشهور ستوری منوج کمار نن د ۸۷ کلونو په عمر په ممبۍ کې له نړۍ سترګې پټې کړې.

د هند لومړي وزیر نریندرا مودي د منوج کمار پر مړینه خواشیني څرګنده کړې.

د ان‌ډي‌ ټي‌وي د راپور له مخې، د منوج کمار زوی کونال ګوسوامي د خپل پلار مړینه تایید کړې او ویلي یې دي چې نوموړی له اوږدې مودې راهیسې له ناروغۍ کړېده.

منوج کمار، چې اصلي نوم یې «هري کرشناګري ګوسوامي» و، په ۱۹۳۷ کال کې په هند کې زېږېدلی و.

نوموړی د «روتي، کپرا او مکان»، «کرانتي» او «آدمی» په څېر فلمونو کې د پیاوړو رولونو لوبولو له امله د یوه افسانوي ستوري په توګه یادېده.

یو شمیر طالب پلوو شاعرانو د ننګرهار په نارنج ګل مشاعره کې د افغانو ښځو او پښتون ژغورنې غورځنګ پر ضد شعرونه او ترانې زمزمه کوي.

په داسې حال کې چې په مشاعره کې ټول شعرونه د ننګرهار د اطلاعاتو او کلتور ریاست له نظره تیره وي خو لیدل کېږي چې طالبان په لوی لاس دې ډول شعرونو ته اجازه ورکړې.

د نارنج ګل دودیزې مشاعرې ته د کوزې پښتونخوا څخه د راغلو شاعرانو له ډلې یې چې طالبانو سره همدردي لري د افغان میرمنو او پښتون ژغورنې غورځنګ په ضد شعرونه وایي خو هیڅوک ورته څه نه وایي.

امریکایي خبریال لورا روزن وایي، ښایي راتلونکو دوو یا درېیو اوونیو کې د عمان په کوربه توب د ایران او امریکا خبرې پیل شي.

نوموړي د یوې سرچینې په حواله ویلي چې دا خبرې به لومړی غیر مستقیمې وي او په اول پړاو کې به د مستقیمو د مذاکراتو پر چارچوب ورټولې وي.

د هغه په خبره، ښایي د ایران له لوري په دغه ټیم کې د بهرنیو چارو سیاسي مرستیال مجید تخت روانچي او د یاد وزارت حقوقي مرستیال کاظم غریب ابادي شامل وي.

سره صلیب نړیوالې کمېټې ویلي چې افغانستان لا هم د ماینونو او ناچاودو توکو له ګواښ سره مخ دی.

د یادې کمېټې په دې اړه یو تازه خپاره کړي راپور کې ویلي چې په ۲۰۲۴م کال کې د چاودېدونکو توکو ۲۵۱ پېښو له امله ۵۶۴ کسان وژل شوي دي.

په دغه شمېر کسانو کې ۴۳۴ ماشومان شامل دي.

د روسیې دفاع وزارت اعلان کړی، چې په دونتسک کې یې سل اوکرایني سرتېری وژلي دي.

د سرچینې د معلوماتو له مخې، دا بریدونه یې د بې‌پیلوټه الوتکو په واسطه کړي دي.

اوکرایني چارواکو تر اوسه په دې اړه څه نه دي ویلي.

دا بریدونه داسې مهال کېږي چې امریکا د اوکراین جګړې د ختمولو هڅې روانې کړې دي.

نوموتی پښتون ټوکمار ميراوس له اوږدې ناروغۍ وروسته وفات شو.

خبريال فاروق فراق پر خپله فېسبوک‌پاڼه د هغه د مړینې خبر خپور کړی دی.

د یادونې ده چې میراوس له څو کلونو راهيسې له شکرې ناروغۍ کړېده او د وجود ځينې غړي يې هم د همدې ناروغۍ له امله پرې شوي وو.

د روسیې د بهرنیو چارو وزارت ویاندې، ماریا زاخارووا د امریکا د ولسمشر ډونالډ ټرمپ د ګواښونو په غبرګون کې ویلي، چې مسکو هر ډول نظامي اقدام پر ایران غیرقانوني بولي.

نوموړې ویلي: «موږ داسې حل‌لارې لټوو چې د ایران مشروع ګټې په پام کې ونیسي او د لویدیځ له‌خوا د دې هېواد د اټومي پروګرام پر ضد شته تعصبونه له منځه یوسي.»

زاخارووا ټینګار کړی چې د ایران د اټومي تأسیساتو بمبار به د ټولې نړۍ لپاره ناوریني پایلې ولري او زیاته کړې چې ایران حق لري له اټومي انرژۍ سوله‌ییزه ګټه پورته کړي.

د طالبانو حکومت د عامې روغتیا وزارت مرستیال بخت‌الرحمان شرافت، د حزب اسلامي مشر ګلبدین حکمتیار ته مشوره ورکړې چې د سیاست، مدیریت او حکومتولۍ زده‌کړه له شیخ هبت‌الله څخه وکړي.

شرافت له حکمتیار څخه غوښتنه کړې چې په خپلو پخوانیو پرېکړو پښیماني څرګنده کړي او توبه وباسي.

شرافت پر خپله ایکس‌پاڼه لیکلي:«حکمتیار هم د اسلامي دولت او هم د جمهوري نظام پر مهال ماته وخوړه. د نجیب حکومت له سقوط وروسته، د نوي حکومت په جوړولو کې ناکام شو. د ده قومندانانو، چې یو مهال یې کابل چور کړی و، بالاخره د داسې حکومت تابعیت ته غاړه کېښوده چې پخوا یې ورسره مخالفت درلود.»

نوموړي حکمتیار ته په تونده لهجه ویلي، چې په تېر جمهوري نظام کې ناکام شوی او خپل ټول ارزښتونه یې د څو موټرو او یوه کور لپاره قرباني کړي دي.

د یادونې ده چې د طالبانو حکومت ګلبدین حکمتیار له سیاسي فعالیتونو منع کړی دی؛ خو د طالبانو د بندیزونو سره سره بیا هم نوموړی له خپلو پلویانو او د یو شمېر ګوندونو له مشرانو سره لیدنې کوي.

د پاکستان متقاعد جنرال انعام الحق ویلي، چې د سراج‌الدین حقاني په مشرۍ د حقاني شبکه له کندهار مېشتي طالب مشرتابه سره د ټي‌ټي‌پي په تړاو اختلاف لري.

نوموړي اکسپرس ټریبیون ته په یوه مقاله کې ویلي، چې د کندهار طالبان نه غواړي ټي‌ټي‌پي د کابل او اسلام‌آباد ترمنځ اړیکې خرابې کړي، خو د حقاني شبکې د نفوذ له امله یې د مقابلې توان هم نه لري.

د مقالې له مخې، د حقاني شبکه ټي‌ټي‌پي د احتمالي کورنۍ جګړې لپاره یو بالقوه نظامي ځواک ګڼي، چې کار ته راتلی شي.

هغه ویلي، چې د کندهار طالبان او د حقاني شبکه د نجونو د زده‌کړو د بندیز، له پاکستان سره د اړیکو او کورنیو سیاستونو په اړه اختلاف لري.

په مقاله کې راغلي چې سراج‌الدین حقاني په وروستیو کې د عامه صحنې څخه نادرکه شوی، چې د کندهار د مشرتابه سره د هغه د اختلاف ښکارندویي کوي.

د طالبانو حکومت د شوکت میرضایف له وروستیو څرګندونو هرکلی کړی.

د طالباتو حکومت ویاند ذبیح الله مجاهد وایي، چې د ازبکستان ولسمشر واقیعت درک کړی دی.

مجاهد ویلي چې دوی له ازبکستان سره ښې اړیکې لري او غواړي چې دا اړیکې لا پراختیا پیدا کړي.

د یادونې ده چې تېره ورځ شوکت میرضایف ویلي وه چې طالبانو افغانستان کې امن ټینګ کړی.