د ایران د بهرنیو چارو وزیر سید عباس عراقچي د یو رسمي سفر په ترڅ کې اسلام‌اباد ته رسیدلی دی.

د پاکستان د بهرنیو چارو وزارت ویلي، ټاکل شوې چې نوموړی به د پاکستان له لومړي وزیر، د لومړي وزیر له مرستیال او ولسمشر سره مهمې لیدنې وکړي.

یاد سفر د دواړو هیوادونو ترمنځ د اړیکو د پیاوړتیا او سیمه‌ییزو مسایلو د بحث لپاره ترسره شوی دی.

د روسیې د بهرنیو چارو وزیر سرګي لاوروف د پاکستان د بهرنیو چارو له وزیر اسحاق ډار سره په تلیفوني خبرو کې څرګنده کړې چې مسکو تیار دی تر څو د اسلام‌اباد او نوي‌ډیلي ترمنځ د کشمیر پر سر د رامنځته شوي کړکېچ د حل لپاره منځګړیتوب وکړي.

د روسیې د بهرنیو چارو وزارت په یوه اعلامیه کې ویلي، په دې خبرو کې د دواړو هېوادونو تر منځ د کړکېچ د زیاتېدو موضوع ته جدي پاملرنه شوې ده.

لاوروف ویلي، که هند او پاکستان دواړه وغواړي، روسیه اماده ده چې د کشمیر د پهلګام تروریستي پېښې وروسته رامنځته شوې سیاسي وضعه حل کړي.

دغه تلیفوني خبرې له هغه وروسته ترسره شوې چې لاوروف دوه ورځې مخکې د هند د بهرنیو چارو له وزیر سوبرامانیام جېشنکر سره هم خبرې کړې وې.

لیکواله: مېشل نیازۍ

د پښتنو پر بنسټ د سوېس د حکومت د ایستلو پرېکړه: یو خطرناک او غیرقانوني اقدام

د سوېس د فدرالي حکومت لخوا دا وروستی وړاندیز چې غواړي افغان پښتانه مهاجر د هغوی د قومیت پر بنسټ افغانستان ته وشړي، نه یوازې یو خطرناک اقدام دی، بلکې د نړیوالو قوانینو ښکاره سرغړونه هم ده. د “Neue Zürcher Zeitung (NZZ)” راپورونه ښيي چې د سوېس چارواکو د آلمان د بریدونو وروسته، داسې یو پلان تر غور لاندې نیولی چې له مخې یې غواړي پښتانه مهاجر، یعنې هغه افغانان چې د پښتون قوم سره تړاو لري، بېرته طالبانو ته وسپاري.

دا پریکړه د انسان حقونو، د مهاجرت نړیوالو تړونونو او د ژغورنې د نړیوال سیستم ضد ده. د 1951 کډوالو تړون او د هغه 1967 پروتوکول، چې سوېس هم ورته ژمن دی، واضحه وایي چې هېڅوک باید هغه هېواد ته ونه لېږل شي چیرته چې د هغوی ژوند، ازادي یا عزت له خطر سره مخ وي — که دا خطر د قوم، مذهب، سیاسي نظریې یا ټولنیز هویت له امله وي.

پښتون معنا د طالبانو پلوي نه لري
د دې تصور خپرول چې هر پښتون د طالبانو ملاتړی دی، نه یوازې بې بنسټه تور دی، بلکې له پښتني ولس سره د یو لوی ناانصافي برابره ده. زرګونه پښتانه نارینه او ښځې د طالبانو له ظلم، تهدید او وژنو تښتېدلي. ډېر پښتانه ژورنالېستان، ښوونکي، مدني فعالان او د پخواني دولت کارکوونکي طالبان د خپلو دښمنانو په توګه پېژني. اوس هغوی ته دا ویل چې “تاسو ځکه واپس ځئ چې پښتانه یاست” یو ډول ظالمانه سزا ده، چې یوازې د هغوی د قومیت له امله ورکول کېږي.

د غیرقانوني شړلو ضد نړیوال قوانین
د UNHCR او ګڼو نړیوالو محکمو پرېکړې دا تصدیقوي چې افغانستان — په ځانګړې توګه د طالبانو تر ولکې لاندې سیمه — د اجباري ایستنې لپاره مناسب نه دی. د non-refoulement اصل، چې د نړیوالو قوانینو برخه ده، وایي چې هېڅ دولت نه شي کولای یو انسان هغه ځای ته واستوي چې هلته یې ژوند یا ازادي له خطر سره مخ وي.

د بشري حقونو نړیوال میثاق (ICCPR) هم د هر ډول قومي تبعیض، جبري شړلو، او شکنجې پر ضد صریحاً بندیز لګوي. د پښتنو د شړلو دا پلان د همدغو ټولو قوانینو ښکاره سرغړونه ده.

یو خطرناک نړیوال مثال
که چېرې سوېس د قوم پر بنسټ د مهاجرو شړلو دا پلان عملي کړي، نو دا به نورو اروپايي هېوادونو ته هم دا پیغام ورکړي چې هغوی هم کولی شي انسانان د قوم، ژبې یا رنګ له مخې طبقه بندي او شړي. دا یو شاتګ دی، چې د دویمې نړیوالې جګړې نه وروسته د جوړ شوي نړیوال نظم بنیادي اصول له منځه وړي.

پایله: باید دا پلان ودرول شي
موږ د بشري حقونو سازمانونو، د اروپایي اتحادیې، د ملګرو ملتونو د کډوالو ادارې (UNHCR) او د سوېس د فدرالي ادارو څخه دا غوښتنه کوو چې دا غیرقانوني، تبعیضي او خطرناک پلان بنده کړي. باید هر افغان، که هغه پښتون وي که غیر پښتون، د خپل انفرادي وضعیت له مخې قضاوت شي نه د خپل قوم له مخې.

پښتانه د طالبانو نماینده نه دي، بلکې ډېر یې د همدې رژیم قربانیان دي. هغوی شړل نه، بلکې ساتنه او عدالت غواړي.

یادونه: حماسه میډیا د یوې بې پرې رسنۍ په توګه د ټولو سیاستوالو ، لیکوالو او نظر خاوندانو لیکنو او نظریاتو ته درناوی لري، دا لیکنه د حماسه میډیا نظر نه څرګندوي بلکې د لیکوال نظر دی او مونږ  یې کټ مټ دلته خپروو.

د بشري حقوقو د برخې فعاله او خبریاله نیلوفر ایوبي له سویس څخه د پښتنو کډوالو د ایستلو د طرحې په غبرګون کې ویلي دا ښکاره تبعیض او د نړیوالو قوانیو څخه سرغړونه ده.

میرمن ایوبي د ۱۹۵۱ کال د کډوالو کنوانسیون دریمه مادې ته په اشارې ویلي چې د نژاد، مذهب یا هیواد پر بنسټ ښکاره تبعیض منع دی.

د سویس د یوې ادارې له لورې د افغان کډوالو په ځانګړې ډول د پښتنو کډوالو د ایستلو طرحه له ګڼو غبرګونو سره مخ ده.۰

پخوانۍ افغان دیپلوماتې اصیلا وردګ له سویس څخه د پښتنو افغان کډوالو د را شړلو په غبرګون کې ویلي، پښتونولي جرم نه دی.

نوموړې پر خپله ایکس‌پاڼه لیکلي، چې د پښتنو کډوالو شړل یوازې د قوم پر بنسټ د طالبانو سره تړل، ښکاره تبعیض دی او د نړیوالو قوانینو سرغړونه ده.

هغې زیاته کړې، چې زرګونه پښتانه د طالبانو له تاوتریخوالي څخه تښتېدلي
او ملاتړ ته ضرورت لري.

د پوهنتون استاده شبنم صالحي وایي، د طالبانو تر کنټرول لاندې افغانستان ته د پښتنو کډوالو شړل تبعیضي چلند دی.

هغې د سویس له لوري د پښتنو کډوالو شړل د نړیوالو قوانینو خلاف کار بللی.

نوموړې دا څرګندونې وروسته تر هغې کوي، چې د سویس له لوري د پښتنو افغان کډوالو د را اېستلو راپورونه خپاره شول.

د پاکستان د لومړي وزیر مرستیال او د بهرنیو چارو وزیر محمد اسحاق ډار د اپرېل پر ۱۹مه کابل ته له خپل وروستي سفر وروسته د دې سفر د پایلو د ارزونې غونډه جوړه کړه.

د پاکستان د بهرنیو چارو وزارت د یوې خبرپاڼې په خپرولو سره ویلي، چې ښاغلي ډار په دې غونډه کې یو ځل بیا ټینګار وکړ چې اسلام‌اباد له خپلو ګاونډیانو سره د سولې پر بنسټ د اړیکو جوړولو، د سوداګرۍ پراختیا، سیمه‌ییز اتصال، دوامداره پرمختګ او هوساینې ته ژمن دی.

نوموړي زیاته کړې، چې پاکستان غواړي له افغانستان سره مثبت او رغوونکي روابط ولري، څو دواړه هېوادونه له موجودو فرصتونو ګټه واخلي.

د پاکستان د اوبو د سرچینو د څېړنو شورا (PCRWR) په یوه راپور کې خبرداری ورکړی چې که بیړني ګامونه وانه‌خېستل شي، پاکستان به تر ۲۰۴۰ کال پورې د څښاک د پاکو اوبو له ختمېدو سره مخ شي.

راپور کې ویل شوي چې د کراچۍ ۸۱ سلنه اوسېدونکي مجبوره دي چې د اوبو د پېرلو لپاره پیسې ورکړي، او ۹۰ سلنه اوبه ککړې دي.

راپور زیاتوي چې دغه وضعیت په ځانګړي توګه د ښار په کمو عاید لرونکو سیمو کې جدي دی، چې خلک یې له غیرقانوني او ناامنه سرچینو څخه اوبه ترلاسه کوي.

راپور کې دغه راز ویل شوي، چې د اوبو ککړتیا، د حکومت له خوا د اوبو د کیفیت د معاینې نشتوالی او د اوبو ناقصه مدیریت د دې بحران شدت زیاتوي.

دغه اداره وایي، که سمدستي اقدامات ونه شي، پاکستان به د اوبو د جدي بحران سره مخ شي.

د افغانستان د سولې کمیټې (CPA) د امریکا په ویرجینیا کې د سولې، ملي پخلاینې او د افغانانو د حقونو د خوندي کولو په موخه غونډه وکړه.

په دې غونډه کې چې مشري یې ایام الدین ایام کوي، د افغان ملت د ګوند مشر ستانه‌ګل شیرزاد، د مالیې پخواني وزیر انورالحق احدي، او ګڼ شمېر سیاسي او مدني فعالانو ګډون درلود.

ویناوالو په هیواد کې په سیاسي، مذهبي او انساني حقوقو ټینګار وکړ او د دوحې تړون د بشپړ تطبیق ترڅنګ یې په افغانستان کې ټولشموله حکومت د روانې کشالې حل وباله.

کرملین اعلان کړی چې د چین ولسمشر شي جین‌پینګ به د روانې ثور میاشتې له ۱۷مې تر ۲۰مې نېټې روسیې ته سفر وکړي او د نازي آلمان پر وړاندې د بریا د ورځې په مناسبت جوړو شویو مراسمو کې به له روسي ولسمشر ولادیمیر پوتین سره ګډون وکړي.

دا مراسم چې د دویمې نړیوالې جګړې د پای نمانځنه ده، په داسې حال کې ترسره کېږي چې د چین او امریکا ترمنځ سوداګریز کړکېچونه زیات شوي دي.

هممهاله روسیې د یادې ورځې په ویاړ په اوکراین کې درې ورځنی اوربند اعلان کړی دی.

ټاکل شوې ده چې د دواړو هېوادونو مشران د ستراتیژیکو همکاریو د پراختیا په اړه خبرې وکړي او یو شمېر دوه‌اړخیز تړونونه هم لاسلیک شي.

که څه هم چین ځان د اوکراین جګړه کې بې‌طرفه بولي؛ خو لویدیځ هېوادونه په دغه هېواد تور لګوي چې له مسکو څخه غیرمستقیم ملاتړ کوي.